Ալեքսանդր Սարգսյանի որդու ընկերը՝ Դավիթ Սիմոնյանը, որը նրա դեմ ցուցմունք էր տվել, չի ընդունում թմրանյութերի իրացման գործով իրեն առաջադրված մեղադրանքը: Այսօր տեղի ունեցած դատական նիստին այս մասին ասաց ինքը՝ Սիմոնյանը:

Ըստ մեղադրանքի՝ Սիմոնյանը 2017թ. դեկտեմբերի 19-ին` ժամը 13:40-ի սահմաններում, իրացնելու նպատակով Էդուարդ Թոռնիկի Ղազարյանից ապօրինի ձեռք է բերել և պահել ընդհանուր 25.72 գրամ մարիխուաննա տեսակի թմրամիջոց, որից Գոռ Համբարձումյանին ապօրինի իրացրել է զգալի չափերով` 3.56 գրամ քաշով մարիխուաննա տեսակի թմրամիջոց և 0.015 գրամ բուսական մանրացված զանգվածի և ծխախոտի մասնիկների խառնուրդ, Լևոն Սերգեյի Գաբրիելյանին ապօրինի իրացրել է զգալի չափերով 0.42 գրամ քաշով մարիխուաննա տեսակի թմրամիջոց, իսկ մնացած 21.74 գրամ մարիխուաննա տեսակի թմրամիջոցը իրացման նպատակով ապօրինի պահել է իր վարած ավտոմեքենայում:

 Դատարանում քննվող գործի շրջանակներում ամբաստանյալի աթոռին են հայտնվել Դավիթ Սիմոնյանը, Էդուարդ Ղազարյանն ու Գոռ Համբարձումյանը:

Ամբաստանյալ Էդուարդ Ղազարյանին մեղադրանք է առաջադրվել այն բանի համար, որ նա, չպարզված ժամանակ և հանգամանքներում, իրացնելու նպատակով քննությամբ չպարզված անձից ապօրինի ձեռք է բերել և  պահել առանձնապես խոշոր չափերով բուպրենորֆին, հաշիշ և  մարիխուաննա տեսակի թմրամիջոցներ, որից խոշոր չափերով ապօրինի իրացրել է Դավիթ Սիմոնյանին: Ղազարյանը ևս իրեն առաջադրված մեղադրանքը չընդունեց:

Ամբաստանյալ Գոռ Համբարձումյանը մեղադրվում է Քրեական օրենսգրքի 268-րդ հոդվածի 1-ին մասով, այն է՝ թմրամիջոցների և հոգեմետ նյութերի ապօրինի շրջանառություն առանց իրացնելու նպատակի: Այս արարքը ենթակա է համաներման՝ համաձայն «Էրեբունի-Երևանի» հիմնադրման 2800-ամյակի և Հայաստանի առաջին Հանրապետության անկախության 100-ամյակի առթիվ» հայտարարված «Համաներման մասին» օրենքի:

Համբարձումյանի պաշտպան Էմին Խաչատրյանը դատարանին միջնորդեց իր պաշտպանյալի նկատմամբ համաներում կիրառել, և դատարանը բավարարեց միջնորդությունը:

Նշենք, որ  Դավիթ Սիմոնյանին և Էդուարդ Ղազարյանին մեղսագրվող արարքը՝ «թմրամիջոցների, հոգեմետ նյութերի և դրանց պրեկուրսորների ապօրինի շրջանառությունն իրացնելու նպատակով կամ դրանց ապօրինի իրացնելը», համաներման ենթակա չէ:

Դատարանն այսօր սահմանեց գործով ապացույցների հետազոտման հաջորդականությունը, համաձայն որի՝ նախ կհետզոտվեն առկա ապացույցներն, ապա կհարցաքննվեն ամբաստանյալները:

Նշենք, որ թեև Սիմոնյանն այս գործի շրջանակներում ազատության մեջ է,  դատարան է բերվել Ոստիկանության 6-րդ վարչության աշխատակիցների կողմից: Բանն այն է, որ Ալեքսանդր Սարգսյանի որդու՝ սպանության փորձի վերաբերյալ գործի շրջանակներում, որում Սիմոնյանը տուժողի կարգավիճակ ունի, նրա նկատմամբ պաշտպանության միջոց է կիրառվել: Վերջինս լրագրողների հետ զրույցում հայտնել է, որ անհանգստանում է իր անվտանգության համար:

Սիմոնյանը 2017 թվականից թմրանյութերի ապօրինի շրջանառության վերաբերյալ վերը նշված գործով գտնվելիս է եղել կալանքի տակ:

Հայաստանում տեղի ունեցած իշխանափոխությունից հետո նա հանցագործության մասին հաղորդում է տվել իր ընկերոջ` Հայկ Սարգսյանի դեմ՝ նշելով, թե վերջինս 11 տարի առաջ փորձել է իրեն սպանել, և  որոշ ժամանակ անց թմրանյութի ապօրինի շրջանառության գործով նրա խափաման միջոց կալանավորումը փոխվել է չհեռանալու մասին ստորագրությամբ: