ՌԴ նախագահ Վլադիմիր Պուտինը հինգշաբթի օրը՝ մարտի 3-ին, ՌԴ Պետդումայի վավերացմանն է ներկայացրել ՀԱՊԿ խաղաղապահ գործունեության մասին համաձայնագրում փոփոխություններ անելու վերաբերյալ արձանագրությունը, որը նախատեսում է «համակարգող պետության» հասկացության սահմանում, ինչը ենթադրում է, որ ՀԱՊԿ-ում կձևավորվեն խաղաղապահ ուժեր, որոնք կմասնակցեն ՄԱԿ-ի հովանու ներքո իրականացվող խաղաղապահ առաքելություններին։ Այդ մասին հայտնում է ТАСС գործակալությունը։

«Արձանագրությամբ ներդրվում է «համակարգող պետություն» հասկացությունը և նախատեսվում է, որ Հավաքական անվտանգության պայմանագրի կազմակերպության կազմում ստեղծվում են հավաքական խաղաղապահ ուժեր, որոնք կմասնակցեն խաղաղությանն ուղղված ՄԱԿ-ի առաքելություններին»,- նշվում է բացատրական գրության մեջ։

Փոփոխության համաձայն՝ «խաղաղության ապահովմանն ուղղված ՄԱԿ-ի առաքելություններին մասնակցելու համար՝ հավաքական խաղաղապահ ուժերը ստեղծվում են համակարգող պետության հովանու ներքո»։ «ՄԱԿ-ի խաղաղապահ առաքելություններին հավաքական խաղաղապահ ուժերի մասնակցության պայմանները սահմանվում են համաձայնագրում, որը համակարգող պետությունը կնքում է ՄԱԿ-ի լիազոր մարմնի հետ», - նշված Է փաստաթղթում:

Արձանագրությունը ստորագրվել է 2021 թվականի սեպտեմբերի 16-ին, Դուշանբեում։ ՌԴ Պետդումայում փոփոխության ներկայացման հիմնական զեկուցող է նշանակվել ՌԴ ԱԳ փոխնախարար Ալեքսանդր Պանկինը։

Հիշեցնենք, որ ՀԱՊԿ-ը երկու ամիս առաջ խաղաղապահ առաքելությամբ ուժեր էր ուղարկել Ղազախստան, որտեղ հունվարի 2-ից բողոքի ցույցեր էին ընթանում։

Հունվարի 5-ին Ղազախստանի նախագահ Կասիմ-Ժոմարտ Տոկաևը դիմեց Հավաքական անվտանգության պայմանագրի կազմակերպության անդամ երկրների առաջնորդներին՝ խնդրելով «օգնություն ցուցաբերել Ղազախստանին ահաբեկչական սպառնալիքը հաղթահարելու համար»։

Կազմակերպությունը Ղազախստան էր ուղարկել հավաքական խաղաղապահ ուժեր, որոնք պետք է ձեռնամուխ լինեին պետական օբյեկտների պահպանությանը և օգնեին տեղական իրավապահ մարմիններին։ Հայաստանը Ղազախստան էր ուղարկել խաղաղապահ ուժերի 100 զինծառայողի։ Հունվարի 14-ին հայկական առաքելությունը դուրս բերվեց Ղազախստանից։

Լուսանկարը՝ Russian Defense Ministry Press Service via AP