Վարչապետ Նիկոլ Փաշինյանը Վանաձոր խոշորացված համայնքի ղեկավարի պաշտոնակատար է նշանակել, սակայն համայնքային կառավարման առումով նշանակումը որևէ դեր չի ունեցել: Վանաձորի ընտրություններում ձայների մեծամասնությունը ստացած «Ասլանյան դաշինքը» (15 մանդատ) հայտարարել է ավագանու նիստերը բոյկոտելու մասին: «Հայրենիք» խմբակցության ղեկավար Վահե Դոխոյանը ևս հայտնել է բոյկոտին միանալու մասին (2 մանդատ): Մյուս ուժերը` ՔՊ-ն, ՀԱՍԿ-ը և «Ապրելու երկիրը» միասին ունեն 16 մանդատ, հետևաբար այս երեք ուժերով նրանք չեն կարող քվորում ապահովել (մանդատների ընդհանուր թիվը 33 է), իսկ «Լուսավոր Հայաստանի» դատական վեճը դեռ լուծված չէ:

«Ապրելու երկիր» խմբակցության անդամ Արտավազդ Ալավերդյանը մեզ հետ զրույցում ասաց` չեն նույնականանում որևէ ուժի հետ, երբ ավագանու նիստի նախաձեռնություն է եղել, մասնակցել են՝ անկախ նրանից, թե որ ուժն է այն հրավիրել:

«Մեր դիրքորոշումն անփոփոխ է, մեզ համար նորմալ է ու ընդունելի, երբ ՏԻՄ իշխանությունները ձևավորվում են ընտրությունների արդյունքում: Սա, չգիտեմ, միգուցե ստիպված որոշում է եղել կառավարության կողմից (նկատի ունի համայնքապետի ժ/պ-ի նշանակումը-հեղ.): Մեզնից ինչ կախված է, մենք անելու ենք, որ քաղաքի համար ինչ-որ գործ արվի, բայց փաստացի վեց ամիս է ավագանու ինստիտուտն անգործության է մատնված: Մեր պատկերացմամբ, պետք է օր առաջ նոր ընտրություններ լինեն, որ ժողովրդավարական ինստիտուտի հենքի վրա իշխանություն ձևավորվի»,-ասաց նա:

Նշենք, որ մինչ այժմ ավագանու որևէ նիստ չի գումարվել: Ավագանու առաջին նիստը պետք է համայնքապետի ընտրման օրակարգով լիներ, սակայն քանի որ կա դատական վեճ, և դատարանը համայնքապետի ընտրության վրա արգելանք է դրել, նման օրակարգով նիստ չի գումարվել: Բացի այդ` «Ասլանյան դաշինքի» նախաձեռնած նիստերը տապալվել են քվորում չլինելու պատճառով. ՔՊ-ն և ՀԱՍԿ-ը չեն մասնակցել:

Փաշինյանը մայիսի 13-ին ՀԱՍԿ-ի ցուցակի առաջին համար Արկադի Փելեշյանին նշանակել է համայնքապետի ժամանակավոր պաշտոնակատար: Վերջինս հայտնի է իր քրեական անցյալով: Ընտրություններին նրա օգտին քվեարկել էր 4809 քաղաքացի:

Նախորդ տարվա դեկտեմբերի 6-ին կայացած ընտրություններում ձայների մեծամասնությունը ստացել էր «Ասլանյան դաշինքը», սակայն չէր ձևավորել մեծամասնություն:

Ընտրությունների ավարտից օրեր անց դաշինքի առաջնորդ, նախկին քաղաքապետ Մամիկոն Ասլանյանը նախ ձերբակալվել, ապա կալանավորվել էր: Նա մեղադրվում է համայնքապատկան հողերի նշանակության փոփոխության և պաշտոնեական դիրքի չարաշահման համար։ Ասլանյանը, սակայն առաջադրված մեղադրանքը չի ընդունում:

Ընտրությունների արդյունքների վերահաշվարկի՝ «Լուսավոր Հայաստան» կուսակցության բողոքարկման պահանջի հետևանքով վարչական դատարանը արգելանք է սահմանել, որի համաձայն՝ ավագանին իրավունք չունի համայնքապետ ընտրելու օրակարգով նիստ հրավիրել:

Նշենք, որ ընտրություններին մասնակցել էր 33 199 ընտրող կամ ընտրելու իրավունք ունեցող քաղաքացիների 36.01%-ը: 62 215 ընտրող չէր մասնացել ընտրություններին: 12 810 ընտրող քվեարկել էր «Մամիկոն Ասլանյան» դաշինքի և, մասնավորապես, Մամիկոն Ասլանյանի օգտին, 8295 ընտրող՝ Լոռու մարզպետ Արամ Խաչատրյանի օգտին և 4809 ընտրող` ՀԱՍԿ-ի առաջնորդ Արկադի Փելեշյանի օգտին: Ի դեպ, վերջինս 2016 թվականրի ընտրություններին մասնակցում էր «Հայկական վերածնունդ» կուսակցության ցուցակով:

Ստեղծված իրավիճակին կալանավայրից անդրադարձել է նաև Մամիկոն Ասլանյանը` նախ դատապարտելով ՏԻՄ օրենքի` քաղաքական մեծամասնության ընդունած վերջին փոփոխությունները, ապա հայտարարելով, որ իր գլխավորած դաշինքը չի մասնակցելու որևէ ապօրինության և ինքը տեր է կանգնելու ստացած յուրաքանչյուր քվեին: