HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Իտալիայից ժամանած քանդակագործները Շուշիում քանդակ են պատրաստելու ու նվիրելու քաղաքին

Ֆլորենցիայում բնկավող քանդակագործներ Վիգեն Ավետիսն ու Ֆլորենցիայի գեղարվեստի ակադեմիայի պրոֆեսոր, պոետ Մասսիմո Լիպպին քանդակ են նվիրելու Արցախին: Նրանք այսօր մեկնել են ԼՂՀ:

Մ. Լիպպին արդեն 5-րդ անգամ է լինելու Արցախում: Շուշիի մասին խոսելիս ասում է, որ այնտեղ հրեշտակների երկխոսությունն է լսում: «Ես եկել եմ՝ իմ կյանքը տալու ճշմարտության համար: Ճշմարտության համար եմ եկել: Իմ ձեռքերն արվեստի համար են եկել, սիրտս ու հոգիս՝ հայ ժողովրդի»,- ասում է նա:

Ծոցագրպանից հանում է նոթատետրն ու գրիչը, ինչ-որ գրառումներ անում: Պրոֆեսորի խոսքով՝ այսօր աշխարհում խաղաղություն չկա, պատերազմից պատերազմ անցումներ են: Ասում է, որ խաղաղությունը կորավ այն ժամանակ, երբ Կայենը Աբելին սպանեց:

«Իմ հայրենիքը նաև Հայաստանն է, ես նաև հայ եմ: Ես զգում եմ, որ իմ սիրելի ազգն այս պահին վտանգված է: Մի ազգ, որը մշակութային մեծ ներդրում ունի համաշխարհային պատմության մեջ: Եվ ես զգում եմ իմ եղբայրների կանչը, մարդկային և քրիստոնեական արժեքները»,- նշում է իտալացի քանդակագործը:

Ասում է՝ դուք 1900-ականներին արդեն 1,5 միլիոն մարդ եք կորցրել և այս մասին Հռոմի պապն էլ տեղյակ է պահել աշխարհին, ասել է, որ հայերը մարտիրոսացած ազգ են: Լիպպին նշում է, որ հիմա հայերը կրկին կանգնում են մարտիրոսանալու ճանապարհին: «Այսօր պատմական օր է, հետ գնալու ճանապարհ չկա: Ամբողջ աշխարհը կգնահատի ձեզ, ձեր մշակույթը, ձեր հայրենիքը,- շարունակում է նա, ապա ավելացնում,- եթե մոռանաք անցած արժեքները, կպարտվեք»:

Պրոֆեսոր Լիպպին կարծում է, որ հայերը նոր ժամանակի խաղաղություն ծնողներն են լինելու աշխարհում: Սա ասելուց հետո ժպտում է, հետո ասում՝ տես, թե ինչ լույսով է ողողված Երևանը, մարդիկ անցնում են՝ չնկատելով դա: Դարձյալ բացում է նոթատետրն ու շարունակում գրառումը: Նշում է, որ ինքը նաև մարդկության ցավերով ապրող պոետ է:

Վիգենը շարունակում է Մասիմո Լիպպիի խոսքը: Նա Շուշիում «Հակոբ Գյուրջյան» քանդակի միջազգային սիմպոզիումի հիմնադիր-նախագահն է: Սիմպոզիումն անցկացվել է 3 անգամ (առաջին անգամ՝ 2011-ին), որի արդյունքում քաղաքին նվիրել են 40 քանդակ:

Այս անգամ սիմպոզիումի ծրագրից դուրս Լիպպին, արցախցի քանդակագործ Արմեն Պետրոսյանն ու Վիգեն Ավետիսը մեկ քանդակ կանեն Շուշիի համար: Արմենն արդեն պատրաստել է քարերը, իսկ թե ինչ քանդակ կլինի, Վիգենն ասում է՝ իրավիճակը կհուշի, թե Արցախն այդ պահին ինչի կարիք կունենա:

Պատմում է, որ երբ 1992-ին Արցախ էր գնացել, այն ժամանակ էլ որոշել էր, որ Շուշիին քանդակներ է նվիրելու: Այն ժամանակ էլ ծնվել է սիմպոզիում է անցկացնելու միտքը:

«Այս պատերազմն արագացրեց ինչպես Արցախի ճանաչումը, այնպես էլ սիմպոզիումի կազմակերպումը»,- նշում է Վիգենը:

«Ժամանակը եկավ, ադրբեջանցիներն օգնեցին Արցախի ճանաչման վերջնական հարցը լուծելուն: Այսօր այն պահն է, որ համաշխարհային մակարդակով լուծվում է Արցախի ճանաչման խնդիրը»,- ասում է նա: Քանդակագործի կարծիքով՝ մինչև ապրիլի 1-ը Արցախի ճանաչման հարցը չէր բարձրացվում, իսկ դրանից հետո իրավիճակը փոխվել է:

«Այս անգամ գնում ենք ոչ միայն մեր արվեստը թողնենք, եթե Աստված կամենա, նաև մեր կյանքը թողնենք Արցախի ազատության համար: Մենք պատրաստ ենք ամեն գնով պաշտպանելու Արցախը»,- նշում է Վիգեն Ավետիսը:

Լուսանկարում ձախից՝ Վ. Ավետիսն ու Մ. Լիպպին

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter