Եվրոպական խորհրդի նախագահ Շառլ Միշելը շնորհավորել է վարչապետի պաշտոնակատար Նիկոլ Փաշինյանին՝ 2021 թվականի հունիսի 20-ին արտահերթ խորհրդարանական ընտրություններում «Քաղաքացիական պայմանագիր» կուսակցության հաղթանակի կապակցությամբ։ Այդ մասին նա գրառում է արել թվիթերյան իր միկրոբլոգում։ 

Warm congratulations to @NikolPashinyan on elections victory.

The EU stands by Armenia ?? in support of deepening reforms.

We are also ready to further support regional stabilisation and comprehensive conflict settlement.

— Charles Michel (@eucopresident) June 21, 2021

«Իմ ջերմ շնորհավորանքներն եմ հղում Նիկոլ Փաշինյանին ընտրություններում հաղթելու կապակցությամբ։ Եվրամիությունն աջակցում է Հայաստանին խորը բարեփոխումների իրականացման հարցում։ Մենք նաև պատրաստ ենք շարունակել աջակցել կայունությանն ու տարածաշրջանային հակամարտության համալիր կարգավորմանը»,- գրել է Միշելը։

Հիշեցնենք, որ հունիսի 20-ին Հայաստանում կայացան արտահերթ խորհրդարանական ընտրություններ։ Դրան մասնակցում էր 25 քաղաքական ուժ, որոնցից 4-ը դաշինքներ էին, իսկ մնացածը՝ կուսակցություններ։ Նրանցից շատերը նոր ձևավորված ուժեր էին, որոնք մինչ այս անծանոթ էին հայաստանցի ընտրողներին։

Ընտրություններին մասնակցել էր քվեարկելու իրավունք ունեցող 2 593 572 քաղաքացիներից 1 281 174-ը կամ 49,4 %-ը։ Ընտրությունների արդյունքում խորհրդարանում հայտնվել է քաղաքական երեք ուժ. «Քաղաքացիական պայմանագիր» կուսակցությունը, որի օգտին քվեարկել էր ընտրողների 53,92 %-ը, «Հայաստան» դաշինքը, որի օգտին քվեարկել էր ընտրողների 21,04 %-ը և «Պատիվ ունեմ» դաշինքը, որի օգտին էլ քվեարկել էր ընտրողների 5,23 %-ը։ 

Լուսանկարը՝ ՀՀ կառավարության մամուլի ծառայության