Մայրաքաղաք Երևանի հյուսիսային հարևաններից մեկը Կոտայքի մարզի Եղվարդ համայնքն է, մասնավորապես համայնքի մեջ մտնող Զովունի գյուղը, որտեղ ևս, ինչպես Երևանի մյուս մուտք ու ելքերում, ապրիլի 1-ին անցակետ է տեղադրվել, և իրականացվում է ոստիկանական հսկողություն:

Անցակետերը տեղադրված են Զովունու նախկին խաղատների հարևանությամբ: Երբեմնի խաղատները հիմա վերածվել են կա՛մ սգո սրահների, կա՛մ գիշերային ակումբների և մոթելների: Լուսանկարում պատկերված տեսարանը ճանապարհի այս հատվածի համար նորություն չէ, քանի որ այստեղ հաճախակի են մեքենաների կուտակումներ լինում: Հոգեհանգստի արարողությունների ժամանակ, իսկ դրանք գրեթե ամեն օր լինում էին, ճանապարհը մի քանի րոպե շարունակ խցանվում էր: Դրան նպաստում է նաև ասֆալտի անբարվոք վիճակը. այստեղ մինչև կես մետր լայնությամբ և մեծ խորությամբ փոսեր կան:

Զովունիում տեղադրված անցակետում Երևան մեկնող ավտոմեքենաները քիչ էին, կուտակումներ չէին լինում, ինչը չի կարելի ասել Երևանից եկող մեքենաների դեպքում, որոնց շարքը հասնում էր մինչև Արտակարգ իրավիճակների նախարարություն տանող ճանապարհի խաչմերուկ:

Երևանից եկող քաղաքացիների մեջ շատերը գնում էին իրենց ամառանոցներ գյուղատնտեսական աշխատանքներ կատարելու, սակայն եթե նրանք չէին ունենում այդ ամառանոցի սեփականության վկայականը, ապա ոստիկանները չէին թույլատրում մուտքը: Անցակետում հսկողություն իրականացնող ոստիկանության մայորը մեզ ասաց, որ իրենք չեն կարող համոզված լինել, թե քաղաքացին իսկապես ամառանոց ունի՞ և գնու՞մ է այնտեղ, թե՝ ոչ, և հենց այդ պատճառով են պահանջում անշարժ գույքի սեփականության վկայականը:

Նրա խոսքով՝ այս երեք օրվա ընթացքում անցակետում միջադեպեր չեն գրանցվել: Այն քաղաքացիները, որոնց մուտքը կամ ելքը չի թույլատրվել, հոժարակամ ենթարկվել են ոստիկանության պահանջներին:

Զովունուց Երևան մուտքի անցակետում հսկողություն իրականացնող ոստիկանն էլ ասաց, որ մեքենաների մեջ շատ են տաքսի ծառայության ավտոմեքենաները, որոնց հոսքը ակտիվացել է՝ միջմարզային տրանսպորտի բացակայության արդյունքում: Երևան մտնել թույլ են տալիս նաև աշխատանքի գնացողներին և դեղատներից գնումներ կատարողներին, եթե քաղաքացիները ցույց են տալիս իրենց հիվանդության պատմության փաստաթուղթը:

Հիշեցնենք, որ մարտի 16-ին կորոնավիրուսի տարածմամբ պայմանավորված Հայաստանում հայտարարվեց արտակարգ դրություն, իսկ ապրիլի 1-ին պարետի որոշմամբ՝ սահմանափակվեց միջմարզային տեղաշարժը: Ապրիլի 3-ի տվյալներով՝ Հայաստանում կորոնավիրուսի հաստատված դեպքերի թիվը հասել է 736-ի, որոնցից 43-ն առողջացել են, իսկ 7-ը՝ մահացել: Փաստացի բուժվողների թիվն էլ 686 է: