HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Հայկ Կյուրեղյանի կարծիքով, իշխանությունը զավթված է, զավթված են նաև դատարանները

Վերաքննիչ քրեական դատարանն այսօր անփոփոխ թողեց Հայկ Կյուրեղյանի վերաբերյալ սեպտեմբերի 15-ի դատավճիռը, որով նա դատապարտվել էր 9 տարվա ազատազրկման: Նա մեղավոր էր ճանաչվել քրեական օրենսգրքի 316 և 258 հոդվածներով (իշխանության ներկայացուցչի նկատմամբ բռնություն և խուլիգանություն):

Դեպքը տեղի էր ունեցել անցյալ տարի հունիսի 12-ին Շանթ Հարությունյանի և մյուս քաղաքացիների գործով դատավարությունից առաջ: Կենտրոն և Նորք-Մարաշ ընդհանուր իրավասության դատարանի դիմաց Կյուրեղյանը բարձրացել էր դատարանի դիմաց կայանած մեքենաներից մեկի վրա, ապա օդամղիչ ատրճանակից մի քանի անգամ կրակել:

Ըստ քրեական գործի` տուժել էր 5 ոստիկան. նրանք ստացել էին թեթև մարմնական վնասվածքներ: Իր քայլը Կյուրեղյանը մեկնաբանել էր որպես բողոք` ուղղված քաղաքական դատավարությունների դեմ: Կենտրոն և Նորք-Մարաշ վարչական շրջանների ընդհանուր իրավասության դատարանում տեղի ունեցած  դատական պրոցեսի գրեթե ողջ ընթացքում ամբաստանյալը զրկված էր նիստերին ներկա գտնվելու իրավունքից` դատարանի նկատմամբ անհարգալից վերաբերմունք ցուցաբերելու պատճառաբանությամբ (Կյուրեղյանը ոտքի չէր կանգնում նիստերի ժամանակ):

Հայկ Կյուրեղյանը ոտքի չկանգնեց նաև այսօր` Վերաքննիչ քրեական դատարանում: Դատավորների հարցերին պատասխանում էր նստած: Ասաց, որ հրաժարվել է փաստաբան ունենալուց առհասարակ, քանի որ իրավական չի համարում դատարանները. «Մարդկանց փակելու գործիք է ընդամենը… իշխանությունը զավթված է, բնականաբար զավթված են նաև դատարանները»:

Կյուրեղյանն իր հետ բերել էր թղթի վրա գրված մի կարգախոս. «Կեցցե Հայաստանը, որը վաղն է գալու»: Իսկ դատավճռի անփոփոխ թողնելու մասին Վերաքննիչ դատարանի որոշումը նա ընդունեց ծափերով: Վերաքննիչ դատարանից նա պահանջել էր միայն արդարացում:

Դատախազ Վահե Ասատրյանը գտավ, որ Հայկ Կյուրեղյանի բողոքը պետք է մերժվի, քանի որ առաջին ատյանի դատարանի կայացրած դատավճիռն օրինական է: Դատախազի համոզմամբ, նշանակված 9 տարվա ազատազրկում պատիժը խիստ չէ. «Ողջամիտ պատժաչափ է, որով վերականգնվում է սոցիալական արդարությունը»,-ասաց մեղադրողը:

Կյուրեղյանը նշեց, որ չի տեսել այն տեսաերիզը, որը հետազոտվել է առաջին ատյանի դատարանում, չնայած գրել է դիմում և իրեն պատասխանել են, որ դեռ նախաքննության փուլում դեպքի օրը կատարված տեսաերիզը գործի նյութերի հետ տրամադրվել է կողմին: Հայկ Կյուրեղյանի պնդմամբ, տեսաերիզ գործի նյութերի մեջ չի եղել:

Ծրագրավորող Հայկ Կյուրեղյանի հայրը` Արմենակ Կյուրեղյանն ասաց, որ որևէ ակնկալիք չունեն հայաստանյան դատական ատյաններից` նշելով, որ  պարզապես պետք է սպառել դատական պաշտպանության բոլոր միջոցներն ու բողոքը տանել Մարդու իրավունքների եվրոպական դատարան: «Բացի այդ, Հայկը ևս մեկ անգամ ցանկացավ ցույց տալ, որ դատարանների սնանկությունը, որ այս դատարանները ոչինչ են, որ Հայաստանում դատական համակարգ գոյություն չունի, այն գործիք է այս իշխանավորների ձեռքին, որոնք տեռորի են ենթարկում ժողովրդին»,-ասաց Արմենակ Կյուրեղյանը:

Կյուրեղյանի հայրը գտնում է, որ մեր դատարաններ հրահանգը վերևից իջեցվում է և համապատասխան որոշումը կատարվում է. «Իսկ մարդն ինչպե՞ս պետք է պաշտպանվի: Հայկն ուղղակի իր ակցիայով ցույց էր տալիս, թե ինչպես պիտի մարդը պաշտպանվի նման ռեժիմից: Չեմ կարծում, որ Հայաստանի դատական համակարգում լինի մի դատավոր, ով կարողանա որոշում կայացնել իր խղճի թելադրանքով»,-ասաց Արմենակ Կյուրեղյանը:

Մեկնաբանություններ (2)

Սագո Կ.
Զօրը խոսինք զօրը թողնինք եղբայր, մինչ կոկորդնիդ աղտէղութիան մեջ կգտնիուք հոն
Մարտիկ
խայտառակությունը ու այլանդակությունը շարունակվում է, ի՞նչ է մտածում մեր հարգելի նախարարուհին

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։