Օտարերկրյա քաղաքացիների մուտքը Հայաստանի Հանրապետության տարածք օտարերկրյա որևէ պետության պահանջով չի կարող արգելվել: Այս մասին «Հետք»-ի հարցմանն ի պատասխան՝ հաղորդել է ազգային անվտանգության ծառայությունը (ԱԱԾ):

Մայիսի 1-ին, երբ Ուկրաինայի Գերագույն ռադայի պատգամավոր Մուստաֆա Նայեմը հայտարարել էր, թե իրեն «Զվարթնոց» օդանավակայանի անձնագրերի հսկիչ կետում չեն թույլատրել մուտք գործել Հայաստանի տարածք՝ Ռուսաստանի Դաշնության պահանջով, «Հետք»-ը պարզաբանում ստանալու համար դիմել էր ԱԱԾ մամուլի կենտրոն, որտեղից հորդորել էին գրավոր հարցում ուղարկել: Մայիսի 2-ին «Հետք»-ը գրավոր հարցումը ուղարկել էր ԱԱԾ, և միայն ուղիղ մեկ ամիս անց՝ հունիսի 3-ին, Ազգային անվտանգության ծառայությունը ուշացած տրամադրեց մեր հարցման պատասխանը:

Գրավոր հարցմամբ ԱԱԾ-ից խնդրել էինք պատասխանել, թե որն է եղել ուկրաինացի պատգամավորի մուտքի արգելքի պատճառը, հա՞յ սահմանապահների հետ է զրուցել Նայեմը, թե՞ «Զվարթնոց»-ում ծառայություն իրականացնող ռուս սահմանապահների, կարո՞ղ է օտարերկրյա պետության պահանջով արգելվել օտարերկրացիների մուտքը Հայաստան և Ռուսաստանի պատժամիջոցների ցանկում գտնվող անձինք կարո՞ղ են Հայաստանի տարածքում ենթարկվել սահմանափակումների:

Ազգային անվտանգության ծառայությունը հայտնել է, որ Մուստաֆա Նայեմը 2015 թվականին ընդգրկվել էր Հայաստանում անցանկալի համարվող օտարերկրացիների տվյալների բանկում: Այս մասին նշել էր նաև ԱԱԾ տնօրեն Արթուր Վանեցյանը «Ազատություն» ռադիոկայանի հետ զրույցում՝ ընդգծելով, որ երբ ինքը դարձել է ԱԱԾ տնօրեն մոտ 30 հազար օտարերկրյա քաղաքացիներ դուրս են եկել անցանկալի անձանց ցանկից, և տեխնիկական վրիպակով պայմանավորված՝ Մուստաֆա Նայեմի անունը շարունակել է մնալ այդ ցանկում,  այդ պատճառով էլ ուկրաինացի պատգամավորը խոչընդոտների է բախվել:

Այնուամենայնիվ, ԱԱԾ-ն չի պարզաբանել, թե կոնկրետ ինչու է Մուստաֆա Նայեմն ընդգրկվել անցանկալի անձանց ցանկում: «Հետք»-ին հասցեագրված ԱԱԾ պատասխանում ասվում է, որ Մուստաֆա Նայեմը զրուցել է հայ սահմանապահների հետ, ինչպես նաև նշել է, որ օտարերկրյա քաղաքացիների մուտքը Հայաստանի Հանրապետության տարածք օտարերկրյա որևէ պետության պահանջով չի կարող արգելվել: Իսկ ինչ վերաբերում է Ռուսաստանի պատժամիջոցների ցանկին, ԱԱԾ-ն հաղորդել է, որ իրենք դրա հետ կապված սահմանափակումների վերաբերյալ տեղեկություներ չունեն:

Հիշեցնենք՝ Մուստաֆա Նայեմը հայտարարել էր նաև, որ Հայաստանում Ուկրաինայի դեսպանության ջանքերի շնորհիվ է կարողացել մուտք գործել Հայաստան՝ «մեկանգամյա» նշումով: