Երևանի Նոր Նորք վարչական շրջանի Թաթուլ Կրպեյանի անվան զբոսայգուց մոտ 2000 քմ տարածք վաճառքի է հանվել։ 2.6 միլիոն դոլարով վաճառվող հողամասը տարիներ առաջ ձեռք է բերվել ընդամենը 268 հազար դրամով։ «Հետքն» ուսումնասիրել է հողամասի սեփականաշնորհման պատմությունը և պարզել, որ գույքն օտարվել է կասկածելի գործարքների արդյունքում։ Տարածքի ներկայիս սեփականատերը Ճարտարապետության և շինարարության Հայաստանի ազգային համալսարանի նախկին ռեկտոր Գագիկ Գալստյանի ընկերությունն է։ 

Մյասնիկյան պողոտայով Նոր Նորք բարձրանալիս, ճանապարհին՝ Թաթուլ Կրպեյանի անվան զբոսայգու սկզբնամասում հողամասի վաճառքի ցուցանակ է փակցված։ Զանգահարելով հողամասի վաճառքով զբաղվող անշարժ գույքի գործակալություն և հանդես գալով որպես հավանական գնորդ՝ պարզեցինք արժեքը. այն վաճառվում է 2 միլիոն 600 հազար ԱՄՆ դոլարով։ Ահա գործակալի հետ մեր զրույցից մի հատված։

-Բարեւ ձեզ։ Գայի պողոտայի սկզբում գտնվող հողը ձե՞ր գործակալությունն է վաճառում։

-Այո։

-Ի՞նչ արժի։

-1900 քառակուսի է, 2 միլիոն 600 հազար։

-Տեսեք, դա այգուն կպած է, կարո՞ղ է այգու տարածք է։

-Չէ, այգու հետ կապ չունի, վկայականով հենց այդ տարածքը կա` 1903 քմ։

-Օրինական, սեփականաշնորհված տարա՞ծք է։

-Այո։

-Ճակատը քանի՞ մետր է։

-Ճակատը մոտ 60-65 մետր է։ Վկայականով բնակավայրերի, շենք-շինությունների կառուցապատման համար է։

-Խառը կառուցապատման տա՞կ է։

-Չէ, գրված է՝ բնակավայրերի ու շենք-շինությունների կառուցապատման համար։ Այս պահին մենք քաղաքապետարան էլ ենք դիմել։ Մի հատ հասկանանք՝ հարկայնությունն ինչքան է, դեռ պատասխան չունենք (խոսքը շենք կառուցելու թույլատրելի հարկայնության մասին է- հեղ․)։

-Վերջերս քաղաքապետարանն այդ տարածքում տներ էր քանդում, պրոբլեմ չի լինի՞։

-Հետևն ա ընկնում, կապ չունի մեր հողի հետ։ Առաջին գիծ է այդ հողը, և այդքանն ամբողջը սեփականության վկայականով է։ Վաղուց սեփականաշնորհված հող է։

Արբանյակից արված լուսանկարներ ներկայացնող «Google Earth» ծրագրի միջոցով հնարավոր է տեսնել վաճառքի հանված հողատարածքի տարբեր տարիների տեսքը։ 2000 թ.-ի դրությամբ հողամասում կան ծառեր և թփեր։ Իսկ արդեն 2004 թ.-ի մայիսին տարածքը կանաչապատ է։ Հաջորդ տարիների լուսանկարներում երևում է, թե ինչպես են «Կրպեյանի» այգում և հարակից տարածքներում տնկված ծառերը փարթամացել։ Սակայն սեփականաշնորհված հատվածում ծառեր չեն տնկվել, և այն բացատի է վերածվել։ 2018 թ.-ին նշված տարածքը հրդեհվել է։

Տարածք մեր այցելության ժամանակ հայտնաբերեցինք տասնամյակներ առաջ կառուցված մի շինություն, որ գտնվում էր հողամասի վերջնամասի՝ ձորակի նմանվող հատվածում (շինությունը մասամբ գետնափոր է)։ Հողամասում առկա էին խորքից հատված հաստաբուն ծառեր։

Գայի պողոտա 2ա հասցեի հողամասի սեփականատերը «Արխմոնստրոյ» ՍՊԸ-ն է, որի բաժնետոմսերի 82 %-ը պատկանում է Ճարտարապետության և շինարարության Հայաստանի ազգային համալսարանի նախկին ռեկտոր Գագիկ Գալստյանին։ Գալստյանը խոշոր շինարարական ընկերությունների հիմնադիր է։ «Շինարարի օրվան» նվիրված հանդիսավոր միջոցառման ժամանակ՝ 2019 թ.-ին, փոխվարչապետ Տիգրան Ավինյանը Գագիկ Գալստյանին է հանձնել «Վաստակավոր շինարարի» կոչումը։ 

Նոր Նորքում գտնվող 1903 քմ հողամասի օտարման պատմությունը սկսվում է 2000 թ.-ից։ Նոր Նորք թաղային համայնքի ավագանին, թաղապետ Մկրտիչ Մինասյանի առաջարկությամբ օտարվող համայնքային գույքի ցանկում է ներառել Գայի պողոտայի սկզբնամասում գտնվող էլեկտրական ենթակայանի նախկին շինությունը։ Համաձայն ավագանու որոշման՝ այն զբաղեցրել է ընդամենը 32 քմ տարածք։ Ավագանու որոշումից օրեր անց Նոր Նորքի թաղապետը ստորագրել է գույքն օտարելու որոշում, որից տեղեկանում ենք, որ աճուրդային կարգով, 268 հազար 800 դրամով այն գնել է քաղաքացի Սաշա Ղուկասյանը։ Գնորդը Գլխավոր դատախազության մարդու դեմ ուղղված հանցագործությունների գործերով վարչության դատախազ Տաթևիկ Ղուկասյանի հայրն է։ Կադաստրի կոմիտեից ստացված տեղեկանքի համաձայն՝ գույքի սեփականատերը հողամասը բաժանել է երկու մասի, որից հետո մի քանի գործարք է կատարվել։

Վերջնարդյունքում՝ 2007 թ.-ին հողամասերը գնել է Ճարտարապետության և շինարարության Հայաստանի ազգային համալսարանի նախկին ռեկտոր Գագիկ Գալստյանին պատկանող «Արխմոնստրոյ» ՍՊԸ-ն։ Այս ընկերությունը միավորել է 2 առանձին տարածքները։ Ուշագրավ է, որ ո՛չ Կադաստրի կոմիտեի տեղեկանքում, ո՛չ Նոր Նորքի ավագանու և համայնքի ղեկավարի որոշումներում չենք հայտնաբերել տվյալ, թե ինչպես է 32 քմ գույքը վերջնարդյունքում դարձել 1903 քմ։

Երևանի քաղաքապետարանը փետրվարի 29-ին ոստիկանության ուղեկցությամբ մուտք գործեց Թաթուլ Կրպեյանի անվան զբոսայգու հետնամասի՝ համայնքային սեփականություն համարվող հողատարածք, որպեսզի տարածքն ազատի ինքնակամ կառուցված կացարաններից։ «Թաթուլ Կրպեյանի անվան զբոսայգու հարակից 26 հա տարածքը նախատեսվում է ամբողջությամբ սահմանազատել և կանաչապատել: Ապօրինի շինությունների ապամոնտաժման գործընթացը կրում է շարունակական բնույթ. զավթված հողատարածքները փուլ առ փուլ կվերադարձվեն համայնքին և կբարեկարգվեն ու կկանաչապատվեն»,- ասված է քաղաքապետարանի լրատվական վարչության՝ այդ օրը տարածած հաղորդագրության մեջ։ Այդ համատեքստում Երևանի քաղաքապետ Տիգրան Ավինյանը հայտարարել է․ «Երևանի տարածքից, համայնքից, մասնավորապես՝ կանաչ տարածքներից զավթված հողը նույնպես գողություն է»։

Հատված Արմեն Բոգոյանի ներկայացրած՝ կանաչապատման ենթակա տարածքի սահիկաշարից

Երևանի քաղաքապետարանի փետրվարի 26-ի գործակարգավարական նիստում «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը, անդրադառնալով Գայի պողոտայի սկզբնամասի սեփականաշնորհված հողամասին, նշել է, որ Երևանի գլխավոր հատակագծով այդ տարածքը կանաչապատման ենթակա է։ «Անհասկանալի է, թե ինչպես է ընդհանուր օգտագործման համար համայնքային սեփականություն հանդիսացող հողամասի այդ հատվածը մասնավորեցվել»,- հայտարարել է Արմեն Բեգոյանը։

Արդյոք Երևանի քաղաքապետարանը և իրավապահները նույն ջանասիրությամբ համայնքին կվերադարձնեն կասկածելի հանգամանքներում սեփականաշնորհված հողամասը, ինչպես այգին ազատեցին ինքնակամ կառույցներից, թե՞ որոշիչ կլինեն վաղեմության ժամկետներն ու ենթադրյալ բարեխիղճ գնորդի իրավունքները։ Ժամանակը կտա այս հարցի պատախանը։

Հեղինակ՝ Տիրայր Մուրադյան

Տեսանյութը՝ Սարո Բաղդասարյանի