19:00
Երկար բանակցություններից հետո ակցիայի մասնակիցներն, ի վերջո, որոշեցին վաղը` 17:00-ին, հավաքվել մարզային դատախազության շենքի դիմաց: Նրանք հայտարարեցին, որ ժամանակ են տալիս մարզի դատախազ Րաֆֆի Ասլանյանին եւ վերջինիս վերադասներին` հարցին (մեղադրյալ Պերմյակովին ՀՀ իրավապահներին հանձնել) դրական լուծում տալու եւ իրենց պատասխան տալու համար: Հենց վաղն էլ գյումրեցիները, կախված իրավապահների պատասխանից, կորոշեն իրենց անելիքը:
18:10
Այս պահին բազմությունը հավաքված է ռուսական ռազմաբազայի առաջ: Մարդկանց հանդիպելու է եկել Շիրակի մարզի դատախազ Րաֆֆի Ասլանյանը, ում ասելով` բազայի դիմաց հավաքվելը ոչ մի օգուտ չի տա գործի քննությանը: Ըստ նրա` հայկական կողմը նախաքննությունը վարում է անկախ այլ հանգամանքներից: Ասլանյանն առաջարկում է հավաքվել մարզի դատախազության դիմաց, որից հետո 15-20 հոգի առանց լրատվամիջոցների կրող են բարձրանալ եւ քննարկել հարցեր: «Հետքի» թղթակիցը հայտնում է, որ տարածքում են հատուկջոկատայիններ, որոնց ուղղությամբ քարեր նետվեցին, սակայն մարդկանց կոչ է արվել սադրանքների չտրվել:
17:36
Րոպեներ առաջ Մայր Հայաստան հուշահամալիրի մոտ հավաքված բազմության մեջ վատացել էր Նազիկ Նիկոլյանը, ով, ըստ տեղեկությունների, Շիրակի թեմի առաջնորդարանում է աշխատում: Ակցիայի մասնակիցները փորձել են ճեղքել ոստիկանական շղթան, տեղի է ունեցել հրմշտոց, ինչի արդյունքում կինը վատացել է: Շատ չանցած` ներկաներին հաջողվել է ուշքի բերել նրան:
Տեսահեռարձակումը` այստեղ:
17:30
Գյումրու Մայր Հայաստան հուշահամալիրի մոտ այս պահին բազմամարդ է: «Հետքի» թղթակիցը հայտնում է, որ ռազմաբազայից ոչ հեռու գտնվող տարածքում հավաքվել են հիմնականում գյումրեցի տղամարդիկ եւ պահանջում են հանդիպում ՌԴ 102-րդ ռազմաբազայի ներկայացուցիչների հետ:
17:23
Այս պահին քայլերթի մասնակիցները Մայր Հայաստան հուշահամալիրի մոտ են, սակայն ոստիկանները փակել են դեպի ռուսական ռազմաբազա տանող փողոցը:
17:12
Քանի որ ոստիկանական ուժերը փակել էին Հաղթանակի միակողմանի պողոտան եւ դրանով խոչընդոտում էին դեպի 102-րդ ռազմաբազա շարժվել ցանկացող վարորդների երթը, վերջիններս որոշել են ոտքով քայլել դեպի Գյումրու կենտրոնական հրապարակ: Այսպիսով` ավտոերթը վերածվել է քայլերթի: Երթի մասնակիցները չեն անսացել մարզի ոստիկանապետ Նադարյանի հորդորին` չշարժվել դեպի ռուսական ռազմաբազա, այլ հանդիպել մարզի դատախազին: Այժմ մասնակիցները գնում են դեպի կենտրոնական հրապարակ, այնտեղից` Գորկու այգի, որտեղից էլ պատրաստվում են քայլել դեպի ռազմաբազա: Ոստիկանները ակցիայի մասնակիցներից առաջ շտապել են նշված ուղղությամբ:
16:23
Շիրակի մարզի դատախազության դիմաց հավաքված քաղաքացիներին, որոնք այսօր Գյումրիում դուրս են եկել ավտոերթի, մարզի ոստիկանապետ, գնդապետ Վարդան Նադարյանն առաջարկեց չփակել դատախազության դիմացի փողոցը եւ սպասել մինչեւ 16:30-ը: Ըստ նրա` այդ ժամանակ ՀՀ քննչական կոմիտեն հայտարարություն է անելու: Քաղաքացիները, սակայն, որոշել են չհեռանալ տարածքից եւ սպասել, թե ինչ են ասելու իրավապահները: Դրանից հետո կորոշվեն հետագա գործողությունները:
15:55
Ավտոմեքենաներով երթը Գյումրիում մեկնարկեց ժամը 15.00-ին, 100-ից ավելի ավտոմեքենաներ 8-րդ ռազմավանի մոտից ուղղություն վերցրեցին դեպի Գյումրիում գտնվող ՌԴ հյուպատոսարան: Երթի բոլոր մասնակիցները կանգ էին առել հյուպատոսարանի շենքի առջեւ եւ իջել էին մեքենաներից, նրանք հում ձվեր են նետում շենքի վրա` պահանջելով հանդիպում գլխավոր հյուպատոս Եվգենի Կոնիշեւի հետ:
Երթի մասնակիցների պահանջն է նաեւ, որ ռուսական կողմը կասկածյալին հանձնի հայկական կողմին: Հյուպատոսարանի շենքում, ամենայն հավանականությամբ, որեւէ մեկը չկա, շենքը պաշտպանվում է կարմիրբերետավորների կողմից, որոնց բերել են ավտոբուսով:
Երթը շարունակվելու է դեպի մարզպետարան, այնուհետեւ` դատախազություն: Եթին ուղիղ միացմամբ կարող եք հետեւել այս հղումով:
Լուս.` Լեւոն Բարսեղյանի ֆեյսբուքյան էջից
Մեկնաբանություններ (2)
Մեկնաբանել