Վարդան Պետրոսյանի գործով այսօրվա դատական նիստին ներկայացել էին Հակոբյան ընտանիքները, նաև պաշտպանական կողմի ֆրանսիացի պաշտպան Մարի Լոռ Դոզեն: Նիստի սկզբում դատարանը ներկայացրեց, որ տուժողները մարտի 27-ին նամակ են գրել հանրապետության նախագահ Սերժ Սարգսյանին՝ նշելով, թե Վարդան Պետրոսյանը մինչ օրս գտնվում է «Դատապարտյալների հիվանդանոցում»` կարծիք հայտնելով, որ նա «արտոնյալ» վիճակում է: Նշենք, որ ապրիլի 29-ին Վարդան Պետրոսյանը տեղափոխվել է «Նուբարաշեն» մեկուսարանի բուժմաս:

Կրկին` Վարդան Պետրոսյանի սթափության մասին

Թեպետ Վարդան Պետրոսյանին նախաքննական մարմինը չի մեղադրել 2013թ. հոկտեմբերի 20-ին Եղվարդ-Երևան ավտոճանապարհին ոչ սթափ վիճակով մեքենա վարելու մեջ, այդուհանդերձ, վարորդի սթափ լինել-չլինելու մասին քննարկումները դատարանում շարունակվում են:

 Այսօրվա նիստի ժամանակ տուժողների իրավահաջորդների ներկայացուցիչ Ռուբեն Բալոյանը միջնորդություն ներկայացրեց «Նաիրիի բժշկական կենտրոնի» բժիշկ Համազասպ Գևորգյանին որպես վկա դատարան հրավիրելու մասին: Ըստ Բալոյանի` միջնորդությունը ներկայացնելու համար հիմք է հանդիսացել վարորդի սթափության վերաբերյալ երկու արձանագրությունների առկայությունը, որոնցից մեկի վրա (դատական գործի նյութերում առկա) ստուգման մեթոդը տողում նշված է միայն ալկոմետրով բառը, իսկ մյուսի վրա, որն ի պատասխան իր հարցման` ստացել էր պաշտպան Բաղդասարյանը, պարզաբանված է նաև ստուգման մեթոդը, այն է՝ «արտաշնչված օդի մեջ ալկոհոլի հոտ»:

«Ես չեմ կարողանում պարզել, թե ինչպես է հնարավոր 2 օրինակից կազմել արձանագրություն, մեկում մի բան գրված լինի, մյուսում՝ ուրիշ: Թող այդ օրվա հերթապահ բժիշկը գա դատարան, որպեսզի պարզ դառնա ամեն բան»,- ասաց Ռուբեն Բալոյանը:

Դատախազ Արթուր Սարգսյանն էլ ասաց, որ թեպետ բժիշկ Համազասպ Գևորգյանը նախաքննության ժամանակ ցուցմունք է տվել, այդուհանդերձ, ինքը կողմ է, որ նա դատակոչվի որպես վկա և ցուցմունք տա:

Միջորդությանն առարկեց Վարդան Պետրոսյանի փաստաբան Նիկոլայ Բաղդասարյանը՝ նշելով. «Հիմա մենք քննարկում ենք մեղադրանքի ծավալից դուրս գտնվող հարց: Քանի որ իմ պաշտպանյալին չեն մեղադրում մեքենան ոչ սթափ վիճակում վարելու մեջ, ուստի միջնորդությունը, կարծում եմ, չի կարող բավարարվել»,-նշեց Նիկոլայ Բաղդասարյանը՝ դատարանին ներկայացնելով իր կատարած փաստաբանական հարցումը, որով բժիշկ Համազասպ Գևորգյանը գրավոր մեկ անգամ ևս պնդել է, որ ավտովթարից հետո Վարդան Պետրոսյանը «Նաիրիի բժշկական կենտրոնում» ստուգվել է և արձանագրվել է, որ նա եղել է սթափ վիճակում: Բժիշկը ներկայացրել է նաեւ բժշկական կենտրոնի՝ վարորդների սթափության զննության մատյանի (համարվում է խիստ հսկողության մատյան) 58-րդ էջի լուսապատճենը, որտեղ ևս գրանցված է Վարդան Պետրոսյանի սթափության զննության արդյունքը` «սթափ» բառով:

«Սուտ են ասում»,- լսելով Նիկոլայ Բաղդասարյանի առարկությունը՝ ասաց տուժողներից Արթուր Հակոբյանը: Դատավոր Վաղինակ Մկրտչյանը, ով մինչ այդ արդեն նախազգուշացում էր տվել նույն անձին, այս անգամ զրկեց նրան դատական նիստերին մասնակցելու հնարավորությունից: Դատական նիստը խանգարելու համար հեռացվեց ևս երկու անձ:

Միջնորդության վերաբերյալ կարծիք արտահայտեց նաև Պետրոսյանի ֆրանսիացի փաստաբան Մարի Լոռ Դոզեն. «Արձանագրությունները վկայում են, որ Վարդան Պետրոսյանը սթափ է եղել: Զրույցն այս թեմայի շուրջ կարող է անվերջ ձգվել, սա կարող է լուրջ կասկած նետել իմ պաշտպանյալի սթափ լինելու վրա: Անհրաժեշտ է կասկած գցել, որ Վարդան Պետրոսյանը խմած է եղել, այլապես ամեն ինչ կփլուզվի»:

Դատարանը, լսելով կողմերի կարծիքները, բավարարեց միջնորդությունը: Դատարան կհրավիրվի դեպքի օրը Վարդան Պետրոսյանի սթափությունը ստուգած հերթապահ բժիշկ Համազասպ Գևորգյանը:

«Ես չեմ հասկանում, թե ինչու է Վարդան Պետրոսյանը մինչ օրս կալանքի տակ»

Ֆրանսիացի փաստաբանը սկսեց ներկայացնել իր միջնորդությունը իր պաշտպանյալին կալանքի տակ պահելու հիմքերի բացակայության մասին: «Սկզբում իմ պաշտպանյալը չի մտածել որևէ փաստաբան ներգրավելու մասին, իր միամտությամբ նա կարծել է, որ երբ մարդն անմեղ է, փաստաբանի կարիք չունի: Հետո է միայն դիմել Նիկոլային, նաև` ինձ: Ես այստեղ չեմ, որ Ձեզ հայկական դատի վերաբերյալ ինչ-որ դասեր տամ, այստեղ եմ, որ պաշտպանեմ երկքաղաքացի Վարդան Պետրոսյանին: Ես չեմ հասկանում, թե ինչու է Վարդան Պետրոսյանը մինչ օրս կալանքի տակ: Եթե վիշտը արդարադատության գործիք է դարձել, ապա այլևս արդարադատություն չէ»,- ասաց ֆրանսիացի փաստաբանը, սակայն դատարանի հրավիրած թարգման, 2002-ին ԱՆ-ի կողմից լիցենզավորված թարգմանիչ, Վ. Բրյուսովի անվան Լեզվաբանական համալսարանն ավարտած Հռիփսիմե Հարությունյանը դժվարանում էր միաժամանակյա բանավոր թարգմանություն անել (դատարանում հայտնեց, որ մինչ այդ քրեական գործերով միայն գրավոր թարգմանություններ է կատարել): Դահլիճում ֆրանսերենին տիրապետողներ կային՝ Ֆրանսիայի դեսպանատան ներկայացուցիչն ու իր թարգմանիչը, Վարդան Պետրոսյանի կինը, քույրը, ուստի սկսվեցին խոսակցություններ, որ թարգմանը ճիշտ չի թարգմանում փաստաբանի ներկայացրածը:

Նիկոլայ Բաղդասարյանը նշեց, որ միջնորդությունը նախապես թարգմանվել է այլ թարգմանչի կողմից հայերեն, իսկ թարգմանը այլ ձևով է թարգմանում, ուստի միջնորդեց դատական նիստը հետաձգել: «Ես չգիտեմ՝ միտումնավոր է արվում, թե ինչպես, բայց Վարդան Պետրոսյանի պաշտպանվելու իրավունքը խախտվում է»,-ասաց Նիկոլայ Բաղդասարյանը:  

Տուժողների իրավահաջորդների ներկայացուցիչ Ռուբեն Բալոյանն առաջարկեց երկրորդ թարգման ներգրավել:

Վարդան Պետրոսյանն էլ ասաց. «Թարգմանը բանավոր խոսքում մասնագիտացած չէ: Բանն այն է, որ ֆրանսերենում բանավոր ու գրավոր լեզուն խիստ տարբեր է»:

Ռուբեն Բալոյանի առաջարկով հայտարարվեց ընդմիջում, ընդմիջումից հետո Նիկոլայ Բաղդասարյանը հետ վերցրեց նիստը հետաձգելու մասին իր միջնորդությունը, քանի որ Մարի Լոռ Դոզեն հայտնել էր, որ կիրակի օրը պիտի մեկնի Ֆրանսիա: Վերջինը շարունակեց ներկայացնել իր միջնորդությունը, բայց թարգմանն անընդհատ հարցեր էր տալիս փաստաբանին՝ փորձելով կրկին ճշտել այս կամ այն բառը: Ի վերջո, ֆրանսիացի փաստաբանն ասաց, որ չի կարող այլևս այդ պայմաններում շարունակել: «Ինձ մոտ տպավորություն է ձևավորվում, որ Դուք չեք ուզում, որ ես հասկացված լինեմ»,-ասաց Մարի Լոռ Դոզեն եւ համաձայնեց մինչև երեքշաբթի օրը մնալ Հայաստանում ու մասնակցել մյուս դատական նիստին: