HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Մերի Մամյան

10 տարի է ՝ Արուսը երեխաների հետ ապրում է մշակույթի վթարային տանը

Շենքի երկրորդ հարկում երեւացող լվացքի պարանը հուշում է, որ այստեղ մարդիկ են բնակվում: Կիսավեր աստիճանները տանում են երկրորդ հարկ, որի միջանցքի վերջում գտնվում է Արուս Մկրտչյանի կացարանը: Երկհարկանի մեծ շենքում դեռեւս պահպանվում են սովետական տարիներից մնացած գրությունները, իսկ շենքի ներսում թափված են շինանյութի ու աղբի մնացորդներ: Շենքը Տավուշի մարզի Հաղթանակ գյուղի մշակույթի տունն է: Հայաստանի անկախացումից հետո մշակութային կենտրոնը դադարել է գործել:

10 տարի առաջ Արուսն ամուսնալուծվել է և երեխաների հետ տեղափոխվել մշակույթի տան սենյակներից մեկը: Այստեղ պարբերաբար հանգրվանել են օթեւան չունեցող ընտանիքներ, որոնք իրենց կացարանի հարցը լուծելուց հետո տեղափոխվել են: Արուսը երեխաների հետ մնացել է այստեղ, քանի որ չի կարողացել ոչ տուն գնել, ոչ էլ վարձակալել:

Արուսի երկու դուստրերն ամուսնացել են: Այժմ նա այստեղ ապրում է իր երկու տղաների հետ՝ 14-ամյա Էդգարի և 8-ամյա Արտյոմի: Արուսը հավաքարար է աշխատում գյուղի մոտակայքում գտնվող քարի արտադրամասում: Նա նաև օրավճարով աշխատանք է անում, եթե գյուղում որևէ մեկը դիմում է նրան: Ժամանակ առ ժամանակ օգնում են նաեւ համագյուղացիները: Արուսն ասում է, որ նպաստ ստանալու համար բազմիցս դիմել է Նոյեմբերյան քաղաքի սոցիալական ծառայությանը: Այնտեղ պատճառաբանում են, թե շենքը, որտեղ ապրում է, բնակելի չի համարվում, այնուհետև լրացուցիչ փաստաթղթեր են պահանջում և պարբերաբար հետաձգում նպաստ հատկացնելը:

«Մի կերպ, ծերը ծերին հասցնում եմ: Որ ասեմ, թե կարողանում եմ նոր հագուստներ առնեմ, էրեխեքիս թազա հագցնեմ, չէ, չեմ կարում: Մի կերպ կարողանում եմ իրանց գոյությունը պահպանել, որ էրեխեքս ոչ մի բանից հետ չմնան: Սնունդը ես մի կերպ առնում եմ»,- ասում է Արուսը:

Կոմունալ վճարումների համար շատ չի անհանգստանում, որովհետև գազ չունի, հոսանքի վճարն էլ հասցնում է տալ: Միակ սենյակը, որը նա զբաղեցնում է,  տաքացնում է փայտե վառարանով: Մինչև վերջերս Արուսն ինքն էր փայտը մոտակա անտառից հավաքում: Այժմ նրան օգնում է նաև Էդգարը:

Էդգարը դեռ չի որոշել` մինչև ավարտական դասարան դպրոց գնալո՞ւ է, թե՞ ոչ, բայց արդեն մտածում է, թե ինչպես պետք է փող աշխատի, որ մորն օգնի: Ասում է, որ հիմա շատերն են գնում Ռուսաստան, բայց ինքը չի ուզում գնալ, որովհետև համոզված է, որ այնտեղ մարդկանց շահագործում են:

«Ուզում եմ գյուղում մնամ: Երևի կգնամ ես էլ քարհանքում կաշխատեմ, քար կկտրեմ»,- ասում է Էդգարը:  

Լուս.՝ Նարեկ Ալեքսանյանի

Մեկնաբանություններ (1)

zohrab
Help your mum as much as you can good lads

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter