Ծանր հանցագործությունների Բաքվի դատարանում սկսվել է 13 հայ ռազմագերիների դատավարության նախնական դատական նիստը. նրանք մեղադրվում են, իբր, ահաբեկչական նպատակներով Ադրբեջանի տարածք ներթափանցելու մեջ։ Այդ մասին հայտնում է ադրբեջանական Trend գործակալությունը։ 

Մեղադրյալի կարգավիճակում են Եղիշե Աստանյանը, Կարեն Արամյանը, Տիգրան Ավագյանը, Գրիգոր Գևորգյանը, Հովսեփ Մանուկյանը, Գևորգ Մարտիրոսյանը, Ռոբերտ Գևորգյանը, Վաղարշակ Ավետիսյանը, Վոլոդյա Հակոբյանը, Անդրանիկ Սուքիասյանը, Անդրանիկ Մանուկյանը, Գրիգոր Սաղաթելյանը և Էդուարդ Կիրակոսյանը։ Նախնական նիստի ժամանակ ճշտվել են ռազմագերիների տվյալները։ 

Ավելի վաղ, ադրբեջանական լրատվամիջոցները հայտնել էին, որ Պետական անվտանգության ծառայության գլխավոր քննչական վարչությունում հարուցվել էր քրեական գործ՝ 2020 թվականի դեկտեմբերի 13-ին, Խծաբերդ-Հին Թաղեր հատվածում, հայ ռազմագերիների գերեվարման կապակցությամբ, որոնք մեղադրվում էին, իբր, նոյեմբերի 9-ի միացյալ հայտարարությունից հետո ադրբեջանական վերահսկողության տակ անցած տարածքներ ներթափանցելու մեջ։ Ըստ մեղադրանքի՝ նրանք, իբր, պատրաստվում էին ահաբեկչական գործողություններ իրականացնել այնտեղ։ 

Լուսանկարը՝ Trend.az-ի

Ադրբեջանի Պետական անվտանգության ծառայության քննչական վարչությունը նշում է, որ ՀՀ քաղաքացիներից բաղկացած խումբը, իբր, անօրինական ճանապարհով զենք, զինամթերք, պայթուցիկ սարքեր է ձեռք բերել և ստեղծել օրենքով չնախատեսված զինված խմբավորում։ Խմբի անդամները, իբր, 2020 թվականի նոյեմբերի 26-27-ը զբաղեցրել են Հադրութի հյուսիս-արևմտյան հատվածում գտնվող մարտական դիրքերը, իսկ մինչև 2020 թվականի դեկտեմբերի 13-ը, իբր, հարձակումներ գործել ձեռնարկությունների, տնտեսությունների, նաև՝ առանձին անձանց վրա, կազմակերպել պայթյուններ, հրդեհներ և ահաբեկչական այլ գործողություններ։ 

Ավելի վաղ հայտարարվել էր, որ 14 ռազմագերիների, իսկ այնուհետ՝ ևս 13-ի գործով հետաքննությունն ավարտվել է և մեղադրական եզրակացության հետ միասին ուղարկվել Բաքվի դատարան։ Հունիսի 2-ին սկսվել էր հայ գերիներ Լյուդվիգ Մկրտչյանի և Ալյոշա Խոսրովյանի դատավարությունը, որոնք մեղադրվում են Արցախյան առաջին պատերազմի ընթացքում իբր «ադրբեջանցի գերիներին խոշտանգելու և իրականացրած այլ հանցագործությունների մեջ»։ 

Հիշեցնենք, որ դեռ 2020 թվականի դեկտեմբերի 16-ին Արցախի Պաշտպանության բանակը տարածել էր հաղորդագրություն, համաձայն որի՝ Հադրութի շրջանի Խծաբերդ-Հին Թաղեր հատվածում անհետ կորել էր 73 հայ զինծառայող: Ավելի վաղ, զինծառայողները հայտնվել էին շրջափակման մեջ, որոնց մի մասին հնարավոր էր եղել հանել այնտեղից։

Լուսանկարը՝ Trend.az-ի