Մաքսիմ Մանուկյանը հռչակվեց Եվրոպայի չեմպիոն
Հունահռոմեական ոճի ըմբիշ, 82 կգ քաշային կարգում հանդես եկող Մաքսիմ Մանուկյանը Ռուսաստանի Կասպիյսկ քաղաքում ընթացող Եվրոպայի առաջնությունում նվաճեց չեմպիոնի տիտղոսը:
2016թ. աշխարհի չեմպիոն Մաքսիմ Մանուկյանը պայքարը սկսեց մայիսի 1-ին՝ 1/8 եզրափակիչ փուլից, որտեղ 6:0 հաշվով հաղթանակի հասավ խորվաթ մարզիկ Բոզո Ստարչևիչի նկատմամբ: Քառորդ եզրափակչում Մաքսիմ Մանուկյանը 5:2 հաշվով պարտության մատնեց բուլղարացի ըմբիշ Դանիել Ալեքսանդրովին և դուրս եկավ կիսաեզրափակիչ փուլ: Եզրափակչի ուղեգիրը Մանուկյանը վիճարկեց հունգարացի Լասլո Սաբոյի հետ և ոչ մի շանս չթողեց մրցակցին՝ առավելության հասնելով 8:0 հաշվով:
Այսօր կայացած եզրափակիչ գոտեմարտում Մաքսիմ Մանուկյանը մրցում էր բելառուս Վիկտար Սասունովսկու հետ և ջախջախիչ հաղթանակ տանելով 9:0 հաշվով՝ ժամանակից շուտ ավարտեց մարտն ու արժանացավ ոսկե մեդալի:
Այսօր մեդալ նվաճեց նաև Հայաստանը ներկայացնող ևս մեկ ըմբիշ: 67 կգ քաշային Կարեն Ասլանյանը բրոնզե մեդալի համար գոտեմարոտւմ 7:2 հաշվով պարտության մատնեց լեհ Դավիդ Կարեցինսկուն: Քիչ հետո ոսկե մեդալի համար մրցագորգ դուրս կգա նաև օլիմպիական չեմպիոն, 97 կգ քաշային Արթուր Ալեքսանյանը:
Ավելի վաղ մրցագորգ դուրս եկած հայաստանցի մյուս ըմբիշները՝ Արմեն Մելիքյանը (60 կգ), Սլավիկ Գալստյանը (63 կգ), Կարապետ Չալյանը (77 կգ) և Արթուր Շահինյանը (87 կգ) չէին կարողացել մրցանակային տեղեր զբաղեցնել:
Մեկնաբանել