HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Մանվել Գրիգորյանի կալանքի ժամկետը երկարացվեց

Ազգային ժողովի պատգամավոր Մանվել Գրիգորյանի կալանքի ժամկետը երկարացվել է ևս երկու ամսով: Այս մասին «Հետք»-ին ասաց Գրիգորյանի փաստաբան Լևոն Բաղդասարյանը:

Հատուկ քննչական ծառայության կողմից պատգամավորի կալանքը  երկարացնելու վերաբերյալ դատարան ներկայացված միջնորդությունը դարձյալ քննել և բավարարել է դատավոր Մարինե Մելքոնյանը: Նշենք, որ Գրիգորյանի նկատմամբ կալանքը որպես խափանման միջոց ընտրելու միջնորդությունն առաջին անգամ քննվել է Երևան քաղաքի ընդհանուր իրավասության դատարանի Նոր Նորքի նստավայրում` Մարինե Մելքոնյանի նախագահությամբ, ապա երկու ամիս անց նույն դատավորը կայացրել է Գրիգորյանի կալանքը երկու ամսով երկարացնելու վերաբերյալ որոշում:

Դատավոր Մելքոնյանը վերջերս տեղափոխվել է Երևան քաղաքի ընդհանուր իրավասության դատարանի Շենգավիթի նստավայր, և այս անգամ ևս Գրիգորյանի կալանքը հերթական անգամ երկարացնելու վերաբերյալ միջնորդության քննությունը մակագրվել է նրան:

Մեզ հետ զրույցում Գրիգորյանի պաշտպան Լևոն Բաղդասարյանը նշեց, որ իրենց կողմից միջնորդություն էր ներկայացվել նաև նրա խափանման միջոց կալանքը այլընտրանքային խափանման միջոց գրավով փոխարինելու վերաբերյալ, որը նույնպես մերժվել է:

Բաղդասարյանի խոսքով` իրենք գրավի չափ չէին նշել, դատական նիստի ընթացքում դատարանին ներկայացրել են Գրիգորյանի նկատմամբ նշանակված դատաբժշկական փորձաքննության եզրակացությունը:

Նշենք, որ փորձաքննության եզրակացությամբ Մանվել Գրիգորյանի մոտ մի շարք հիվանդություններ են եղել:

Մանվել Գրիգորյանին, հիշեցնենք, մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Ըստ Դատախազության տարածած հաղորդագրության՝ հունիսի 16-ին օրենքով սահմանված կարգով իրականացված խուզարկություններով Գրիգորյանին պատկանող կամ նրա փաստացի տիրապետության տակ գտնվող առանձնատներում, ավտոմեքենաներում, շենքերում, շինություններում կատարվել են 6 խուզարկություններ, որոնց արդյունքում հայտնաբերվել և վերցվել են մեծ քանակությամբ նռնակներ, հակատանկային ականանետներ, տրոիլային պայթաղյուսներ, ավելի քան 17.000 տարբեր տրամաչափի փամփուշտ, այլ ռազմամթերք ու հրազեն: Խուզարկությամբ հայտնաբերվել է նաև 71.760.000 ՀՀ դրամ, 80.000 ԱՄՆ դոլար, 67.350 եվրո, 246.500 ուկրաինական արժույթ: Բացի այդ, Արմավիրի մարզի Արշալույս գյուղի և Էջմիածին քաղաքի համապատասխան հասցեներում գտնվող շինություններում կատարված խուզարկությունների արդյունքում հայտնաբերվել է 33 տրանսպորտային միջոց, այդ թվում՝ «Ռոյս Ռոլս», «Տոյոտա Լանդ Կրաուզեր», «Մերսեդես», «Համմեռ»,  «Ռենջ ռովեռ սուպերչարջ», ինչպես նաև խորհրդային արտադրության՝ նաև կոլեկցիոն ավտոմեքենաներ, այդ թվում՝ զինվորական նշանակության տրանսպորտային միջոցներ:

Արմավիրի մարզի Արշալույս գյուղի համապատասխան հասցեում կատարաված խուզարկությամբ՝ կենդանիներ պահելու համար առանձնացված հատվածում հայտնաբերվել են Տավուշի մարզի Չորաթան գյուղի, Վերին Ծաղկավան գյուղի, Շիրակի մարզի Ախուրյանի, Երևանի մի քանի և Էջմիածնի դպրոցների աշակերտների և ուսուցիչների կողմից հավաքագրված գումարներով ապրիլյան քառօրյա պատերազմի մասնակիցների համար որպես օգնություն ուղարկված մեծ քանակությամբ պարկերով և արկղերով սննդամթերք, բժշկական և հիգիենայի պարագաներ, դեղորայք, զինվորական նախշերով պայուսակներ, տուփերով ներքնաշոր:

Հունիսի 16-ին Մանվել Գրիգորյանը ձերբակալվել է, ապա հունիսի 19-ին Ազգային ժողովի պատգամավորների քվեարկությամբ զրկվել պատգամավորական անձեռնմխելիությունից ու դատարանի որոշմամբ` կալանավորվել:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter