Մարիա Զախարովա․ «Երևանն ու Բաքուն կառուցողական են տրամադրված»
Երևանն ու Բաքուն կառուցողական տրամադրվածություն են ցուցաբերում Լեռնային Ղարաբաղի հարցով ձևավորված աշխատանքային եռակողմ խմբի շրջանակներում։ Այս մասին մարտի 12-ին կայացած ճեպազրույցին նշել է Ռուսաստանի Դաշնության արտաքին գործերի նախարարության (ՌԴ ԱԳՆ) պաշտոնական ներկայացուցիչ Մարիա Զախարովան։
«Մենք ցանկանում ենք ընդգծել Բաքվի ու Երևանի կառուցողական տրամադրվածությունը Լեռնային Ղարաբաղի հարցով եռակողմ աշխատանքային խմբի շրջանակներում՝ Ռուսաստանի, Հայաստանի և Ադրբեջանի փոխվարչապետների համանախագահությամբ»,- ասել է Զախարովան։
ՌԴ ԱԳՆ ներկայացուցիչը հիշեցրել է, որ եռակողմ աշխատանքային խմբի գլխավոր առաջադրանքը ձեռքբերված պայմանավորվածությունների համաձայն՝ տարածաշրջանում բոլոր տնտեսական և տրանսպորտային կապերի ապաշրջափակումն է։
«Մենք հույս ունենք, որ դրական տրամադրվածությունն ու փոխադարձ ընդունելի կետերի փնտրտուքը կգերակշռի ինչպես պաշտոնական մեկնաբանություններում, այնպես էլ Հայաստանի և Ադրբեջանի մեդիադաշտերում»,- հավելել է Զախարովան։
Հիշեցնենք, որ 2021 թվականի հունվարի 11-ին Մոսկվայում Ռուսաստանի, Հայաստանի և Ադրբեջանի ղեկավարների հանդիպման արդյունքներով համատեղ հայտարարություն ընդունվեց, համաձայն որի՝ տարածաշրջանում տրանսպորտային և տնտեսական ուղիների ապաշրջափակման հարցերով զբաղվող եռակողմ աշխատանքային խումբ ձևավորվեց՝ երեք երկրների փոխվարչապետների համանախագահությամբ։ Աշխատանքային խմբում Հայաստանը ներկայացնում է փոխվարչապետ Մհեր Գրիգորյանը։
Լուսանկարը՝ ՌԴ ԱԳՆ մամուլի ծառայության
Մեկնաբանել