Երևան քաղաքի ընդհանուր իրավասության դատարանի Կենտրոնի նստավայրի դիմաց հավաքված քաղաքացիները փաստաբան Միհրան Պողոսյանին թույլ չեն տվել մուտք գործել դատարան: Դատարանի դիմաց գտնվող ոստիկանները քայլեր չեն ձեռնարկել փաստաբանի մուտքը դատարան ապահովելու համար:

Մեզ հետ զրուցում Միհրան Պողոսյանը հայտնեց, որ այսօր՝ ժամը 13:30-ին, դատարանում դատական նիստ է ունեցել, գնացել է դատարան, որպեսզի մասնակցի դրան:

«Շենքի դիմաց անձինք էինք հավաքված, բայց դատարանի դուռն այդ պահին բաց էր: Ես աստիճաններով բարձրանում էի, երբ  դատարանի դիմաց հավաքված մեծաթիվ անձինք, ինձ տեսնելով, անմիջապես արգելափակեցին դատարանի դուռը, որպեսզի չկարողանամ մտնել»,- ասաց փաստաբանը:

Ըստ Միհրան Պողոսյանի՝ ինքը հայտնել է, որ փաստաբան է, իր մասնագիտական գործունեությունն է իրականացնում, խնդրել բացել դատարանի դուռն ու իրեն թույլ տալ մուտք գործել դատարանի դահլիճ: Հավաքվածները, սակայն, ըստ պաշտպանի, ագրեսիվ վարքագիծ են դրսևորել, ու իրենց են մոտեցել դատարանի դիմաց գտնվող իրավապահները:

«Ոստիկանության աշխատակիցներին ևս հայտնեցի, որ փաստաբան եմ, ու այս պահին խոչընդոտվում է իմ մասնագիտական պարտականությունների կատարումը: Ոստիկանները նշեցին, որ իրենք այդ պահի դրությամբ որևէ լիազորություն չունեն, որևէ գործառույթ չեն իրականացնելու, հակառակը, ինձ հորդորում էին իմ անվտանգությունից ելնելով՝ հեռանալ դատարանի տարածքից: Այս ամենն ուղեկցվում էր վիրավորական արտահայտություններով՝ կապված նրա հետ, որ ես փաստաբան եմ և ցանկանում եմ իրականացնել իմ մասնագիտական պարտականությունները»,- ասաց Միհրան Պողոսյանը:

Վերջինս փորձել է զրուցել դատարանի դիմաց գտնվող մի քանի քաղաքացու հետ:

«Երբ հաջողվում էր առանձին զրուցել քաղաքացիների հետ, նրանք բավականին ադեկվատ գիտակցում էին, թե ինչի մասին է խոսքը, թե այս գործողություններում ինչն է սխալ, սակայն ամբոխի հետ, բնականաբար, խոսել չի լինում. ամբոխից վիրավորական արտահայտություններ էին հնչում»,- ասաց Միհրան Պողոսյանը:

Վերջինս կարծում է, որ այսօր դատարանների դիմաց տեղի ունեցած գործողությունները նպատակը էին հետապնդում տապալել արդարադատության իրականացումը Հայաստանի Հանրապետությունում:

Մեր հարցին՝ իր հետ տեղի ունեցած միջադեպի առթիվ փաստաբանը հանցագործության մասին հաղորդում ներկայացրե՞լ է, Պողոսյանը պատասխանեց, որ դատարանի տարածքում եղել են իրավապահ համակարգի ներկայացուցիչներ:

«Դեպքի առթիվ տեսանյութեր կան: Ես անընդհատ պնդում էի, որ այնտեղ տեղի է ունենում հանցագործություն: Փաստերը կային, ու եթե Հայաստանի Հանրապետությունն իրավական պետություն է, ապա այդքանը բավարար է, որպեսզի իրավապահները կատարեն անհրաժեշտ գործողություններ: Սակայն ակնհայտ էր, որ քաղաքական հրահանգ կար որևէ պարագայում նման գործողություններ չիրականացնելու»,- ասաց Պողոսյանն ու նշեց, որ եթե, օրինակ, ոստիկանի ներկայությամբ որևէ անձ դանակով վազելիս լինի մեկ այլ անձի ետևից, պարտադիր չէ, որ այդ անձը հանցագործության մասին հաղորդում տա:

«Կանխման գործողությունը ոստիկանությունը պարտավոր է իրականացնել տեղում, ու ձևական հաղորդում ներկայացնելը քրեական հետապնդում սկսելու համար պարտադիր բաղադրիչ չէ: Դատարանի դիմաց կոնկրետ հանրային շահ էր խախտվում, այսինքն՝ խոչընդոտվում էր արդարադատության իրականացումը, ուստի ոստիկանները պարտավոր են այս միջադեպը քննարկման առարկա դարձնել առանց հանցագործության մասին հաղորդման»,- ասաց Միհրան Պողոսյանը:

Ըստ Փաստաբանի՝ ակնհայտ է, որ դատարանի դիմաց իր մասնագիտական պարտականությունը կատարելու ժամանակ վիրավորանքներ են հնչել և խոչընդոտվել է արդարադատության իրականացումը. այս երկու արարքները քրեորեն պատժելի են:

Միհրան Պողոսյանը չբացառեց, որ տեղի ունեցած իրադարձությունների տեսանյութերի  ուսումնասիրության արդյունքում հանցագործության այլ հատկանիշներ ևս ի հայտ գան:

Նշենք, որ Միհրան Պողոսյանը, ի թիվս այլ անձանց, Մարտի 1-ի գործով մեղադրյալ Յուրի Խաչատուրովի պաշտպանն է: Քաղաքացիներն այսօր թույլ չէին տվել դատարան մուտք գործել նաև Մարտի 1-ի գործով մեկ այլ մեղադրյալ՝ Արմեն Գևորգյանի փաստաբան Էրիկ Ալեքսանյանին:

Հիշեցնենք, որ երեկ վարչապետ Նիկոլ Փաշինյանը ՀՀ քաղաքացիներին կոչ էր արել այսօր առավոտյան՝ ժամը 08:30-ից սկսած, արգելափակել ՀՀ բոլոր դատարանների մուտքերը: Արգելափակման գործողություններն այս պահին ավարտվել են: