Բնապահպանության եւ ընդերքի տեսչական մարմինն ավարտել է ստուգումը «Կապանի լեռնահարստացման կոմբինատ» ՓԲԸ-ում, որն սկսվել էր «Հետքի» հրապարակման հիման վրա:

Ստուգման արդյունքում ԲԸՏՄ-ն պարզել է, որ Կապանի լեռնահարստացման կոմբինատի (ԼՀԿ) կողմից ապօրինի արդյունահանվել է 2895 տոննա հանքաքար, որը պարունակել է 13,5 կգ ոսկի, 251 կգ արծաթ, 23 տոննա պղինձ, 153 տոննա ցինկ եւ 18 տոննա կապար:

Դեկտեմբերի 26-ին ԲԸՏՄ-ն ստուգման նյութերն ուղարկել է Քննչական կոմիտե՝ հետագա ընթացքն ապահովելու համար:

Հիշեցնենք, որ 2024 թ. հունիսին գրել էինք, որ ըստ Կապանի բնակիչների՝ ԼՀԿ-ն սկսել է Շահումյանի հանքի բաց եղանակով շահագործման աշխատանքներ, ինչի իրավունքը չունի (հանքը պետք է շահագործվի փակ՝ ստորգետնյա եղանակով): Ընկերությունն իր հերթին հերքել էր այս տեղեկությունները:

• Ըստ բնակիչների՝ Կապանի ԼՀԿ-ն սկսել է Շահումյանի հանքի բաց եղանակով շահագործման աշխատանքներ. ընկերությունը հերքում է

Հրապարակումից հետո ԲԸՏՄ-ից տեղեկացել էինք, որ տեսչական մարմինը նախատեսում է ստուգում իրականացնել մեր կողմից բարձրացված հարցերի շրջանակներում:

• Տեսչական մարմինը Կապանի ԼՀԿ-ում ստուգում կիրականացնի. կառույցը չի հերքում, որ Սյունիքի տարածքային բաժնի պետն այնտեղ է աշխատել

Սրանից շատ չանցած Կապանի ԼՀԿ-ն հանդես էր եկել առանձին պարզաբանմամբ: 

«Հետքի» հրապարակման հիման վրա ԲԸՏՄ-ն կոմբինատում ստուգում էր սկսել նախորդ տարվա օգոսոստին: ՏՄ-ից տեղեկացել ենք, որ ստուգման նպատակն է եղել պարզել ԼՀԿ-ի կողմից Շահումյանի ոսկի-բազմամետաղային հանքավայրը բաց եղանակով շահագործելու թույտվության առկայությունը եւ գործունեության համապատասխանությունը բնապահպանական եւ ընդերքօգտագործման ոլորտը կարգավորող օրենսդրության պահանջներին:

Լուսանկարներում՝ Շահումյանի փակ հանքավայրի մակերեւույթը