HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Քարոզարշավն ավարտվեց. ինչպես այն անցկացրին ընտրապայքարին մասնակցող ուժերը

Այսօր նախընտրական քարոզարշավի վերջին օրն էր, մի շարք քաղաքական ուժեր, Սպիտակի երկրաշարժի 30-րդ տարելիցի օրը հարգելով զոհերի հիշատակը, քարոզարշավ չեն իրականացրել, որոշ քաղաքական ուժեր, այնուամենայնիվ, օգտվել են քարոզարշավի վերջին օրն օգտագործելու հնարավորությունից, որոշներն էլ քարոզարշավն ամփոփել են մամուլի ասուլիսներով: «Հետք»-ն էլ իր հերթին է ամփոփում 12-օրյա քարոզարշավի ընթացքը: 

Երջանիկ անհատ, հոգատար հանրություն, հզոր պետություն

«Իմ քայլը» դաշինքը գլխավորող վարչապետի պաշտոնակատար Նիկոլ Փաշինյանի արձակուրդը դեկտեմբերի 5-ին ավարտվել էր, դեկտեմբերի 6-ին նա մեկնեց Սանկտ Պետերբուրգ և մասնակցեց Եվրասիական բարձրագույն տնտեսական խորհրդի նիստին, ինչպե նաև ԱՊՀ մասնակից պետությունների ղեկավարների ոչ ֆորմալ հանդիպմանը, իսկ արդեն այսօր կառավարության ղեկավարը մեկնել է Գյումրի, անցկացրել կառավարության արտահերթ նիստ, ինչպես նաև հարգանքի տուրք մատուցել երկրաշարժի զոհերի հիշատակին:

Քարոզարշավի օրերին Փաշինյանը հասցրեց լինել հանրապետության բոլոր մարզերում, այնուհետև շրջեց Երևանում: Իր ելույթների ընթացքում նա հիմնականում խոսում էր իր կառավարման ընթացքում գրանցված արդյունքներից, հետագա անելիքներից, ինչպես նաև մշտապես քննադատում էր նախկին իշխանություններին: Արցախի իշխանություններին ուղղված սթափության կոչը կարելի է համարել Փաշինյանի ամենաքննարկված ելույթը:

Առաջինը՝ Հայաստան

«Հանրապետություն» և «Ազատ դեմոկրատներ» կուսակցություններից կազմավորվեց «Մենք» դաշինքը, որը գլխավորեց Արամ Սարգսյանը: Վերջինս այսօր Գյումիրում հարգանքի տուրք է մատուցել երկրաշարժի զոհերի հիշատակին, իսկ դաշինքի համապետական ցուցակի երկրորդ համար Խաչատուր Քոքոբելյանը թիմակիցների հետ շարունակել է քարոզարշավը Երևանում:

«Մենք» դաշինքը ակտիվ քարոզչություն է իրականացրել մարզերում և մայրաքաղաք Երևանում: Նրանք հանդես են գալիս արևմտամետ քաղաքական դիրքորոշմամբ: Դաշինքը հայտարարել է, որ ԱԺ անցնելու դեպքում լինելու է իշխանության հիմնական ընդդիմախոսը, նրանք կարծում են, որ հեղափոխությունից հետո ստվերային տնտեսությունն ու մենաշնորհները չեն վերացել, և անհրաժեշտ է պայքարել դրանց դեմ: Ըստ «Մենք» դաշինքի՝ Հայաստանի տնեսությունը պետք է հենվի բնական պաշարների օգտագործման վրա, որոնք կարող են շոշափելի եկամուտներ բերել պետությանը:

Եթե մտահոգ ես, ընտրի՛ր հանրապետականին

Հայաստանի հանրապետական կուսակցությունը (ՀՀԿ) իր ամբողջ քարոզչությունը կառուցել էր Նիկոլ Փաշինյանի կառավարությանը և հատկապես Փաշինյանին քննադատելու վրա, իսկ իր քարոզչական պաստառներում օգտագորրծել է սև և սպիտակ գույները՝ նկատի ունենալով Երևանի ավագանու ընտրություններում արված հայտնի հայտարարությունները:

ՀՀԿ-ն «Նիկոլի ստերը» խորագրով տեսանյութերի շարք է պատրաստել, որտեղ մատնանշել է Նիկոլ Փաշինյանի՝ ընդդիմադիր և վարչապետ եղած ժամանակներում արված հայտարարությունների տարբերությունը: ՀՀԿ-ում կարծում են, որ միայն իրենց կուսակցությունը կարող է լինել իրական ընդդիմություն:

Շատերի համար անակնկալ էր Դավիթ Շահնազարյանի հայտնվելը ՀՀԿ համապետական ցուցակում (3-րդ համար): Շահնազարյանը ՀՀԿ քարոզչության ամենաակտիվ դեմքերից էր, ով հեղափոխությունը անվանեց չարիք, իսկ Նիկոլ Փաշինյանին մեղադրեց «իշխանություն՝ Արցախի դիմաց» քաղաքական ծրագիրը իրականացնելու մեջ, և այս հայտարարության համար հրավիրվեց ԱԱԾ բացատրություն տալու, սակայն Շահնազարյանը այդպես էլ չգնաց ԱԱԾ:

ՀՀԿ համապետական ցուցակը գլխավորում է պաշտպանության նախկին նախարար Վիգեն Սարգսյանը:

Ապագան ՔՈնն է

Նորաստեղծ «Քաղաքացու որոշում» (ՔՈ) սոցիալ-դեմոկրատական կուսակցությունը այսօր քարոզարշավ է արել Գեղարքունիքի մարզում, իսկ երեկոյան Երևանում՝ Մաշտոցի պուրակում ամփոփել է քարոզարշավը: ՔՈ-ն հանդես է գալիս համընդհանուր բարեկեցության պետություն և համերաշխ հասարակություն կառուցելու նախաձեռնությամբ:

ՔՈ-ն ընտրարշավի ընթացքում նաև քաղաքական ուժերին փոխադարձ համաձայնագիր կնքելու և ընտրվելու դեպքում սահմանադրության փոփոխության նախաձեռնությանը աջակցելու առաջարկ ներկայացրեց, որին միացան միայն «Սասնա ծռեր» և «Ազգային առաջընթաց» կուսակցությունները:

ՔՈ-ի անդամները քարոզարշավ են իրականացրել Երևանի փողոցներում և հանրապետության տարբեր համայնքներում: Մանդարինը դարձել էր կուսակցության նախընտրական խորհրդանիշը:

ՔՈ-ի համապետական ցուցակի առաջին համարը Սուրեն Սահակյանն է:

Լուսավորի՛ր Հայաստանը

«Լուսավոր Հայաստան» կուսակցությունը (ԼՀԿ) այսօր քարոզարշավ չի իրականացրել, այլ եղել է աղետի գոտու համայնքներում՝ հարգանքի տուրք մատուցելով երկրաշարժի զոհերի հիշատակին:

ԼՀԿ-ն՝ ի դեմս համապետական ցուցակի առաջին համար Էդմոն Մարուքյանի բազմիցս հայտարարել է, որ իրենք հավակնում են 7-րդ գումարման Ազգային ժողովում լինել երկրորդ քաղաքական միավորը և փոխզսպող ուժ լինել իշխանությանը:

Քարոզարշավը մարզերում գլխավորում էր Մարուքյանը, իսկ Երևանում կուսակցության փոխնախագահ, համապետական ցուցակի երկրորդ համար Մանե Թանդիլյանը:

ԼՀԿ-ն իր տեսլականը համարում է հավասար հնարավորություններով և արդիականացված Հայաստանի կառուցումը, որտեղ մարդը ոչ թե միջոց է, այլ նպատակ:

Մեր խոսքը գործ է

Ինչպես և նախկինում, այս ընտրություններին ևս «Բարգավաճ Հայաստան» կուսակցության (ԲՀԿ) քարոզարշավի ամբողջ բեռը իր ուսերին էր վերցրել կուսակցության առաջնորդ Գագիկ Ծառուկյանը, ով այսօր Աբովյանի եկեղեցում մասնակցել է երկարաշարժի զոհերի հիշատակին մատուցված պատարագին:

Ծառուկյանը իր քարոզարշավի համար հիմնականում ընտրում էր հանրապետության խոշոր համայնքները և իր ելույթները կառուցում էր սոցիալ-տնտեսական թեմաների վրա՝ հատկապես երիտասարդներին աշխատանքով և բնակարանով ապահովելու, բանկային համակարգի փոփոխության, կենսաթոշակների բարձրացման և ներդրումային միջավայրի բարելավման:

Իր ելույթների ընթացքում Գագիկ Ծառուկյանը մի քանի անգամ շեշետել է, որ ինքը շարունակելու է իրականացնել իր ծրագրերը, նույնիսկ եթե ԲՀԿ-ն խորհրդարանում չհայտնվի:

Բարեկեցիկ հայրենիքի հիմքում ընկած է աղքատության վերացումը

Քաղաքագետ Լևոն Շիրինյանի գլխավորած «Քրիստոնեա-ժողովրդական վերածնունդ» կուսակցության նպատակը արդյունաբերությամբ և գիտությամբ վերականգնված Հայաստանն է՝ հիմնված ազգային արժեքների վրա: Կուսակցությունը մեծ տեղ է տալիս նաև ֆինանսական համակարգի փոփոխությանը և լայնածավալ ճանապարհաշինությանը, որոնցով էլ պայմանավորված կլինի արդյունաբերության զարգացումը:

ՔԺՎԿ-ն այդքան էլ ակտիվ քարոզչություն չիրականացրեց, սակայն հասցրեց բացի Երևանից լինել նաև հանրապետության մի քանի համայնքներում:

Ժամանակն է

«Սասնա ծռեր» կուսակցոթյունը այսօր առավոտյան համապետական ցուցակի առաջին համարների գլխավորությամբ Գյումրիում հարգանքի տուրք է մատուցել երկարաշարժի զոհերի հիշատակին, ապա Երևանում հանդես է եկել ամփոփիչ մամուլի ասուլիսով:

Կուսակցությունը ակտիվ քարոզչություն է իրականացրել ինչպես Երևանում, այնպես էլ հանրապետության մարզերում: «Սասնա ծռեր» կուսակցությունը 7-րդ գումարման Ազգային ժողովը դիտարկում է որպես անցումային և կարծում է, որ այն երկու տարվա կյանք է ունենալու: Այս հայտարարությունը Նիկոլ Փաշինյանի կողմից շատ կոշտ քննդատության էր արժանացել: Այնուամենայնիվ, ըստ «Սասնա ծռեր»-ի, անցումային խորհրդարանը նախադրյալներ է ստեղծելու ազգային պետության ստեղծման և նրա թռիչքային զարգացման համար:

Կուսակցության ներկայացուցիչները բազմիցս իրենց ելույթներում նշել են, որ «Մարտի 1»-ի կոալիցիոն ուժերը՝ ի դեմս ՀՀԿ-ի, չպետք է լինեն խորհրդարանում, և «հայրենիքը կեղեքած» բոլոր մարդիկ պետք է կանգնեն անցումային արդարադատության առաջ:

«Սասնա ծռեր»-ը հանդես է գալիս Արցախը Հայաստանի Հանրապետությանը միացնելու գաղափարի օգտին: Կուսակցության ցուցակը գլխավորում է Վարուժան Ավետիսյանը:

Հավատարիմ հողին ու հային

Հայ հեղափոխական դաշնակցությունը (ՀՅԴ) քարոզարշավի շրջանակներում մի արք հանրահավաքներ և համերգներ կազմակերպեց տարբեր համայնքներում և Երևանի վարչական շրջաններում: Դաշնակցությունը հանդես է գալիս ազգային արժեքների պահպանման, առանց զիջումների զարգացման և սոցիալական արդարության դիրքերից:

Նոր իրավիճակ, նոր լուծումներ

Հարգելով երկրաշարժի զոհերի հիշատակը՝ «Ազգային առաջընթաց» կուսակցությունը այսօր քարոզարշավ չարեց և հորդորեց մյուս քաղաքական ուժերին հետևել իր օրինակին:

«Ազգային առաջընթաց»-ը ընտրապայքարին մասնակցող միակ քաղաքական ուժն է, որի համապետական ցուցակը կին է գլխավորում՝ ի դեմս Լուսինե Հարոյանի:

Կուսակցոթյունը վստահ է, որ հաղթահարելու է անցողիկ 5 տոկոսանոց շեմը և հայտնվելու է խորհրդարանում:

Օրինականություն, արդարություն, ապահովություն

«Օրինաց երկիր» կուսակցությունը (ՕԵԿ) Արթուր Բաղդասարյանի գլխավորությամբ այսօր ամփոփիչ մամուլի ասուլիսով է հանդես եկել: Մինչ այդ՝ քարոզարշավի նախորդ օրերին Բաղդասարյանը ակտիվ քարոզչություն է իրականացրել ամբողջ հանրապետությունում:

Արթուր Բաղդասարյանը իր ելույթներում մշտապես ասել է, որ իր գլխավորած կուսակցությունը Հայաստանում 250 օրենքների հեղինակ է, ինչպես նաև հայտարարել է ավանդների վերադարձի, պրոֆեսիոնալ բանակ կառուցելու, և նույնիսկ «Նաիրիտ»-ի և Վանաձորի «Քիմպրոմ»-ի վերագործարկման ռազմավարական ծրագրերի մասին:

Հավելենք նաև, որ դեկտեմբերի 5-ին Հանրայինի եթերում բանավեճ տեղի ունեցավ ընտրապայքարին մասնակցող ուժերի առաջին համարների ձևաչափով:

Հրապարակման ենթավերնագրերում նշված են քաղաքական ուժերի նախընտրական կարգախոսները

Լուսանկարը՝ ԼՀԿ-ի ՖԲ էջից

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter