Քիչ առաջ Վանաձորում տեղի ունեցող հանրահավաքին ընդդիմության առաջնորդ Նիկոլ Փաշինյանն անդրադարձել է ՀՀԿ-ի՝ վարչապետի թեկնածու չառաջադրելու որոշմանը:

«Սա վատ չէ, բայց լավ էլ չէ, և որպեսզի լավ լինի, «Հանրապետական» խմբակցությունը, կարծում եմ, ճիշտ կլինի, որ հայտարարի, որ այլ խմբակցությունների հետ համատեղ վարչապետի թեկնածու է առաջադրելու ժողովրդի թեկնածուին»,- ասել է Ն. Փաշինյանը:

Նա նշել է, որ պատրաստակամ է հանդիպել ՀՀԿ խմբակցության բոլոր պատգամավորներին միաժամանակ, որպեսզի հավաստիացնի նրանց, որ այդ գործընթացով փակում են ներհայաստանյան ատելության էջը:

«Եթե նրանք անեն իրենց քայլը՝ ՀՀԿ և մյուս խմբակցությունների պատգամավորները, դրանով կդառնան այդ պատմական նվաճման համահեղինակներ: Եվ ուզում եմ ևս մեկ անգամ ասել, որ հույս ունեմ՝ այլ քաղաքական գործիչներ չեն փորձի անգամ փորձել գողանալ ժողովրդի հաղթանակը, որովհետև դա կբերի այդ քաղաքական գործիչների և ուժերի դուրս մղմանը»,- հայտարարել է Փաշինյանը: