Թուրքիայի արտաքին գործերի նախարար Մևլյութ Չավուշօղլուն, Թուրքմենստանի արտաքին գործերի նախարար Ռաշիդ Մերեդովի հետ Անկարայում կայացած մամլո ասուլիսի ժամանակ, հայտարարել է, որ Թուրքիան փորձում է Վրաստանին համոզել՝ միանալու «3+3» ձևաչափին։

«Հուսանք, որ Վրաստանը կմասնակցի «3+3» ձևաչափին։ Դրանից կշահեն բոլորը»,- նշել է թուրք նախարարը։

Մևլյութ Չավուշօղլուն նաև հիշեցրել է, որ Վրաստանում տեղի է ունեցել կառավարության փոփոխություն, իսկ Ադրբեջանի, Թուրքիայի ու Վրաստանի արտաքին գործերի նախարարների Բաքվում նախատեսված հանդիպումը հետաձգվել է։

Դեռ 2021 թվականի հունվարին Մևլյութ Չավուշօղլուն հայտարարել էր, որ Թուրքիայի իշխանությունները ծրագրում են ընդլայնել ղարաբաղյան հակամարտության կարգավորումը՝ ձևավորելով «3+3» ձևաչափը։

«Մեզ անհրաժեշտ է նպաստել կրակի դադարեցմանը։ Այնպես որ, մենք ծրագրում ենք համագործակցել «3+3» ձևաչափով»,- նշել է Չավուշօղլուն։ «3+3» ձևաչափ ասելով՝ Թուրքիայի արտաքին քաղաքական գերատեսչության ղեկավարն ի նկատի ուներ Հայաստանին, Ռուսաստանին, Ադրբեջանին, Իրանին, Վրաստանին և Թուրքիային։

Լուսանկարը՝ Getty Images-ի