Եվրասիական տնտեսական հանձնաժողովը հաստատել է ԵԱՏՄ դեղագիրքը, որը կլինի դեղերի որակի գնահատման և վերահսկման հիմնական ուղեցույցը միության անդամ 5 պետությունների համար։ 

Այդ փաստաթուղթն ուժի մեջ կմտնի մյուս տարի՝ 2021թ մարտի 1-ից։ Այն դեղարտադրողներին, որոնք ավելի վաղ էին գրանցել իրենց արդադրանքները, տրվել է ևս 5 տարի ժամկետ՝ մինչև 2026թ հունվարի 1-ը՝ դեղերի նորմատիվ փասատթղթերը ԵԱՏՄ միասնական դեղագրքի պահանջներին համապատասխանեցնելու համար։ Մինչև 2020թ տեղական դեղարտադրողները հնարավորություն ունեին ընտրելու՝ գրանցել իրենց դեղորայքը ազգային, թե ԵԱՏՄ կանոնակարգերով:

Դեղագրքի առաջին հատորում կան 157 հարմոնիզացված ընդհանուր դեղագրքային հոդվածներ՝ մենագրություններ (գիտական աշխատություն, որտեղ առավել խորությամբ ուսումնասիրվում է որոշակի թեմա, հեղ. ), որոնք ներառում են ընդհանուր տեղեկություններ՝ շուկայում արդեն շրջանառվող և դեռևս նոր մշակվող դեղամիջոցների կենսաբանական և մանրէաբանական փորձարկման մեթոդների, ռեակտիվների, ինչպես նաև՝ գործիքների և սարքավորումների դեղագործական վերլուծության համար։

Նախատեսվում է հետագայում լրացնել դեղագիրքը ընդհանուր և մասնավոր հոդվածներով՝ դրանով նախապատրաստելով հաջորդ հատորների հրապարակումը։ Մինչ օրս ԵԱՏՄ Դեղագրքային կոմիտեն պատրաստել է ավելի քան 100 դեղագրքային մենագրություն դեղագրքի երկրորդ հատորի համար (մենագրությունների նախնական քննարկումներն իրականացվում են այստեղ)։

«Դեղագործական հոդվածները հարմոնզիացված են աշխարհի առաջատար դեղագրքերի հետ, ինչը թույլ կտա ապահովել դեղամիջոցների որակի փորձաքննությունների շարունակականությունն ու կհեշտացնի Միության դեղագործական արտադրանքի արտահանումն այլ երկրներ»,- իր ելությում նշել է ԵՏՀ տեխնիկական կանոնակարգման խորհրդի անդամ (նախարար) Վիկտոր Նազարենկոն:

Համաշխարհային դեղագրքերի ցանկի համաձայն (վարում է Առողջապահական համաշխարհային կազմակերպությունը (ԱՀԿ), հեղ. )՝ ԵԱՏՄ դեղագիրքը դարձել է երկրորդ տարածաշրջանային դեղագիրքն աշխարհում։

Ըստ ԵՏՀ-ի՝ դեղագիտական մենագրությունների կիրառումը թույլ կտա տեղական և արտասահմանյան արտադրողներին, ինչպես նաև՝ ԵԱՏՄ անդամ երկների վերահոսկող մարմիններին (Հայաստանում՝ «Դեղերի և բժշկական տեխնոլոգիաների փորձագիտական կենտրոն»-ը, հեղ. ) կիրառել միասնական մոտեցումներ դեղամիջոցների որակի գնահատման ժամանակ։ 

Հիշեցնենք, որ դեռևս 2017թ մայիսի 6-ից Եվրասիական տնտեսական միության երկրներում դեղարտադրության բոլոր փուլերը՝ սկսած մշակումից, արտադրությունից, դեղագործական արտադրանքների կլինիկական և նախակլինիկական փորձարկումներից, իրականացվում էին ԵՏՀ ընդունած որոշումներին համապատասխան: 

Այդ պատճառով էլ 2017թ. որոշվել է ստեղծել միասնական դեղագիրք, որի մշակման փուլում հաշվի են առնվել նաև միության անդամ պետությունների ազգային դեղագրքերը։ 

Նշենք, որ վերջերս հաստատվել էր նաև 2016թ նոյեմբերի 3-ին ընդունված № 93 որոշման մեջ փոփոխություններ կատարելու նախագիծը, ըստ որի՝ մինչև 2025թ ավարտը երկարացվում է ԵԱՏՄ երկների GMP-ի (ՊԱԳ- պատշաճ արտադրական գործունեություն, հեղ. ) ճանաչման գործընթացը։

գլխավոր լուսանկարը՝ Անի Սարգսյանի