Տեսանյութեր
Լուսանկարներ
Հունվարի 9-ին Բագրատաշենի վարչական ղեկավարն ու բնակիչները հանդիպում կունենան. բողոքի ակցիան այսօր դադարեցվել է
Տավուշի մարզի Այրում համայնքի Բագրատաշեն բնակավայրի բնակիչներն այսօր դադարեցրել են բողոքի ակցիան: Վաղը՝ ժամը 14:00-ին, նախատեսվում է համայնքի բնակիչների և վարչական ղեկավար Արկադի Մակյանի հանդիպումը՝ հասկանալու համար, թե բնակիչների մեծամասնությունն ինչ է պահանջում, ցանկանո՞ւմ է, որ վարչական ղեկավարի պարտականությունները շարունակի իրականացնել Արկադի Մակյանը, թե ոչ:
Այս մասին «Հետք»-ին ասաց Այրում համայնքի ղեկավար Արայիկ Պարանյանը: Վերջինիս խոսքով՝ Արկադի Մակյանը գուցե որոշակի բացթողումներ ունի, սակայն համայնքի խնդիրներն, այնուամենայնիվ, լուծվում են, պարզապես դրա համար ժամանակ է պետք:
Պարանյանը նշեց նաև, որ այս պահին համայնքապետարանը չի աշխատում, իսկ վարչական ղեկավարը կշարունակի ղեկավարել, թե ոչ՝ պարզ կդառնա վաղվա հանդիպումից հետո:
Հիշեցնենք, որ այսօր առավոտյան մի խումբ քաղաքացիներ բողոքի ակցիա էին սկսել ընդդեմ Բագրատաշենի վարչական ղեկավար Արկադի Մակյանի: Ակցիայի մասնակիցները փակել էին համայնքապետարանի վարչական շենք տանող մուտքի դուռը և պահանջում էին, որ նա ազատման դիմում գրի, քանի որ չի աշխատում:
Մեկնաբանել