«Ռուսական պղնձաձուլական ընկերություն»-ը չի մեկնաբանում Թեղուտի հանքավայրի վերագործարկման լուրը: Այսպես է արձագանքել ընկերությունը «Հետք»-ի գրավոր հարցադրումներին:

Հիշեցնենք, որ նոյեմբերի 26-ին մամուլը գրեց, թե հանքի սեփականատեր դարձած «ՎՏԲ բանկ»-ը համաձայնության է եկել Ռուսաստանում իր հզորությամբ երկրորդ՝ «Ռուսական պղնձաձուլական ընկերության» հետ: Ընկերության, «ՎՏԲ բանկ»-ի, ռուսաստանաբնակ հայազգի գործարար Նորայր Պետրոսյանի և կառավարության միջև պայմանավորվածություն է ձեռք բերվել հանքը վերագործարկելու մասին։

Գործարար Պետրոսյանը տարօրինակ հայտարարություններ է արել բնակիչների հետ հանդիպման ժամանակ: Նախ՝ նա ասել է, որ «ՎՏԲ-բանկ»-ին թողած 380 միլիոն դոլարի պարտքի պայմաններում դժվար է հանքից եկամուտ ակնկալել, երկրորդ՝  Թեղուտի այսօրվա պաշարները չեն հերիքում «ՎՏԲ-բանկ»-ի պարտքը փակելու համար: Այստեղից պարզ հարց է առաջանում, թե ինչու պիտի ռուսական ընկերությունը շահագրգռված լինի վերագործարկել Թեղուտի հանքը:

«Անկախ նրանից, թե մենք դրա մեջ փող ունենք, թե չունենք, մենք դա պետք է վերաթողարկենք»,- ասել է ռուսաստանաբնակ գործարարը՝ մի քանի անգամ շեշտելով, որ դա խոստացել է նաև վարչապետ Նիկոլ Փաշինյանին:

Նախ՝ հասկանանք, թե ինչ է իրենից ներկայացնում ռուսական պղնձաձուլական ընկերությունը, որի անունը շրջանառվում է այս պատմության մեջ:

Ռուսական պղնձաձուլական ընկերությունը՝ նույն «Русская медная компания»-ն, հիմնադրվել է 2004 թվականին: Ակտիվներ և հանքավայրեր ունի ՌԴ մի քանի տարածաշրջաններում՝ Չելյաբինսկում, Սվերդլովսկում, Օրենբուրգում և Նովգորոդսկում: 885 մլն դոլարի ներդրում է կատարել նաև Ղազախստանի հանքարդյունաբերության մեջ:  

ՌԴ ընկերությունների գրանցման ռեգիստրի փաստաթղթի համաձայն՝ «Ռուսական պղնձաձուլական ընկերության» 99,7 % բաժնետերը Կիպրոսում գրանցված Tilia Holdings Limited-ն է:

Կիպրոսից էլ ձեռք բերեցինք ընկերության վերաբերյալ փաստաթղթերը, որի համաձայն՝ Tilia Holdings Limited-ի միակ բաժնետերն էլ Վիրջինյան կղզիներում գրանցված Russian Copper Company Ltd-ն է:

Այս օֆշորում բաժնետերերի մասին ինֆորմացիան փակ է: Սակայն «Ֆորբս»-ի տվյալներով՝ այս ընկերության խոշոր բաժնետեր է մուլտիմիլիոնատեր Իգոր Ալտուշկինը՝ ՌԴ նախագահ Վլադիմիր Պուտինի մտերիմը: 2017թ. մայիսին ՌԴ նախագահ Վլադիմիր Պուտինը նրան պարգևատրել է «Բարեկամության շքանշան»-ով:

«Ռուսական պղնձաձուլական ընկերություն»-ը ներկայանում է որպես երկրորդ խոշոր արդյունահանող, ով հետզհետե ընդլայնում է հաքարդյունաբերության իր աշխարհագրությունը: Սակայն Թեղուտի պատմության կրկնությունը եղել է նաև Չելյաբինսկում 2017-ին, երբ ընկերությունը որոշել է շահագործել Չելյաբինսկ քաղաքից 12 կմ հեռավորության վրա գտնվող Տոմինյան հանքարդյունաբերական գործարանը: Նախագծի իրականացման համար 3000 հա անտառ պետք է հատվեր: novayagazeta.ru-ն մանրամասն անդրադարձել է Չելյաբինսկի նախագծին, որի շինարարության մեկնարկի համար ընկերությունը թույլտվություն չի ունեցել: Հանրային քննարկումներին տեղի ակտիվիստների մուտքը սահմանափակվել է, նրանց ծեծի են ենթարկել, գործարանի կառուցման դեմ ստորագրահավաք է կազմակերպվել, նույնիսկ ակտիվիստներին զանգահարել է անձամբ նախագահ Վ. Պուտինը:

Դեռևս նոյեմբերի 27-ին, այսինքն՝ 15 օր առաջ, զանգահարեցինք «Ռուսական պղնձաձուլական ընկերություն», որպեսզի ճշտենք տարածված տեղեկատվությունը: Ընկերության լրատվական բաժնից ասացին, որ հարցերը գրավոր ուղղենք, և խոստացան մեկ օրվա ընթացքում պատասխանել գրավոր հարցերին:

«Ռուսական պղնձաձուլական ընկերության»-ը գրավոր ուղղեցինք հետևյալ հարցերը.

1. Նրանք կարող են հաստատել կամ ժխտել լրատվամիջոցների տարածած այն տեղեկությունը, որ «Ռուսական պղնձաձուլական ընկերություն»-ը ցանկանում է վերագործարկել Թեղուտի հանքավայրը,
2. սկսվել են արդեն բանակցություններ դրա շուրջ, և ինչ արդյունքներ կան առ այսօր,
3. ինչպես է լուծվելու «Թեղուտ» ՓԲԸ-ի՝ «ՎՏԲ-բանկ»-ում ունեցած վարկերի հարցը,
4. ինչպես է «Ռուսական պղնձաձուլական ընկերություն»-ը պատրաստվում լուծելու պոչամբարի հարցը,
5. ով է Բրիտանական Վիրջինյան Կղզիներում գրանցված Russian Copper Company Ltd-ի իրական բաժնետերը:
   
   
   

   Թեղուտի հանքավայրի պոչամբարը

Եվ ի վերջո, մի քանի անգամ զանգահարելուց և կրկին էլեկտրոնային մեյլին հիշեցում ուղարկելուց հետո այսօր «Ռուսական պղնձաձուլական ընկերություն»-ը պատասխանեց մեր հարցմանը, որ «ընկերությունը չի մեկնաբանում այդ տեղեկությունը»: