«Քաղաքացիական պայմանագիր» խմբակցության քարտուղար Արթուր Հովհաննիսյանը չգիտի, թե ինչ գաղտնիք էր ուզում բացահայտել վարչապետ Նիկոլ Փաշինյանը երեկ տեղի ունեցած ԱԺ-Կառավարություն հարցուպատասխանին: Փաշինյանը հայտարարեց, որ կարևոր բացահայտում է անելու, սակայն ընդդիմությունը լքեց նիստերի դահլիճը, ինչից հետո Փաշինյանը բացահայտումը չարեց:

«Տեսաք, որ վարչապետն ասելիք ուներ ընդդիմադիրներին, ընդդիմադիրներն, այդ փաստով պայմանավորված, միանգամից փախան դալիճից, որովհետև, ըստ էության, ճշմարտությունից մշտապես փախել է ընդդիմությունը, և սա էլ բացառություն չէր»,-խորհրդարանական ճեպազրույցներին ասաց պատգամավոր Արթուր Հովհաննիսյանը:

ՔՊ-ական պատգամավորը հիշեցրեց վարչապետի խոսքերը, թե իր բացահայտումը կանի՝ նայելով ընդդիմադիրների աչքերին:

«Երբ պատեհ պահը գա, վարչապետը կասի իր ասելիքն ընդդիմադիրների ներկայությամբ»,- ասաց նա:

Պատգամավորի կարծիքով՝ ընդդիմության նպատակը ոչ թե Արցախը փրկելն է, այլ՝ իշխանության զավթման անհաջող փորձը:

«Իրենք կոչեր են հնչեցնում, կենացներ Արցախի փրկության մասին, բայց մենք տեսնում ենք իրականությունը, որը կա Երևանում: Արցախի դրոշ տեղադրելով՝ իրենք չեն կարող Արցախը փրկել, և նրանց նպատակը բոլորովին այլ է»,- ասում է իշխանական պատգամավորը:

Հովհաննիսյանի հավաստիացմամբ՝ իշխանությունը բազմիցս է երկխոսության ձեռք մեկնել ընդդիմությանը, առաջարկել ծանոթանալ փաստաթղթերին, տեղեկատվությանը, որոնք հնարավոր չէ հրապարակային հնչեցնել, սակայն ընդդիմության արձագանքը միշտ այնպիսին է, ինչպես երեկ:

«Ընդդիմությունը, ինչպես և նախորդ դեպքերում, փախել է ճշմարտությունից, որովհետև եթե ծանոթանան ողջ ճշմարտությանը, չեն կարող դուրս գալ փողոց և ծակ բաժակներով կենացներ ասել»,- ասաց Արթուր Հովհաննիսյանը:

Լրագրողի դիտակմանը, որ երեկ խորհրդարանում լուսաձայնային նռնակներ էին տեղադրվել, ԱԺ բակում բազմաթիվ ԱԱԾ-ականներ կային, այդ թվում՝ դիպուկահարներ, արդյոք այդպե՞ս է Փաշինյանը խոնարհվում ժողովրդի առջև, Հովհաննիսյանն արձագանքեց.

«Դուք երևի մոռացել եք՝ ինչ է կատարվել երկրում վերջին մեկ տարում, մոռացել եք երևի՝ ինչու փակվեցին ԱԺ դարպասները, ինչ եղավ ԱԺ շենքում, Կառավարությունում նոյեմբերի 9-ին, երևի ԱԺ նախագահի դեմ մահափորձը մոռացել եք… Էդ ամենի ակտիվ մասնակիցներն ու կազմակերպիչները դեռևս կան ու ակտիվություն են ցուցաբերում: ՀՀ-ում ժողովրդավարությունից մի միլիմետր շեղում չի լինելու և ցանկացած ոտնձգություն շատ կոշտ օրենքի պատին է հանդիպելու»:

ԱԺ նիստերը բոյկոտող ընդդիմությունը երեկ եկել էր խորհրդարան՝ մասնակցելու Կառավարության հետ հարցուպատասխանին, սակայն հարցուպատասխանը տապալվեց։ Ընդդիմությունը, չլսելով վարչապետ Փաշինյանի պատասխանը, հեռացավ նիստերի դահլիճից: ԱԺ նիստին զուգահեռ, ԱԺ շենքի հարևանությամբ հազարավոր ցուցարարներ էին հավաքվել և վանկարկում էին` «առանց Նիկոլ Հայաստան»: Օրվա ավարտին ԱԺ փոխխոսնակ Իշխան Սաղաթելյանը վստահեցրեց՝ իշխանություններին հաշված օրեր են մնացել պաշտոնավարելու համար: