Վերաքննիչ քրեական դատարանում այսօր շարունակվում է Մանվել Գրիգորյանին գրավի դիմաց ազատ արձակելու որոշման դեմ Դատախազության ներկայացրած բողոքի քննությունը: Դատարանի դիմաց նորից բողոքի ակցիա է: Էջմիածինցիները հավաքվել ու պահանջում են Գրիգորյանին կալանավորել:

Նշենք, որ այստեղ է նաև Փաստաբանների պալատի նախագահ Արա Զոհրաբյանը: Գրիգորյանի խափանման միջոցի գործով նախորդ՝ հունվարի 11-ի դատական նիստի ընթացքում բողոքի ակցիայի մասնակիցները թքել էին Գրիգորյանի փաստաբան Արսեն Մկրտչյանի մեքենայի վրա ու, վերջինիս պնդմամբ, դրա վրա հեղուկ լցրել: Փաստաբանների պալատի նախագահն ու մի քանի այլ փաստաբան եկել են դատարան՝ ի աջակցություն Արսեն Մկրտրյանի: Զոհրաբյանը քիչ առաջ զրույց ունեցավ ակցիայի մասնակիցներից Ջիվան Աբրահամյանի հետ, որից հետո պայմանավորվածություն ձեռք բերվեց՝ փաստաբանին չթիրախավորելու:

Նշենք, որ նախորդ դատական նիստի ընթացքում բողոքի ակցիայի մասնակիցները Արսեն Մկրտչյանի հետևից վանկարկում էին «տուշոնկի փաստաբան»: Այժմ փոխվել է այն, որ նրանք վանկարկում են «Մանվել տուշոնկա»:

Հիշեցնենք նաև, որ Մանվել Գրիգորյանին մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Ըստ Դատախազության տարածած հաղորդագրության՝ հունիսի 16-ին օրենքով սահմանված կարգով իրականացված խուզարկություններով Գրիգորյանին պատկանող կամ նրա փաստացի տիրապետության տակ գտնվող առանձնատներում, ավտոմեքենաներում, շենքերում, շինություններում կատարվել են 6 խուզարկություններ, որոնց արդյունքում հայտնաբերվել և վերցվել են մեծ քանակությամբ նռնակներ, հակատանկային ականանետներ, տրոիլային պայթաղյուսներ, ավելի քան 17 000 տարբեր տրամաչափի փամփուշտ, այլ ռազմամթերք ու հրազեն:

Խուզարկությամբ հայտնաբերվել է նաև 71 760 000 դրամ, 80 000 ԱՄՆ դոլար, 67 350 եվրո, 246 500 ուկրաինական արժույթ: Բացի այդ, Արմավիրի մարզի Արշալույս գյուղի և Էջմիածին քաղաքի համապատասխան հասցեներում գտնվող շինություններում կատարված խուզարկությունների արդյունքում հայտնաբերվել է 33 տրանսպորտային միջոց, այդ թվում՝ «Ռոյս Ռոլս», «Տոյոտա Լանդ Կրաուզեր», «Մերսեդես», «Համմեռ», «Ռենջ ռովեռ սուպերչարջ», ինչպես նաև խորհրդային արտադրության՝ նաև կոլեկցիոն ավտոմեքենաներ, այդ թվում՝ զինվորական նշանակության տրանսպորտային միջոցներ:

Արմավիրի մարզի Արշալույս գյուղի համապատասխան հասցեում կատարված խուզարկությամբ՝ կենդանիներ պահելու համար առանձնացված հատվածում հայտնաբերվել են Տավուշի մարզի Չորաթան գյուղի, Վերին Ծաղկավան գյուղի, Շիրակի մարզի Ախուրյանի, Երևանի մի քանի և Էջմիածնի դպրոցների աշակերտների և ուսուցիչների կողմից հավաքագրված գումարներով ապրիլյան քառօրյա պատերազմի մասնակիցների համար որպես օգնություն ուղարկված մեծ քանակությամբ պարկերով և արկղերով սննդամթերք, բժշկական և հիգիենայի պարագաներ, դեղորայք, զինվորական նախշերով պայուսակներ, տուփերով ներքնաշոր:

Հունիսի 16-ին Մանվել Գրիգորյանը ձերբակալվել է, ապա հունիսի 19-ին Ազգային ժողովի պատգամավորների քվեարկությամբ զրկվել պատգամավորական անձեռնմխելիությունից ու դատարանի որոշմամբ կալանավորվել: Դեկտեմբերի 21-ին դատարանը բավարարել է Գրիգորյանին գրավի դիմաց ազատելու վերաբերյալ պաշտպանների միջնորդությունը, և դրա դեմ Դատախազությունը բողոք է տարել, որն այսօր քննվում է Վերաքննիչ դատարանում: