Պաշտպանության նախարարությունը նախատեսում է 2022 թվականի օգոստոսի 1-ից մինչև հոկտեմբերի 30-ը անցկացնել պահեստազորայինների վարժական հավաքներ՝ ներգրավելով 1444 քաղաքացու։ Կառավարության այս որոշման նախագիծը ներկայացվել է իրավական ակտերի նախագծերի հրապարակման միասնական կայքում։

Հավաքներին ներգավելիք 1444 պահեստազորայիններից 1249-ը կլինեն շարքային և կրտսեր ենթասպայական կազմերից, 65-ը՝ ավագ ենթասպայական կազմից, 130-ը՝ սպայական կազմից։ Վարժական հավաքներին կմասնակցեն համազորային (մոտոհրաձգային, կապի, հետախուզական ինժեներական) և հրթիռահրետանային մասնագիտություն ունեցող պահեստազորայիններ։

Ինչպես նշված է որոշման նախագծում, երեք ամիս ժամկետով՝ 2022 թվականի օգոստոսի 1-ից մինչև հոկտեմբերի 30-ը, ռազմատրանսպորտային պարտակա­նություններ ունեցող մարմիններից կներգրավվի մինչև 140 միավոր տրանս­պորտային միջոց:

Պաշտպանության նախարարությունը հայտնում է, որ անհրաժեշտության դեպքում վարժական հավաքներին մասնակցող պահեստազորայինները կներգրավվեն նաև մարտական հերթապահությունում։

Ըստ նախագծի հիմնավորման՝ վարժական հավաքները հայտարարվում են պահեստազորայինների ռազմական ունակությունների կատա­րելա­­­գոր­ծման, մասնագիտական վերապատրաստ­ման և պատրաստման, բարձրագույն կրթություն ունեցող ենթասպա­յա­կան կազմից պահեստա­զորի սպաների պատ­րաս­տման նպատակով։

Հիշեցնենք, որ 2022թ․ ընթացքում սա կլինի պաշտպանության նախարարության հայտարարած արդեն երրորդ վարժական հավաքը։ Այս տարվա ընթացքում առաջինը կազմակերպվել է ապրիլի 15-ից հունիսի 15-ը՝ 724 քաղաքացու մասնակցությամբ, իսկ երկրորդը՝ ապրիլի 1-ից հունիսի 30-ը՝ 1400 պահեստազորայինի ներգրավմամբ։

Հավելենք, նախագիծն օրինական ուժ կստանա կառավարության հավանությանն արժանանալուց հետո։