ՌԴ Անվտանգության դաշնային ծառայությունը հայտնել է, որ Բրյանսկի շրջանում ձերբակալվել է «Կրոկուս Սիթի Հոլ» համերգասրահում տեղի ունեցած ահաբեկչության չորս կասկածյալ: ԱԴԾ հայտարարությունը մեջբերել է РИА Новости-ն։ 

«Ահաբեկչության իրականացումից հետո հանցագործները փորձել են թաքնվել՝ մեքենայով շարժվելով դեպի ռուս-ուկրաինական սահման։ Հատուկ և իրավապահ մարմինների համակարգված գործողությունների արդյունքում մի քանի ժամվա տարբերությամբ Բրյանսկի շրջանում ձերբակալվել են բոլոր չորս ահաբեկիչները: Ներկայումս նրանք տեղափոխվում են Մոսկվա»,- ասված է հայտարարության մեջ։

Ռուսական հատուկ ծառայությունում պնդում են, որ ահաբեկչությունից հետո հանցագործները մտադիր են եղել անցնել ռուս-ուկրաինական սահմանը, նրանք «համապատասխան շփումներ են ունեցել ուկրաինական կողմում»:

ԱԴԾ-ում հավելել են, որ պարզում են ահաբեկչության բոլոր հանգամանքները։ Գերատեսչությունում հայտարարել են, որ հանցագործությունը մանրակրկիտ ծրագրված է եղել։ Ահաբեկիչների կիրառած զենքը գտնվել է նախապես պատրաստված թաքստոցում։

ԱԴԾ-ի տվյալներով՝ գործի շրջանակներում կասկածյալներից բացի ձերբակալվել է ևս յոթ մարդ։

Ահաբեկչության հետաքննությունը շարունակվում է։

Վերջին պաշտոնական տվյալներով՝ «Կրոկուս Սիթի Հոլ»-ում տեղի ունեցած ահաբեկչության հետևանքով զոհերի թիվը հասել է 93-ի։ «112» տելեգրամյան ալիքի տվյալներով՝ զոհերի թիվը 100-ից ավելին է, տուժել է ավելի քան 200 մարդ։

Ավելի վաղ Ուկրաինայի արտաքին գործերի նախարարությունը կտրականապես հերքել էր այն մեղադրանքները, թե իբր Ուկրաինան ներգրավված է եղել «Կրոկուս Սիթի Հոլ»-ում տեղի ունեցած ահաբեկչությանը:

«Մենք նման մեղադրանքները համարում ենք Կրեմլի ծրագրած սադրանք՝ ռուսական հասարակության մեջ հակաուկրաինական հիստերիայի հետագա սրման, մեր պետության դեմ հանցավոր ագրեսիային մասնակցելու համար Ռուսաստանի քաղաքացիների մոբիլիզացիայի ուժեղացման համար պայմաններ ստեղծելու և միջազգային հանրության աչքում Ուկրաինան վարկաբեկելու համար»,- ասված էր Ուկրաինայի ԱԳՆ հայտարարության մեջ։

Զուգահեռաբար տելեգրամյան ալիքները հրապարակել են կասկածյալներից երկուսի լուսանկարները։

Լուսանկարը՝ РИА Новости / Сергей Бобылев