Գարնան արեւը տաքացնում է Արագածոտնի մարզի Ուշի գյուղի կարմիր տանիքով երկհարկանի տան բակը, որտեղ ձեւավորվում է 11 անչափահաս քույր ու եղբայրների մանկությունը: Դեռ երկու ամիս առաջ «Հետքը» գրել էր այս ընտանիքի մասին, որին ժամկետ էին տվել` Արմավիր քաղաքի վարձով տունն ազատելու համար: Հրապարակումից շաբաթներ անց Զանգեզուրի պղնձամոլիբդենային կոմբինատի ղեկավարությունը որոշեց տուն նվիրել Պողոսյանների ընտանիքին: Ընտանիքի համար տունը գնեցին Արագածոտնի մարզի Ուշի գյուղում:

Մեր այցելության օրը փոքրիկ Թինան, Թեհմինեն, Թամարիկն ու Հակոբը առաջին հերթին շտապեցին ցույց տալ այգու նոր տնկիներն ու ծաղիկները, որոնք ընտանիքի առաջին ներդրումն են տան շենացման գործում: Երեխաներն անհամբեր սպասում են բողբոջած ծառերի ծաղկելուն. նրանք համոզված են, որ իրենց այգում ամենահամեղ թուզը, խնձորն ու տանձն է աճելու:

9-ամյա Հակոբի սիրելի վայրը նկուղն է, քանի որ ինքն իր ձեռքով է հավաքել այնտեղ թափված արկղերը, դասավորել հոր գործիքները: Թինան սիրում է երկրորդ հարկի ամենամեծ սենյակը, որն ամենաարևոտն է ու հարմարը` խաղեր կազմակերպելու համար: Երեխաների մայրը` Գայանե Ավետիսյանը, գրեթե ողջ օրն անց է կացնում խոհանոցում` փորձելով համեղ ուտելիքներով տոն դարձնել երեխաների ամեն օրը:

Այս պահին ընտանիքի հոր` Դյումա Պողոսյանի միակ մտահոգությունը սանհանգույց սարքելն է, քանի որ տանը նորմալ սանհանգույց չկա: Դյուման շարունակում է ընտանեկան «Երազ» մեքենայով գույքի տեղափոխման պատվերներ իրականացնել, որոնք, սակայն, շատ քիչ են լինում:

Ավագ տղան` Աբելը, նոր տանը շուտով կվերսկսի քարերի վրա նկարներ դաջելու արհեստը: Աբելն ու մյուս եղբայրները ցանկանում են անգլերենի անվճար կուրսեր գտնել, օտար լեզու սովորել` ապագայում ավելի լավ աշխատանք գտնելու հույսով:

Տուն չունենալու հոգսը թեթեւացրած ընտանիքն այժմ արդեն կարող է մտածել երեխաների կրթության ու բարեկեցիկ ապագայի մասին: «Արդեն ծածկ ունենք, որի համար անչափ շնորհակալ ենք, հիմա արդեն մտածում եմ` ոնց անեմ, որ երեխաներս լավ սովորեն, լավ մարդիկ դառնան»,- ասում է ընտանիքի մայրը` Գայանե Ավետիսյանը:

Հ.Գ. Ուշի այցելության օրը մեզ միացան նաեւ երեք երիտասարդներ` Լեհաստանից, Իսպանիայից եւ Շվեդիայից, ովքեր Հայաստանում են` Եվրոպական կամավորական ծրագրով: Նրանք նույնպես գրել են իրենց տպավորությունների մասին, որին կարող եք ծանոթանալ ստորեւ: