HY RU EN

Սառա Պետրոսյան

Սյունիքի մարզպետի որդու հետ վիճաբանած երիտասարդը վիրահատվել է

Դեռեւս դատաբժշկական փորձաքննություններ չեն նշանակվել

Երեւանի Մալայանի անվան ակնաբուժական կենտրոնում մայիսի 3-ին վիրահատության է ենթարկվել Գորիս քաղաքի բնակիչ, 32-ամյա Հարություն Զաքարյանը: Վիրահատությունից առաջ կատարված հետազոտությունը նրա մոտ նաեւ գլխուղեղի ցնցում է արձանագրել: Բժիշկները հարազատներին հայտնել են, որ  երիտասարդի տեսողությունը վերականգնելու հավանականությունը շատ փոքր է: Նրա հայրը` Գագիկ Զաքարյանը, մեզ հայտնեց, որ որդու բուժումը Մոսկվայում շարունակելու ցանկություն ունի, սակայն բժիշկները դեռեւս թույլ չեն տալիս տեղափոխել:

Հարություն Զաքարյանն «աջ աչքի վնասվածք, կոպի պատռվածք» ախտորոշումով «Գորիս բժշկական կենտրոն» է տեղափոխվել 2015 թվականի մայիսի 2-ին՝ ժամը 21:35-ին: «Դեպքի առթիվ նյութերի նախապատրաստման ընթացքում ոստիկանության աշխատակիցները զեկուցագրեր են ներկայացրել, որ 2015 թվականի մայիսի 2-ին՝ ժամը 16:00-ի սահմաններում, Հարություն Զաքարյանը Գորիս քաղաքի կենտրոնական մասում վիճաբանել է Տիգրան Խաչատրյանի հետ, որից հետո գնացել են Գորիսի «Սդղի գյոլ» կոչվող տարածք, որտեղ նրանց են միացել նաեւ այլ անձինք։ Վիճաբանությունը վերածվել է ծեծկռտուքի, որի ընթացքում Հարություն Զաքարյանին աչքի շրջանում պատճառվել է մարմնական վնասվածք»,- ասվում է ՀՀ քննչական կոմիտեի հաղորդագրության մեջ:

Սյունիքի մարզային դատախազությունում մայիսի 4-ին հարուցվել է քրեական գործ՝ ինքնությունը չպարզված անձանց կողմից «Սդղի գյոլ» կոչվող տարածքում խուլիգանություն կատարելու դեպքի առթիվ՝ ՀՀ քրեական օրենսգրքի 258-րդ հոդվածի 3-րդ մասով։ Քրեական գործը մայիսի 5-ին ստացվել է Գորիսի քննչական բաժնում։

Դեպքից անցել է արդեն 3 օր, սակայն դեռեւս դատաբժշկական փորձաքննություններ չեն նշանակվել: Տուժածի հայրը` Գագիկ Հարությունյանը մեր հարցերին ի պատասխան հայտնեց, որ Երեւանում քննիչ չի այցելել իրենց, որդին այստեղ չի հարցաքննվել, իսկ Գորիսում նա ստորագրել է մի փաստաթղթի տակ, ըստ որի վնասվածքն ինքը ստացել է ավտոմեքենայի վրա աշխատանք կատարելիս:

Քննչական կոմիտեն արդեն հայտարարել է, որ «Հարություն Զաքարյանի եւ Սյունիքի մարզպետ Սուրեն Խաչատրյանի որդու` Տիգրան Խաչատրյանի միջեւ վիճաբանություն է տեղի ունեցել, այդուհանդերձ, Գագիկ Զաքարյանը չցանկացավ որեւէ բան պատմել դեպքի վերաբերյալ` ասելով, թե իրեն ոչինչ հայտնի չէ, եւ իրավապահները պետք է պարզեն, թե որդին ինչպես է վնասվածքներ ստացել:

Հիշեցնենք, որ Սյունիքի մարզպետի որդին` Տիգրան Խաչատրյանը ձերբակալվել էր 2013թ. հունիսի 1-ին Ս. Խաչատրյանի առանձնատան մոտ տեղի ունեցած միջադեպից հետո, որի հետեւանքով կրակոցներից տեղում մահացել էր Գորիսի քաղաքապետի նախկին թեկնածու, 43-ամյա գործարար Ավետիք Բուդաղյանը, իսկ նրա եղբայրը՝ ԼՂՀ N զորամասի հրամանատար Արտակ Բուդաղյանը վնասվածքներով տեղափոխվել էր հիվանդանոց:  2013թ. սեպտեմբերի 7-ին ՊՆ քննչական ծառայությունն ազատ արձակեց նրանց, դադարեցրեց նրա ու մարզպետի թիկնապահի՝ Զարզանդ Նիկողոսյանի նկատմամբ քրեական հետապնդումը: