Ինչպես տեղեկացնում են ֆրանսիական տարբեր պարբերականներ, ուրբաթ` լուսաբացին, ֆրանսիացի 300 ոստիկաններ Ֆրանսիայի հարավ-արեւելքում ձերբակալել են հայ եւ վրացի երկու տասնյակից ավելի հանցավոր մի խմբավորման անդամների, որոնք կասկածվում են հարյուրավոր խանութերում եւ առեւտրի կետերում կատարած գողությունների մեջ:

«Nouvelles d'Arménie»-ին տեղեկացնում է, որ քսաներեք կանայք եւ տղամարդիկ ձերբակալվել են առավոտյան ժամը վեցին միաժամանակ մի քանի քաղաքներում իրականացված «ռեյդի» արդյունքում:  Ձերբակալվածների թվում է նաեւ մաֆիոզ խմբավորման ղեկավարը:

Նախնական տվյալներն թե ձերբակալվածների թվում ռուսներ եւ չեչեններ կային, չեն հաստատվել:

Ձերբակալվածները չեն դիմադրել: Կրակ չի բացվել, վիրավորներ չկան:

Քննիչներն ընդգծում են գործողության կարեւորությունը՝ նշելով, որ գողությունները թունավորում են մարդկանց կյանքը:

Ձերբակալված խումբը հիմնականում գողանում էր զարդեղեն, գումար, լուսանկարչական խցիկներ կամ տնային այլ տեխնիկա, ինչպես նաեւ համակարգիչներ, հագուստ եւ այլն:

Առավել հաճախ խումբը գործում էր գյուղական վայրերում: Նրանք գործում էին թե' գիշերը եւ թե' ցերեկը` առանց բռնության գոծադրման, բնակիչների բացակայության ժամանակ:

Իրացման նպատակով զարդեղենն ուղարկվել է Բելգիա, իսկ գողոնի մնացած մասը՝ Կովկաս:

Հետաքննությանը մոտ կանգնած աղբյուրներից մեկի վստահեցմամբ՝ խմբավորման ղեկավարներն արդեն իսկ խնդիրներ էին ունեցել արդարադատության հետ: Երկար տարիներ Ֆրանսիայում նրանք սկսել էին «օգնական ձեռքեր» հավաքագրել, հիմնականում՝ ապաստան խնդրողների:

Ներկայումս կասկածյալները քննվում են շրջանի տարբեր ոստիկանատներում:

Քանի որ քննիչները գործ ունեն կազմակերպված հանցագործության հետ, նրանց 96 ժամ է հատկացված գործը դատարան ներկայացնելու համար: Դժվարություններից մեկը կասկածյալների իրական ինքնությունը հաստատելն է, քանի որ նրանք օգտագործում են կեղծ փաստաթղթեր: