Վերաքննիչ քրեական դատարանն այսօր քննել է սնանկության դատարանի դատավոր Գևորգ Նարինյանին կալանավորելու որոշման դեմ նրա պաշտպանների բողոքը։ Այս մասին «Հետք»-ի հետ զրույցում ասաց Նարինյանի պաշտպաններից Վարազդատ Բադալյանը՝ հայտնելով, որ Նարինյանն այսօր բերվել է դատարան ու մասնակցել իր խափանման միջոցի գործի քննությանը։

Նշենք, որ բողոքը Վերաքննիչ դատարանում մակագրվել էր դատավոր Տիգրան Սահակյանին, սակայն վերջինիս արձակուրդ մեկնելու պատճառով գործը վերամակագրվել է դատավոր Ռուզաննա Բարսեղյանին։ Դատարանն այսօր ավարտել է բողոքի քննություն ու հեռացել խորհրդակցական սենյակ՝ որոշում կայացնելու։

Հիշեցնենք, որ սնանկության դատարանի դատավոր Գևորգ  Նարինյանը մեղադրվում է պաշտոնեական լիազորությունները չարաշահելուն օժանդակելու, փողերի լվացման, ապօրինի հարստանալու և հայտարարագրում կեղծ տվյալներ ներկայացնելու կամ հայտարարագրման ենթակա տվյալները թաքցնելու հոդվածներով։ Նույն գործով անցնում է նաև դատավոր Արա Կուբանյանը։ Վերջինս մեղադրվում է պաշտոնեական լիազորությունները չարաշահելու մեջ։ Գևորգ Նարինյանը հուլիսի 20-ին կալանավորվել է Երևանի ընդհանուր իրավասության դատարանի դատավոր Մնացական Մարտիրոսյանի որոշմամբ։  Նույն դատարանի մեկ այլ դատավոր՝ Աննա Մաթևոսյանը, մերժել է Արա Կուբանյանին կալանավորելու ԱԱԾ-ի միջնորդությունը։ Դատավոր Աննա Մաթևոսյանի այս որոշումը վերաքննիչ դատարանում բողոքարկել են և՛ Կուբանյանի պաշտպանները, և՛ դատախազությունը։

Չնայած Կուբանյանը չի կալանավորվել՝ առաջին ատյանի դատարանը գտել է, որ առկա է հիմնավոր կասկած այն մասին, որ նա կատարել է իրեն վերագրվող արարքը, և Կուբանյանի պաշտպաններն այս մասով են վերաքննիչ բողոք ներկայացրել։ Դատախազությունն էլ վերաքննիչ բողոքով պահանջել է կալանավորել Կուբանյանին։

Վերջինիս պաշտպան Հովսեփ Սարգսյանը «Հետք»-ի հետ զրույցում ասաց, որ Դատախազության և պաշտպանների բողոքները ևս մակագրվել են դատավոր Ռուզաննա Բարսեղյանին, երկու օր առաջ՝ օգոստոսի 5-ին դատավոր Բարսեղյանը որոշել է մերժել և՛ պաշտպանների, և՛ Դատախազության բողոքը։ Այսպիսով՝ Արա Կուբանյանը կշարունակի գտնվել ազատության մեջ։

Նշենք, որ դատավորների մեղադրանքը կապված է նրանց՝ սնանկության դատարանի դատավորի գործունեության հետ։  Նրանք իրենց առաջադրված մեղադրանքները չեն ընդունում։

Ազգային անվտանգության ծառայությունը հուլիսի 21-ին  հաղորդագրություն է տարածել՝ հայտնելով,  որ դատավորներին առնչվող գործով տուժող, սնանկ ճանաչված քաղաքացին Կառավարության շենքի դիմաց ինքնահրկիզման փորձ է կատարել՝ դժգոհելով սնանկության վարույթի ընթացքում թույլ տրված չարաշահումներից և դրա արդյունքում ունեզրկման փաստից: Այդ քաղաքացին, ի դեպ, այսօր Գևորգ Նարինյանի խափանման միջոցի գործով նիստին ընթացքում միայնակ բողոքի ակցիա է իրականացրել դատարանի դիմաց։

Լուսանկարում՝ ձախից՝՝ Գևորգ Նարինյանը, աջից՝ Արա Կուբանյանը