Ռուսաստանի նախագահ Վլադիմիր Պուտինն ու Ադրբեջանի նախագահ Իլհամ Ալիևը մեկ շաբաթվա մեջ երկրորդ անգամ հեռախոսազրույց են ունեցել։ Կրեմլի մամուլի ծառայության փոխանցմամբ՝ կողմերը հեռախոսազրույցի ընթացքում քննարկել են Հայաստանի, Ռուսաստանի և Ադրբեջանի առաջնորդների եռակողմ պայմանավորվածությունների կատարման ընթացքը։

«Քննարկվել են Ռուսաստանի, Ադրբեջանի և Հայաստանի ղեկավարների եռակողմ պայմանավորվածությունների իրականացման հետագա քայլերը՝ շեշտը դնելով տարածաշրջանում տրանսպորտային և տնտեսական կապերի ապաշրջափակման գործնական հարցերի վրա»,- ասված է ռուսական կողմի տարածած հաղորդագրության մեջ։

Վերջին անգամ Պուտինն ու Ալիևը հեռախոսազրույց էին ունեցել նոյեմբերի 22-ին։ Այդ ժամանակ նրանք քննարկել էին հայ-ադրբեջանական սահմանին անվտանգության ապահովման մասով Հայաստանի հետ պայմանավորվածությունների կատարումը և Հարավային Կովկասում տրանսպորտային կապերի վերականգնումը։ Հաջորդ օրը՝ նոյեմբերի 23-ին, Պուտինը Երևանում մասնակցել էր ՀԱՊԿ գագաթնաժողովին և հանդիպել Հայաստանի վարչապետ Նիկոլ Փաշինյանի հետ։

Հոկտեմբերի 31-ին Սոչիում Ալիևի և Փաշինյանի հետ հանդիպումից հետո Վլադիմիր Պուտինը հայտնել էր, որ կողմերը համատեղ հայտարարություն են համաձայնեցրել։ Նա նաև նշել էր, որ հանդիպումն օգտակար է եղել և դա պայմաններ է ստեղծում ընդհանուր առմամբ կարգավորման ուղղությամբ հետագա քայլերի համար։

Լուսանկարը՝ Ադրբեջանի նախագահի մամուլի ծառայության