«Լուսավոր Հայաստան» և «Բարգավաճ Հայաստան» խմբակցությունների խորհրդարանական բանավեճը երկու օր է՝ չի դադարում. այսօր էլ խորհրդարանականները վիճաբանեցին Ուկրաինայում ՀՀ նախկին դեսպան, Գագիկ Ծառուկյանի խնամի՝ Անդրանիկ Մանուկյանի անվան հիշատակումից հետո:

Այս և այլ հարցերի շուրջ զրուցել ենք «Լուսավոր Հայաստան» խմբակցության ղեկավար Էդմոն Մարուքյանի հետ.

-Պարո՛ն Մարուքյան, արդեն մի քանի օր է, ինչ սոցցանցերում քննարկվում է այն հարցը, որ «Լուսավոր Հայաստանը» «Բարգավաճ Հայաստան»-ին է ընդդիմություն և ոչ թե իշխող ուժին, կարծես թե երկու ուժերն իրար են թիրախավորում, ինչո՞ւ:

-Մենք որևէ մեկին չենք թիրախավորել, ո՛չ երեկ, ո՛չ այսօր, երեկվա ելույթներն ուղղված են եղել «Իմ քայլը» դաշինքին, որպեսզի նրանք ձայն տային Մանե Թանդիլյանին, ԲՀԿ-ից մեզ պատասխանում էին «Իմ քայլը» դաշինքի փոխարեն: Ես ասացի, որ ձեզ վրա մի վերցրեք կրակը, և այսօր էլ եղավ քաղաքական ելույթ մեր խմբակցության անդամի կողմից, որը շատ բուռն ընդունվեց, քանի որ թվարկված դեսպաններից մեկի հարազատները մեր հարևան խմբակցության անդամ են, տեղից սկսեցին գոռգոռալ, ես ստիպված եղա ասել, որ կարող եք ասել, ինչ ուզում եք, բայց ելույթ ունեցեք ոչ թե տեղից: Հիմա ի՞նչ անենք, մեր ելույթների ժամանակ փնտրենք, տեսնենք՝ ով ում է բարեկամ 132 պատգամավորի մեջ, նոր ելույթ ունենա՞նք: Սա հին խորհրդարանը չէ, հին բարքերը մի բերեք նոր խորհրդարան: ԼՀ-ն ամեն ինչ անում է, որ դա լինի, և պատգամավորները պետք է իմանան, որ չեն կարող տեղից ռեպլիկներ անել, գոռգոռալ մեկը մյուսի վրա, հաշվեհարդար տեսնելու վերաբերյալ հայտարարություններով հանդես գալ: Մենք էստեղ նախահարձակ եղող չենք, կարգուկանոնի կողմնակից ենք:

-Ձեր խմբակցության անդամը քննադատում էր նախորդ իշխանություններին դիվանագիտական նշանակումների համար:

-Նա Վրաստանում  ՀՀ դեսպանի մասին էլ խոսեց, որը հիմա դեսպան է, ինչի՞ իշխանությունները չպատասխանեցին, գործող դեսպաններից էլ կար, չէ՞:

-Ինչո՞ւ այս իշխանությունների արտաքին քաղաքականությունը դուք՝ որպես ընդդիմություն, չեք քննադատում:

-Արման Բաբաջանյանը հենց դրա մասին էր ասում, նույնն եք շարունակում: Ասում էր, որ Լենա Նազարյանը հայտարարություն է արել, որ չի լինելու փոփոխություն, Բաբաջանյանն էլ իր ելույթւոմ ասում էր, որ երկու վարչակազմերի հիմնադրած, մեկը մյուսին շարունակած արտաքին քաղաքականությունը չի փոխվելու, դա էր ասվածը, ուղղակի մարդիկ ինչպես ուզում, այնպես էլ ընկալում են: Քննադատությունը հենց իշխանություններին էր ուղղված, ոչ թե ԲՀԿ-ին, ԲՀԿ-ն չէ դեսպաններին նշանակել:

-Դուք այն գործիչներից էիք, որ դեմ էր ԵԱՏՄ անդամակցությանը, «Ելք»-ի կազմով էլ նախաձեռնությամբ էիք հանդես եկել ԵԱՏՄ կազմից դուրս գալու վերաբերյալ, կարծես հիմա նախկինի պես չեք քննադատում իշխանություններին այս հարցով և չեք պահանջում անդամակցությունը դադարեցնել, ինչո՞ւ:

-Այս իշխանությունները շանս ունեն երկու միությունների հետ լավ աշխատելու՝  թե՛ ԵՄ-ի և թե՛ ԵԱՏՄ-ի: Երբ մենք նախաձեռնել էինք ԵԱՏՄ-ից դուրս գալը, Հայաստանը ՍԵՊԱ-ի (Single Euro Payments Area) անդամ չի եղել, իրողություն է փոխվել, և այսօր լեգիտիմ իշխանությունը հնարավորություն ունի զարգացնելու մեր հարաբերությունները և շահ քաղելու այդ միությունից: Եթե զգանք, որ նման նախաձեռնության կարիք կա, երբևէ չենք վարանելու, կաշկանդված չենք լինելու, ուղղակի տարիների ընթացքում բաներ են փոխվել, և մենք մեր մոտեցումները վերադասավորում ենք՝ ելնելով որոշակի իրողություններից. հինգ տարի առաջվա իրողություններով չենք կարող քաղաքականություն վարել:

-Իսկ իշխանությունների լեգիտիմ լինելը ձեզ չի՞ կաշկանդելու քննադատությունների հարցում, և կփոխվի արդյոք քննադատելու բառապաշարը:

-Անգամ այն ժամանակ, երբ գող, ավազակ, թալանչիներ կային, ես նման հռետորաբանություն չեմ օգտագործել, հետևաբար մեր մոտեցումը քաղաքական նոր մշակույթի ջատագով լինելու հարցում այլ է, բայց մենք որևէ բանով կաշկանդված չենք: Այս օրերի ընթացքում էլ չենք հապաղել այս իշխանություններին քննադատել, մենք ապացուցելու բան չունենք, բոլորը գիտեն, որ այսօր երկրում ընդդիմությունը «Լուսավոր Հայաստան»-ն է, և իր առաքելությունն իրականացնում է իր ունեցած մանդատների և հնարավորությունների սահմանում:

-Պարո՛ն Մարուքյան, երկար ժամանակ խոսակցություններ կային, որ ԼՀԿ-ն կապ ունի Վատիկանում ՀՀ նախկին դեսպան Միքայել Մինասյանի հետ, այսօր էլ ձեր խմբակցության պատգամավոր Արման Բաբաջանյանը լրագրողների հետ զրույցում ասել է, որ Միքայել Մինասյանը լավագույն դեսպաններից է եղել: Ի՞նչ կարող եք ասել այդ մասին:

-«Լուսավոր Հայաստան»-ի հետ շատ բան է կապվել, իսկ այդ միտքը պարոն Բաբաջանյանի մասնավոր կարծիքն է:

-Կուսակցությա՞ն տեսակետը չէ:

-Ո՛չ, եթե մարդը կարծիք է հայտնում որևէ դեսպանի գործունեության վերաբերյալ, էդտեղ փորձել որևէ բան վերագրել մեզ, դա աբսուրդ է: Եթե մենք կապ ունենայինք կամ պարոն Բաբաջանյանը կապ ունենար, չէր ասի էդպես, եթե մեկը մյուսի հետ ծածուկ կապ ունի, չի ասի բացահայտ, և ավելին ասեմ՝ եթե մի բան լավ են անում, մենք միշտ էլ ասել ենք, որ լավ է, վատ են անում, ասում ենք վատ է: ԼՀԿ-ն նախկին ու ներկա ոչ մի իշխանության հետ գաղտնի կապ չի ունեցել, չունի և չի ունենալու: Եթե նման կապ լիներ, ես ինչպե՞ս կարող էի նման ելույթ ունենալ՝ ուղղված Սերժ Սարգսյանին. դեսպանի մասին կարծիք է ասվել, որը, պարզ է, պետք է ուղղվի մեր դեմ, մեր կատարած աշխատանքը ցույց կտա ամեն ինչ:

-Արտաքին հարաբերությունների մշտական հանձնաժողովի նախագահի թեկնածու Ռուբեն Ռուբինյանը ակնարկեց, որ հեռացված դեսպանների մասին եք խոսում, ինչը հասարակությանը հետաքրքիր չէ արդեն:

-Նա փորձեց չլսել և չտեսնել գործող դեսպանների մասին ասված հայտարարությունը, Վրաստանի դեսպանը հիմա գործող դեսպան է, չէ՞, ինչի՞ չանդրադաձավ. մեր մոտեցումներն արտաքին քաղաքականության վերաբերյալ միշտ էլ ասել ենք, հիմա էլ ենք ասելու:

-Դուք երեք գումարման խորհրդարանի պատգամավոր եք, նոր խորհրդարանի քաղաքական մեծամասնության պատգամավորների՝ այս մի քանի օրվա գործունեությունն ինչպե՞ս եք գնահատում: Եթե համեմատենք նախորդ խորհրդարանի հետ, այս խորհրդարանն առավել արդյունավե՞տ կաշխատի, թե՞ ոչ:

-Չինացուն հարցնում են, թե ինչ կարծիքի է նա Ֆրանսիական հեղափոխության մասին, և նա ասում է՝ դեռ վաղ է դատողություններ անել, բայց հարյուրավոր տարիների հարց է: Երեք օր է, ինչ խորհրդարանական մեծամասնությունն աշխատում է, հիմա դեռ վաղ է դատողություններ անել, հույս ունենք, որ այս բարձր լեգիտիմությունն ու վստահությունը կծառայի ի շահ ՀՀ-ի և քաղաքացիների:

-Չե՞ք կարծում, որ խորհրդարանական մեծամասնության պատգամավորների մեծ մասի անփորձ լինելը՝ որպես խորհրդարանական, ինչ-որ առումով օգտակար կլինի ձեզ համար՝ որպես ընդդիմություն, և կհայտնվեն ձեր թիրախում:

-Մենք չենք եկել էստեղ ինչ-որ մեկի ձախողումից ուրախանալու կամ մեկի անփորձությունից հրճվելու ու ասելու, որ մենք ավելի փորձառու ենք, մեր շարքերում էլ կան անփորձ պատգամավորներ: Բնական է, որ մարդիկ կլինեն, որ փորձ չունեն, դրա մեջ որևէ վատ բան չկա, վատ կլինի, եթե փորձ չունեցողն իրեն ամբարտավանի պես պահի և փորձ ունեցողներից էլ չփորձի բան սովորել, իսկ փորձ չունենալը որպես մինուս չի կարող դիտարկվել: Երբ ես ընտրվել էի պատգամավոր, 31 տարեկան էի, փորձ չունեի, բայց մեկ տարվա մեջ դարձա ամենաակտիվ պատգամավորը: