Կառավարությունն առաջարկում է փոփոխություններ եւ լրացումներ կատարել «Ավիացիայի մասին» օրենքում, որոնցով, մասնավորապես, մեծացվելու են այս ոլորտում տարածքային կառավարման եւ ենթակառուցվածքների նախարարության (ՏԿԵՆ) եւ նախարարի լիազորությունները:

Առանցքային փոփոխություններից են թռիչքային թույլտվություններին վերաբերող կետերը:

Ընթերցողին հիշեցնենք, որ «Ավիացիայի մասին» օրենքով մեր երկրում ավիացիոն ոլորտը տարանջատված է 2 տեսակի՝ քաղաքացիական ավիացիայի եւ պետական ավիացիայի: Գործող օրենքում, ի տարբերություն նախկինի, պետական ավիացիայի սահմանում տրված չէ, սակայն որպես այդպիսին պետք է հասկանալ պետական մարմիններին (օրինակ՝ ՊՆ, ոստիկանություն, ԱԻՆ, կառավարական այլ մարմիններ) ենթակա ավիացիան: Բացի ռազմական ավիացիայից, որը ՊՆ-ի տիրույթն է, մնացած պետական ավիացիան, ինչպես եւ քաղավիացիան կանոնակարգում է ՀՀ քաղավիացիայի կոմիտեն (ՔԱԿ), որը ենթակա է ՏԿԵՆ-ին:

Քաղավիացիան, ինչպես ասվում է օրենքում, ներառում է առեւտրային ավիացիան եւ ընդհանուր նշանակության ավիացիան:

Գործող օրենքով կանոնավոր եւ ոչ կանոնավոր (չարտերային) առեւտրային թռիչքների համար իրավունք տվողը ՔԱԿ-ն է:

Տեղական՝ հայկական կազմակերպությունները կանոնավոր առեւտրային (կոմերցիոն) թռիչքներ կատարելուց առաջ պետք է ստանան հավաստագիր: Կանոնավոր առեւտրային օդային փոխադրումների իրականացման հավաստագիրը պաշտոնական փաստաթուղթ է, որն իրավունք է վերապահում վճարմամբ կամ վարձակալմամբ իրականացնելու ուղեւորների, փոստի եւ (կամ) բեռի փոխադրում: ՔԱԿ-ը հավաստագիր ստացած իրավաբանական անձին (օդանավ շահագործողին) վերջինիս հայտի հիման վրա նշանակում է հայտում նշված ուղղություններով կանոնավոր օդային հաղորդակցություններ իրականացնող փոխադրող:

Իսկ ահա օտարերկրյա կազմակերպությունները դեպի Հայաստան թռիչքներ կատարելու համար ՔԱԿ-ից ստանում են կանոնավոր առեւտրային օդային հաղորդակցությունների իրականացման թույլտվություն, որը նրանց իրավունք է վերապահում իրականացնելու կանոնավոր առեւտրային թռիչքներ դեպի ՀՀ տարածք, տարածքից դուրս եւ տարածքի ներսում: Այլ խոսքերով՝ արտասահմանյան ընկերություններն իրենց երկրների ավիացիոն իշխանություններից նախ ստանում են նշանակումներ՝ կոնկրետ ուղղություններով Հայաստան թռչելու համար (օրինակ՝ Մոսկվա-Երեւան-Մոսկվա), ինչից հետո դիմում են ՀՀ ՔԱԿ-ին, որն իր հերթին տալիս է համապատասխան թույլտվություն:

Եվ հիմա կառավարությունը, որն արդեն ընդունել է օրենքում փոփոխություններ եւ լրացումներ կատարելու նախագիծը, ԱԺ-ին առաջարկում է վերը նշված գործառույթները ՔԱԿ-ից փոխանցել ՏԿԵ նախարարությանը:  

Գործադիրը դա հիմնավորել է այսպես. «Կանոնավոր առեւտրային օդային փոխադրումների իրականացման հավաստագրի տրամադրումը, ինչպես նաեւ կանոնավոր առեւտրային օդային հաղորդակցությունների իրականացման նշանակումները եւ թույլտվությունը պետք է իրականացնի ՏԿԵՆ-ը՝ որպես ոլորտում կառավարության քաղաքականությունը մշակող եւ իրականացնող նախարարություն: Նախագիծը մշակելիս հաշվի է առնվել այն հանգամանքը, որ կանոնավոր առեւտրային օդային հաղորդակցությունների իրականացման նշանակումները եւ թույլտվությունը տրամադրվում են օդային հաղորդակցությունների մասին միջկառավարական համաձայնագրերի հիման վրա եւ անմիջապես կապված են կառավարության կողմից վարվող քաղաքականության հետ»:

Կանոնավոր առեւտրային թռիչքներից բացի՝ գոյություն ունեն նաեւ ոչ կանոնավոր (չարտերային) թռիչքներ:

Ոչ կանոնավոր թռիչքների համար թե՛ տեղական, թե՛ արտասահմանյան ընկերությունները պարտավոր են ձեռք բերել թույտվություն, իսկ տվողը, համաձայն գործող օրենքի, կրկին ՔԱԿ-ն է: Ոչ կանոնավոր առեւտրային օդային հաղորդակցությունների իրականացման թույլտվությունները պաշտոնական փաստաթղթեր են, որոնք իրավունք են վերապահում ՀՀ եւ օտարերկրյա օդանավ շահագործողներին իրականացնելու ոչ կանոնավոր առեւտրային թռիչքներ դեպի ՀՀ տարածք, տարածքից դուրս եւ տարածքի ներսում:

Այս դեպքում եւս կառավարությունն առաջարկում է ՔԱԿ-ի գործառույթը հանձնել վերադաս նախարարությանը:

Հատկանշական է, որ կառավարությունը ընդհանուր նշանակության ավիացիայի թռիչքային թույլտվություններ տալու լիազորությունը թողել է ՔԱԿ-ին:

Տես նաեւ՝

• Ավիացիոն պատահարների եւ լուրջ միջադեպերի փորձագիտական մարմին ստեղծելու գաղափար կա
• Եթե անվտանգային ռիսկեր լինեն, օդանավակայան մտնողները զննում են անցնելու
• Հայաստանում կլինեն ոչ միայն աերոդրոմներ եւ ուղղաթիռադաշտեր, այլեւ թռիչքային հարթակներ