![](/static/articles/15/44/64/l-fjbNUZWul4.jpg)
Ավստրիան կձերբակալի Պուտինին, եթե նա այցելի այդ երկիր
Ավստրիան, որպես Հռոմի ստատուտի մասնակից, կկատարի իր ստանձնած պարտավորությունները և կձերբակալի ու Միջազգային քրեական դատարանին կարտահանձնի Ռուսաստանի նախագահ Վլադիմիր Պուտինին, եթե վերջինս որոշի այցելել այդ երկիր։ Այդ մասին հայտնում է РБК-Украина-ն՝ հղում անելով Ավստրիայի արդարադատության նախարարության հայտարարությանը։
«Ավստրիան Հռոմի կանոնադրության մասնակից է։ Դա նշանակում է, որ Ավստրիան, ինչպես և պայմանագրի մյուս կողմերը, պարտավոր են համագործակցել Միջազգային քրեական դատարանի հետ։ Դատարանի կողմից տրված ձերբակալման օրդերները պետք է իրագործվեն, իսկ Դատարանի կողմից որոնվող անձինքն պետք է ձերբակալվեն»,- հայտարարել են գերատեսչությունում։
Ավստրիայի արդարադատության նախարարությունում նաև ընդգծել են, որ «2019 թվականին Միջազգային քրեական դատարանը մեկ գործի շրջանակներում (ի նկատի ունեն Սուդանի նախագահ Օմար ալ Բաշիրի գործը-խմբ.) ամրագրել է, որ Դատարանի առաջ իմունիտետ չունեն նույնիսկ երկրների ղեկավարները»։
«Որևէ մեկն օրենքից վեր չէ, ինչը կոնկրետ նշանակում է, որ յուրաքանչյուր հանցագործություն պետք է ամբողջությամբ հետաքննվի։ Անպատժելիություն չպետք է լինի»,- հավելել են գերատեսչությունում։
Հիշեցնենք, որ մարտի 17-ին Հաագայի Միջազգային քրեական դատարանը Ռուսաստանի նախագահ Վլադիմիր Պուտինի և երեխաների հարցերով հանձնակատար Մարիա Լվովա-Բելովայի ձերբակալման օրդերներ էր տվել։ Մեղադրող կողմի վարկածով՝ Ռուսաստանի նախագահն անձամբ պատասխանատվություն է կրում Ուկրաինայի բռնազավթված տարածքներից Ռուսաստան երեխաների բռնի տեղահանման համար։
Կրեմլում, ի պատասխան Միջազգային քրեական դատարանի որոշման, հիշեցրել էին, որ Ռուսաստանը չի ճանաչում Դատարանի իրավասությունը։ ՌԴ ԱԳՆ-ն հայտարարել է, որ օրդերը «չունի որևէ նշանակություն» Ռուսաստանի համար։
Ավելի վաղ, Գերմանիան հայտարարել էր, որ կձերբակալի Պուտինին, եթե վերջինս ժամանի Գերմանիա։ Փոխարենը Հունգարիան հրաժարվել է կատարել դատարանի այդ պայմանը։
Օգոստոսին Հարավաֆրիկյան Հանրապետությունում կայանալու է ԲՐԻԿՍ-ի գագաթնաժողովը, որին հնարավոր է այցելի նաև Ռուսաստանի նախագահ Վլադիմիր Պուտինը։ Ըստ Bloomberg գործակալության՝ այդ երկրի իշխանությունները դժվար թե ձերբակալեն Պուտինին։
Լուսանկարը՝ AP Photo/Ronald Zak, File
Մեկնաբանել