Էջմիածնի բժշկական կենտրոնը լիզինգով նոր ռենտգեն սարք ձեռք կբերի
Էջմիածնի բժշկական կենտրոնում (պոլիկլինիկա) դեռ շարունակում են օգտագործել Մեծամորի հիվանդանոցից բերված շարժական ռենտգեն սարքը: Սակայն Արմավիրի մարզպետարանի, պատգամավորների կապերով, նմանատիպ շարժական սարք վերջերս նվեր են ստացել նաև ԱՄՆ-ում ապրող հայ գործարարներից: Սարքն այժմ Էջմիածնի հիվանդանոցում է և անհրաժեշտության դեպքում սպասարկում է նաև պոլիկլինիկայի պացիենտներին:
Հիշեցնենք, որ «Հետք»-ը դեռ մարտ ամսին հոդված էր հրապարակել՝ տեղեկացնելով, որ այդ ժամանակ կորոնավիրուսով վարակման էպիկենտրոնը դարձած Էջմիածնի ԲԿ-ում մոտ 15 օր չէր աշխատում թոքերի ռենտգեն սարքը: Մինչդեռ սարքն այդ պահին ավելի քան անհրաժեշտ էր՝ թոքերում կասկածելի օջախները հայտնաբերելու և դրա հիման վրա մասնագիտացված հիվանդանոց ուղեգրելու համար:
Մեր հրապարակման հաջորդ օրը Արմավիրի մարզպետարանի միջամտությամբ Մեծամորի բժշկական կենտրոնից շարժական ռենտգեն սարքը տեղափոխվել է Էջմիածնի բժշկական կենտրոն:
Արմավիրի մարզպետարանի գլխավոր քարտուղարի պաշտոնակատար Վարդան Վարդազարյանը «Հետք»-ի հետ զրույցում ասաց, որ վերջին մեկ տարվա կատարված աշխատանքների շնորհիվ Էջմիածնի բժշկական կենտրոնում դրամական խնայողություններ կան, և ցանկանում են նոր ռենտգեն սարք գնել:
«Գրագրության մեջ էինք բանկերի հետ, կփորձենք մեր ուժերով, լիզինգի պայմանագրով, նոր ստացիոնար ռենտգեն սարք ձեռք բերել Էջմիածնի բժշկական կենտրոնի համար: Գործընթացն արդեն մեկնարկել է, մրցույթը հայտարարված է»,- ասում է Վարդան Վարդազարյանը:
Նրա խոսքերով՝ մրցույթի արդյունքներից հետո արդեն քննարկումներ կլինեն բանկերի հետ և լիզինգի պայմանագրով, ժամանակացույցի համաձայն, բժշկական կենտրոնը կմարի ձեռք բերվող սարքի գումարը:
Վարդան Վարդազարյանը նշեց, որ նոր ձեռք բերվող սարքը լինելու է ավելի մեծ, թե չափերով, թե ֆունկցիոնալ հնարավորություններով:
Մեծամորի բժշկական կենտրոնի շարժական ռենտգեն սարքը մինչև նորի ձեռք բերելը կմնա Էջմիածնում, որպեսզի զորակոչով պայմանավորված ծանրաբեռնվածությունը մեղմվի:
Վարդան Վարդազարյանը նշեց, որ, թե՛ Էջմիածնի հիվանդանոցը, թե՛ բժշկական կենտրոնը, միմյանց աջակցելով, կարողանում են սպասարկել բոլոր պացիենտներին և այդ առումով որևէ խնդիր չկա:
Մեկնաբանել