HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ամալյա Մարգարյան

ԵՊՀ ուսանողները շարունակում են բողոքի ակցիան․ պահանջում են ռեկտորի հրաժարականը

ԵՊՀ ուսանողները շարունակում են փակ պահել ռեկտոր Արամ Սիմոնյանի աշխատասենյակի մուտքը: Նրանք պնդում են, որ համալսարանում կմնան այնքան ժամանակ, մինչև Արամ Սիմոնյանը հրաժարական ներկայացնի։ Ավելի վաղ հայտնել էինք, որ առավոտից ուսանողները դասադուլ էին հայտարարել։

ԵՊՀ ուսանողների պահանջով հանդիպում տեղի ունեցավ ռեկտորի և ուսանողների միջև, որտեղ նրանք բարձրաձայնեցին իրենց հուզող հարցերն ու ներկայացվող պահանջները։ Ուսանողներից մեկը հարց ուղղեց, թե ինչու են համալսարանի տարածքում խաղաղ ցուցարարներին ոստիկանության հատուկ ստորաբաժանման աշխատակիցները բերման ենթարկել, և ինչու են ոստիկանության աշխատակիցները մտել համալսարանի տարածք։

Արամ Սիմոնյանը պնդեց, որ այդ ամենը գալիս է անվտանգությունից, իսկ հիմնականում համալսարանի դռները փակ չեն լինում։

Ուսանողների պահանջներից մեկը հոգաբարձուների խորհրդի լուծարումն է, որի նախագահն է Սերժ Սարգսյանը, ռեկտորը պատասխանեց, որ այդ մարմինը կարգավորվել է Կառավարության կողմից, ինքը անդամ չէ, և Կառավարությունն է որոշում անդամներին, իսկ համալսարանում իրականացվելիք աուդիտի վերաբերյալ ռեկտորը նշեց, որ ամեն տարի համալսարանում կատարվում է այն։

«Առաջին անգամ ենք իմանում, որ համալսարանը նախատեսված է 7,5 հազար ուսանողի համար, բայց համալսարանում սովորում է 17 հազար: Ֆիզիկապես անհնար է այսպիսի պայմաններում ունենալ կրթական լավ որակ, էլ խոսքը չի գնում այլ բաների մասին: Համալսարանն ուղղակի եղել է գումար աշխատելու վայր»,- նշեց «ԵՊՀ ռեստարտ» նախաձեռնության հիմնադիր Դավիթ Պետրոսյանը։

Խոսելով նաև ռեկտորի այն հայտարարության մասին, թե Հայաստանում չկա տնտեսություն, արդյունաբերություն, Դավիթ Պետրոսյանը նշեց, որ այդ ամենը եղել է Հանրապետական կուսակցության պատճառով, որի անդամ է Արամ Սիմոնյանն արդեն 20 տարի։

Դավիթ Պետրոսյանը նշեց նաև, որ հոգաբարձուների խորհուրդը պետք է լուծարվի և այն ամենն, ինչ համալսարանում կապ ունի Հանրապետական կուսակցության հետ, պետք է լուծարվի։

Արամ Սիմոնյանն անդրադարձավ նաև ուսանողների հարցերին վարագույրներ ու օդորակիչներ չլինելու, գրքերի բացակայության մասին և նշեց, որ համալսարանի կառուցման ժամանակ օդափոխության համակարգը չի գործել, քանի որ այն փակվել է շինարարական աղբով, իսկ գրքերի բացակայությունը պայմանավորված է գումարի բացակայությամբ։

Ուսանողների հետ հանդիպումն Արամ Սիմոնյանը որակեց ոչ կառուցողական և փորձեց հեռանալ դահլիճից, սակայն ուսանողները փակեցին դռները և թույլ չտվեցին ռեկտորին դուրս գալ դահլիճից: Որոշ ժամանակ հետո, սակայն, նրանք բացեցին ճանապարհը և Արամ Սիմոնյանը գնաց աշխատասենյակ։

Արամ Սիմոնյանը լրագրողների հետ զրույցի ընթացքում նշեց, որ համալսարանում կան խնդիրներ, սակայն բռնի ուժով չի լուծվի խնդիրը։ Գնումների կատարման պայմանագրերը ներկայացրեց ռեկտորի աշխատակազմի ղեկավար Ալիկ Ղարիբյանը և պնդեց, որ 1 մլն դրամով աթոռների գնումը մեկ անգամ չի կատարվել, «գնել ենք 100 երկաթե աթոռ, բայց գրված է՝ ղեկավարի աթոռ, էստեղ թանկարժեք կահույք չկա, 12 տարվա կահույք է»,- հայտարարեց Արամ Սիմոնյանը։

Արամ Սիմոնյանը նշեց՝ ռեկտորի աշխատանքը անշնորհակալ աշխատանք է, առավոտից երեկո ինքը նստած է այնտեղ։

Նշեց նաև, որ ինքը հաջորդ ընտրությանը չի ներկայացնի իր թեկնածությունը, որովհետև չի ցանկանում, իսկ ռեկտորի ընտրության հարցը պետք է լուծվի իրավական հարթության վրա։ «Ուսանողներն այստեղ 200 հոգի են, իսկ մենք 17 հազար ուսանող ունենք։ Եթե 2000-3000 ուսանող պահանջի, որ հրաժարական տամ, ես կհրաժարվեմ։ Եթե զոռբայությամբ մի բան եղավ, ապա համալսարանը վերջացած է»,- հայտարարեց Արամ Սիմոնյանը։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter