Խորեոգրաֆիայի պետական թատրոնի նախկին տնօրեն Գայանե Կարապետյանի փաստաբանը պնդում է, որ իր վստահորդի իրավունքները խախտվել են, եւ որ մշակույթի նախարարի ժամանակավոր պաշտոնակատար Նազենի Ղարիբյանը զրպարտում է նրան։

Հիշեցնենք, որ նախորդ տարեվերջին մշակույթի նախարարը հրաման է արձակել Գայանե Կարապետյանին «Խորեոգրաֆիայի պետական թատրոն» ՊՈԱԿ-ի տնօրենի պաշտոնից ազատելու մասին, իսկ Կարապետյանը պնդում է, որ իրեն չեն ծանուցել ազատման մասին, եւ որ ամեն ինչ անօրինական է։ Կարապետյանը չի լքում թատրոնի տարածքը։ Ավելին, այնտեղ բնակվում են նաեւ նրա շները։ Նա ասում է, որ տարիներ շարունակ ներդրումներ է արել շենքում, եւ տարածքը պետք է գոնե մի 10-15 տարի էլ մնա իր տիրապետության տակ։

Մշակույթի նախարարությունը փորձում է Կարապետյանին հանել տարածքից։ 2018 թվականի դեկտեմբերի 28-ից աշխատանքից ազատված Կարապետյանը նաեւ հրաժարվում է հանձնել ՊՈԱԿ-ի կնիքը, ինչպես նաեւ մի շարք փաստաթղթեր։

Նախարարությունը դիմել է Գլխավոր դատախազություն, իսկ Գայանե Կարապետյանը դատական հայց է ներկայացրել գերատեսչության դեմ։

Գայանե Կարապետյանի շահերի ներկայացուցիչ, փաստաբան Աշխեն Դաշյանը համարում է, որ Նազենի Ղարիբյանի կողմից շարունակաբար խախտվում են իր վստահորդի իրավունքները։ Ըստ Դաշյանի՝ Կարապետյանը կանգնած է իր դատական պաշտպանության իրավունքի խոչընդոտման, հանրային բացասական կարծիքի ձեւավորման եւ հեղինակազրկման առաջ։

«Գայանե Կարապետյանն  իր ամուսնու՝ ռեժիսոր եւ դերասան Ռաֆայել Գրիգորյանի հետ 8 տարի առաջ հրավիրվել է Հայաստան, հաղթող է ճանաչվել «Խորեոգրաֆիայի պետական թատրոն» ՊՈԱԿ տնօրենի թափուր հաստիքի համալրման նպատակով Մշակույթի նախարարության կողմից հայտարարված մրցույթի արդյունքում եւ նշանակվել այդ կառույցի տնօրեն։

Իր աշխատանքային պայմանագրի համաձայն՝ Գայանե Կարապետյանը 2018թ․ դեկտեմբերի 28-ը գտնվել է աշխատանքի մեջ եւ իր աշխատանքային պարտականություններն իրականացրել սահմանված կարգով։

Մինչդեռ նույն օրը երկու հրաման է արձակվել՝ Գայանե Կարապետյանին ազատելու եւ տնօրենի հաստիքին այլ անձ նշանակելու վերաբերյալ։

Առանց օրենքով սահմանված հիմքերի Գայանե Կարապետյանին ազատելու վերաբերյալ հրաման է արձակվել այն օրը, երբ դեռ անձն իրավունք ուներ գտնվելու իր աշխատանքի մեջ եւ իրականացնելու իր պարտականությունները։

Ավելին, դեռեւս Գայանե Կարապետյանի ազատման հրամանը ուժի մեջ չմտած՝ նոր հրաման է արձակվել»,-ասում է Աշխեն Դաշյանը։ Փաստաբանն ուշադրություն է հրավիրում այն հանգամանքի վրա, որ Կարապետյանի հետ կնքված աշխատանքային պայմանագիրը չէր կարող լուծվել նախքան պայմանագրի գործողության ժամկետի ավարտը, ինչպես նաեւ մինչեւ պայմանագրի գործողության ժամկետի ավարտը չէր կարող ընդունվել որեւէ անհատական իրավական ակտ՝ պաշտոնին նշանակելով նոր տնօրենի։ Դա, ըստ նրա, ՀՀ աշխատանքային օրենսգրքի պահանջների խախտում է։

Նազենի Ղարիբյանը «Հետք»-ի հետ զրույցում ասել էր, որ Գայանե Կարապետյանին աշխատանքից ազատելու մասին ծանուցել են պատշաճ կերպով։ «Ծանուցումն իրականացվել է էլեկտրոնային փաստաթղթաշրջանառության՝ «Mulberry» համակարգով, եւ դա համարվում է շատ ավելի ծանրակշիռ ծանուցում, քան փոստով ծանուցումն է»,-սա մեջբերում է Ղարիբյանի խոսքից։ Աշխեն Դաշյանն այլ բան է պնդում։ Ըստ նրա՝ նախարարությունը հրաժարվում է տրամադրել Գայանե Կարապետյանին աշխատանքից ազատելու հրամանը՝ «փորձելով այդ կերպ քողարկել պետական մարմնի կողմից թույլ տրված կոպիտ խախտումները»։

Հիմա դատարանը նախարարությունից պահանջել է մեկշաբաթյա ժամկետում ներկայացնել համապատասխան փաստաթղթերը, ազատման հրամանի հիմքում ընկած փաստերը հաստատող ապացույցներ։

«Գայանե Կարապետյանը դիմելով դատական պաշտպանության՝ լիահույս էր, որ դատական գործի առկայության պարագայում Նազենի Ղարիբյանի կողմից կդադարեցվեն հրապարակային զրպարտող, վիրավորական հայտարարությունները,  եւ վեճը կլուծվի դատական կարգով։ Կարապետյանը որեւէ հակաիրավական գործողություն չի իրականացրել։ Նրա օրինական պահանջն է՝ պետական մարմնից ստանալ այն հրամանը, ըստ որի ինքն ազատված է աշխատանքից։ Սակայն ստանալու փոխարեն պարբերաբար հանդիպում է պետական մարմնի կողմից հեղինակզրկման, լիազորությունների սահմանազանցման, դատական վարույթի համար արհեստական խոչընդոտների իրականացման գործողությունների։

Աշխատանքից ազատման հրամանը իրավաչափ է, թե ոչ՝ միայն հնարավոր կլինի դատական վարույթի շրջանակներում պարզել, վեճն իրավասու է քննել միայն դատարանը։

Աշխեն Դաշյանը

Մինչդեռ Մշակույթի նախարարությունը, ի դեմս Ղարիբյանի, շարունակում է այդ վեճը հասու դարձնել հանրությանը տարբեր լրատվամիջոցների միջոցով զրպարտող եւ իրականությանը չհամապատասխանող հայտարություններով, փորձելով այդ կերպ հեղինակազրկել Գայանե Կարապետյանին, նրա տարիների կատարած աշխատանքը, հանրային ճնշում գործադրել նրա վրա։ Ընդ որում դա կատարվում է վարչական ռեսուրսներն օգտագործելով»,-ասում է Աշխեն Դաշյանը։

Գայանե Կարապետյանը նաեւ դիմել է վարչապետ Նիկոլ Փաշինյանին՝ խնդրելով ուսումնասիրել եւ իրավական գնահատականներ տալ «Նազենի Ղարիբյանի լիազորությունների սահմանազանցման», «Գայանե Կարապետյանին հրապայնականորեն զրպարտելու, հեղիանակազրկելու, որպես պաշտոնատար անձ չեզոքություն եւ զսպվածություն չցուցաբերելու», «Գայանե Կարապետյանի եւ նրա իրավունքների նկատմամբ հարգանք չցուցաբերելու գործողությունների վերաբերյալ»: