Բարձրագույն դատական խորհուրդը (ԲԴԽ) որոշել է Շիրակի մարզի առաջին ատյանի ընդհանուր իրավասության դատարանի նախագահ Գոռ Հարությունյանին տեղափոխել Երևան՝ Վերաքննիչ դատարան:

Մայիսի 23-ին ԲԴԽ-ն որոշել է հանրապետության նախագահին առաջարկել Գոռ Հարությունյանի թեկնածությունը՝ Վերաքննիչ քաղաքացիական դատարանում հակակոռուպցիոն քաղաքացիական գործերով բողոքարկման ենթակա դատական ակտերի վերանայումն իրականացնող առանձին դատավորի պաշտոնի թափուր տեղում նշանակելու համար:

• Երդման արարողությունից մեկ օր անց դատավորին Շիրակից տեղափոխում են Արմավիր

Եթե նախագահը Գոռ Հարությունյանին նշանակի Վերաքննիչ դատարանի դատավոր, հրամանագիրն ուժի մեջ մտնելու պահից նրա՝ Շիրակի մարզի առաջին ատյանի ընդհանուր իրավասության դատարանի դատավորի լիազորությունները կդադարեն:

Փորձեցինք դատավոր Գոռ Հարությունյանի աշխատակազմից տեղեկանալ, թե այս պահին քանի անավարտ գործ ունի իր վարույթում: Դատավորի օգնականը փոխանցեց, թե տեղեկատվությունը կարող ենք փնտրել «Դատալեքս» տեղեկատվական համակարգում:

Թեև վստահ ենք, որ մեխանիկական եղանակով «Դատալեքս» տեղեկատվական համակարգից տեղեկատվություն ստանալը կարող է ունենալ անճշտություն, սակայն հետևելով դատավորի օգնականի խորհրդին՝ հաշվեցինք, որ Գ. Հարությունյանի վարույթում կա 200-ից ավել անավարտ գործ:

Հարությունյանը Շիրակի մարզում դատավոր նշանակվել է 2019թ. փետրվարին, իսկ նույն տարվա հուլիսին դարձել է նույն դատարանի նախագահը՝ 3 տարի ժամկետով:

• Շիրակի մարզից Երևան տեղափոխված դատավորները համապատասխանում են ԲԴԽ միայն մեկ սկզբունքի՝ մարզում են աշխատել

Հիշեցնենք, որ առաջին դեպքը չէ, երբ Շիրակի մարզի դատավորներին տեղափոխում են այլ դատարան, ինչն առաջացնում է մարզում աշխատող փաստաբանների դժգոհությունը:

• Փաստաբաններն ահազանգում են. Շիրակի մարզում դատավորների տեղափոխումը ծայրահեղ վիճակ է ստեղծել

Փաստաբանները նշում էին, որ ԲԴԽ-ն դատավորների տեղափոխությունով կաթվածահար է անում արդարադատությունը Շիրակի մարզում: Տեղափոխվող դատավորների վարույթում գտնվող գործերը մակագրվում են այլ դատավորների, և գործի քննությունը սկսվում է նորից: