HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գայանե Հովսեփյան

Հադրութցիները Հադրութը վերադարձնելու պահանջով ակցիա են իրականացնում Ֆրանսիայի, Ռուսաստանի և ԱՄՆ-ի դեսպանատների առջև

Հադրութի շրջանի բնակիչներն այսօր՝ նոյեմբերի 12-ին, ակցիաներ իրականացրին Ֆրանսիայի, Ռուսաստանի, ապա նաև ԱՄՆ-ի դեսպանատների առջև՝ վանկարկելով «Հադրութը մերն է», «Վերադարձրեք Հադրութը», «Հադրութն Արցախ է», «Հադրութը պատմական Դիզակն է»:

Դեռ երեկ «Հետք»-ը գրել էր, որ հադրութցիները բաց նամակով դիմել են Արցախի նախագահ Արայիկ Հարությունյանին՝ պահանջելով ամբողջությամբ վերադարձնել Հադրութի շրջանը: Այսօր էլ պահանջը նույն է՝ Հադրութի դեօկուպացիա Ադրբեջանից:

Հադրութցիներն առաջինը այցելեցին Ֆրանսիայի դեսպանատուն: Հայաստանում Ֆրանսիայի դեսպան Ջոնաթան Լաքոտը զրուցեց ակցիայի մասնակիցների հետ և տեղեկացրեց, որ այսօր Ֆրանսիայի նախագահ Էմանուել Մակրոնը հանդիպում է ունենալու Հայաստանի ներկայացուցիչների հետ և քննարկելու է իրավիճակը, որ Ֆրանսիան չի ստորագրել այդ թղթի տակ, և կատարվածը պետք է ներկայացնի նաև Հայաստանի շահերը: Ակցիայի մասնակիցները դեսպանին փոխանցեցին նամակ:

Մեզ հետ զրույցում ակցիայի մասնակից Արփի Վանյանը նշեց, որ Հադրութը չի եղել և այսօր էլ չի կարող մնալ Ադրբեջանի տիրապետության տակ, և Հադրութը վերադարձնելու պահանջով նմանատիպ նամակներ հանձնելու են նաև Ռուսաստանի և ԱՄՆ-ի դեսպանատներին:

Հադրութցիները չկարողացան հանդիպել Ռուսաստանի դեսպանի հետ, սակայն դեսպանատան աշխատակցի միջոցով փոխանցեցին նամակ, այնուհետև շարժվեցին ԱՄՆ դեսպանատուն:

ԱՄՆ դեսպանատուն մտան հադրութցի մի քանի կին: Դուրս գալով դեսպանատնից՝ վերջիններս հայտնեցին, որ դեսպանը նշել է, թե ինքն էլ շահագրգռված է խնդրի հանգուցալուծմամբ, և առաջիկայում հրավիրելու է հանդիպում, որին կարող են նաև հադրութցիները մասնակցել:

«Նամակը վերցրին ու ասացին, որ կապ կհաստատեն մեզ հետ և կհրավիրեն քննարկումների»,- տեղեկացրեց ակցիայի մասնակիցը:

Հադրութցիները ցանկանում են նաև հանդիպել Հայաստանի արտգործնախարարի հետ:

Մեկնաբանություններ (1)

Ռուբեն
Սպասում եմ արդարություն աշխարհի կողմից

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter