Երևան քաղաքի ընդհանուր իրավասության դատարանը՝ դատավոր Վարդան Արմենակի Գրիգորյանի նախագահությամբ, քիչ առաջ որոշեց Ազգային ժողովի նախկին պատգամավոր Ալեքսան Պետրոսյանին (հայտնի է ՄԱՊ-ի Ալիկ անունով) 30 մլն դրամ գրավի դիմաց ազատ արձակել: «Հետք»-ի հետ զրույցում Պետրոսյանի պաշտպան Միհրան Պողոսյանը հայտնեց, որ գրավի գումարը վճարելուց և համապատասխան փաստաթղթերը քրեակատարողական հիմնարկ ներկայացնելուց հետո Պետրոսյանն ազատ կարձակվի:

Հիշեցնենք, որ Բնապահպանության նախկին նախարար Արամ Հարությունյանին փողերի լվացման հարցում օժանդակելու մեջ մեղադրվող Ալեքսան Պետրոսյանի գործով նախաքննությունն ավարտվել է, գործը ուղարկվել է առաջին ատյանի դատարան ու մակագրվել դատավոր Վարդան Գրիգորյանին: Երեկ տեղի է ունեցել դատական նիստ, որի ընթացքում քննության առարկա է դարձել Ալեքսան Պետրոսյանի նկատմամբ ընտրված խափանման միջոց կալանավորման հիմնավորվածության հարցը: Ալեքսան Պետրոսյանի պաշտպան Միհրան Պողոսյանն այդ դատական նիստի ընթացքում ներկայացրել է նրան գրավի դիմաց ազատ արձակելու վերաբերյալ միջնորդություն` նշելով, որ Ալեքսան Պետրոսյանի հարազատները պատրաստ են դատարանի դեպոզիտ հաշվին 20 մլն դրամ գումար փոխանցել: Դատարանը, փաստորեն, գրավի ողջամիտ չափ է սահմանել ոչ թե 20, այլ 30 մլն դրամը: