«Նոր ուժ» ռեֆորմիստական կուսակցությունը, որը գլխավորում է Երևանի նախկին քաղաքապետ Հայկ Մարությանը, ԿԸՀ է ներկայացրել 85 թեկնածուների հայտարարագրերը։ 

«Նոր ուժ» ռեֆորմիստական կուսակցությունը հիմնադրվել է 2024 թվականի մայիսի 1-ին: Նախագահը Երևանի նախկին քաղաքապետ Հայկ Մարությանն է: Հիմնադրման օրը Մարությանը հայտարարել է, որ 2026-ին մասնակցելու են խորհրդարանական ընտրություններին։

Կուսակցության ցուցակի առաջին համարը Երևանի նախկին քաղաքապետ, դերասան Հայկ Մարությանն է։ Մարությանը հայտարարագրել է Չեխիայում գտնվող 5 բնակարան` 72.54, 62.70, 51.96, 48.93 և 56.75 քմ մակերեսներով, 2 բնակելի տուն՝ 116 և 252.84 քմ մակերեսներով, 5 ավտոկայանատեղի և հասարակական նշանակության 5 տարածք։ Չեխիայում Մարությանը ունի նաև 7 հողամաս` ընդհանուր 3844 քմ մակերեսով։

Եվրոպական մեկ այլ երկրում՝ Ավստրիայում Հայկ Մարությանն ունի 3 բնակարան՝ 62.79, 41.4 և 53.7 քմ մակերեսներով։

Երևանում Մարությանն ունի մեկ բնակարան՝ 34.2 քմ մակերեսով և բնակելի տուն՝ 92.5 քմ մակերեսով։

Մարությանն, ըստ հայտարարագրի, գործազուրկ է։ Նա նախորդ 12 ամիսներին գույքի վաճառքից ստացել է 7 մլն 200 հազար չեխական կրոն և 65 մլն դրամ։ Անշարժ գույքերի վարձավճարներից նրա ստացած եկամուտը կազմել է 2 մլն չեխական կրոն և 34 հազար 671 եվրո։ Մարությանն անցնող տարում 80.000 եվրո նվիրատվություն է ստացել Եվա Ջակեսովայից։

«ԱԱԱ փրոջեքթս» ՍՊԸ-ից, որի 100% բաժնետերը Մարությանն է, որպես շահաբաժին ստացել է 17 մլն դրամ և 6 հազար 316 եվրո։

Հայկ Մարությանի դրամական միջոցները կազմել են 76.1 մլն դրամ, 2.6 մլն չեխական կրոն (46,813,000 դրամ), 122 հազար 733 եվրո և 154 հազար 673 դոլար։

«Նոր ուժ»-ի ցուցակում երկրորդը լրագրող Հակոբ Կարապետյանն է։ Նա համատեղ սեփականությամբ երկու բնակարան ունի Երևանում՝ 114.9 և 58 քմ մակերեսներով։

Կարապետյանը 2018 թվականի արտադրության «Chevrolet» ավտոմեքենայի սեփականատեր է։

Նախորդ 12 ամիսներին նա 5 մլն դրամ աշխատավարձ է ստացել Երևանի մամուլի ակումբից և 800.000 դրամ վարձատրություն Հայաստանի հանրային հեռուստաընկերությունից։

Կարապետյանի դրամական միջոցները կազմել են 15 մլն դրամ և 180 եվրո։

Երևանի ավագանու «Ազգային առաջընթաց» խմբակցության անդամ Նարինե Արամյանը ցուցակում երրորդն է։

Նա հայտարարագրել է  համատեղ սեփականության իրավունքով իրեն պատկանող բնակարան Երևանում, որի մակերեսը 63.8 քմ է։ 

Արամյանը նաև 2025 թվականի արտադրության «Geely geome» մակնիշի մեքենա ունի։

ԿԳՄՍ նախարարության «Կրթության զարգացման և նորարարության ազգային կենտրոն» հիմնադրամի «Դպրոցական սնունդ և երեխաների բարեկեցություն» հիմնարկից Արամյանը նախորդ 12 ամիսներին ստացել է 3.3 մլն դրամ աշխատավարձ։

Դրամական միջոցներ Նարինե Արամյանը չի հայտարարագրել։

Երևանի ավագանու անդամ, «Անի-Տեստ» ՓԲԸ-ի տնօրեն Մուշեղ Հակոբյանը, որը «Նոր ուժի» ցուցակում չորրորդն է, հայտարարագրել է Երևանում գտնվող 71.61 քմ մակերեսով բնակարան և 660 քմ մակերեսով հողամաս։ Հակոբյանին պատկանող ևս երկու հողամաս՝ 1252 և 1150 քմ մակերեսներով, գտնվում են Կոտայքի մարզում։

Հակոբյանը 2004թ.-ի արտադրության «Mercedes-Benz»-ի սեփականատեր է։

Երևանի քաղաքապետարանից, որպես ծախսերի փոխհատուցում, Մուշեղ Հակոբյանը ստացել է 900.000 դրամ։ 2.2 մլն դրամ էլ Հակոբյանը ստացել է որպես վարձավճար Տիգրան Հարությունյանից։

Մուշեղ Հակոբյանին է պատկանում «Անի-Տեստ» ՓԲԸ-ի 50%-ը։ Նա հայտարարագրել է 3.5 մլն դրամ և  20.000 դոլար։

ԵՊԲՀ հիգիենայի և էկոլոգիայի ամբիոնի դոցենտ, Երևանի ավագանու «Ազգային առաջընթաց» խմբակցության անդամ Քրիստինա Վարդանյանը «Նոր ուժ» կուսակցության ցուցակում 5-րդն է։ Նա անշարժ և շարժական գույք չի հայտարարագրել։

Բժշկական համալսարանից Վարդանյանը 3.5 մլն դրամ աշխատավարձ է ստացել։ Նրա դրամական միջոցները կազմել են 1.7 մլն դրամ և  5000 դոլար։

«Նոր ուժ»-ի ցուցակում 6-րդը Հովհաննես Մովսիսյանն է։ Նա «Դրիմքարս ՍՊԸ»-ի տնօրենն է։ Մովսիսյանը հայտարարագրել է 400 քմ մակերեսով վարելահող Մասիս համայնքում։

Հովհաննես Մովսիսյանը 7 ավտոմեքենա ունի՝ 3 «Mercedes-Benz» 2016, 2017 և 2018 թվականների արտադրության, «Nissan»` 2019-ի արտադրության, «Mazda»՝ 2022 թվականի արտադրության, «Ford mustang»՝ 2016-ի արտադրության և «Volkswagen Transporter»՝ 1993 թվականի արտադրության։

Նախորդ տարի Մովսիսյանը գույքերի օտարումից ստացել է 17 մլն դրամի եկամուտ։ Մովսիսյանը հայտարարագրել է 25.5 մլն դրամ և 80.000 դոլար։

Երևանի ավագանու անդամ Իոսիֆ Կուբաթյանը ցուցակում 7-րդն է։ Նա հայտարարագրել է Երևանի Կիևյան փողոցում գտնվող մեկ բնակարան, որի մակերեսը հայտարարագրում չի նշել, և 2012 թվականի արտադրության «Hyundai Sonata» մակնիշի ավտոմեքենա։

Հաշվետու ժամանակահատվածում Կուբաթյանը ստացել է 10.8 մլն դրամի եկամուտ «Ամերիաբանկի» բաժնետոմսերի վաճառքից, 825.000 դրամ ծախսերի փոխհատուցում Երևանի քաղաքապետարանից և 825.125 դրամ Հայաստանի կենտրոնական դեպոզիտարիայից։

Կուբաթյանը հայտարարագրել է 4.2 մլն դրամ, 6001 եվրո և 649 դոլար։ Իոսիֆ Կուբաթյանը հայտարարագրել է նաև «Տելեկոմ Արմենիա» ԲԲԸ-ի 94 հատ պարտատոմս։  

«Նոր ուժ» ռեֆորմիստական կուսակցության նախընտրական ցուցակի 8-րդ համարը «Գո-Կառ» ՍՊԸ-ի տնօրեն Գրիգոր Հարությունյանն է։ Նա հայտարարագրել է Երևանի Շենգավիթ վարչական շրջանում գտնվող երկու բնակարան՝ 85 և 54 քմ մակերեսներով, և ավտոտնակ՝ 36 քմ մակերեսով։

Հարությունյանը 2025 թվականի արտադրության «Nissan patrol» մակնիշի ավտոմեքենայի սեփականատեր է։

Ըստ հայտարարագրի, նախորդ 12 ամիսներին Գրիգոր Հարությունյանը որևէ եկամուտ չի ունեցել։ Նա հայտարարագրել է 2 մլն դրամ։

Երևանի ավագանու «Ազգային առաջընթաց» խմբակցության անդամ Արաքսի Դիլանյանը «Նոր ուժ»-ի ցուցակում 9-րդն է։ Նա 130 և 62 քմ մակերեսներով երկու բնակարան ունի։ Վերջին մեկ տարում, ըստ հայտարարագրի, Դիլանյանի միակ եկամուտը եղել է Երևանի քաղաքապետարանից ստացած 900.000 դրամ ծախսերի փոխհատուցումը։

«Նոր ուժ»-ի ցուցակի առաջին տասնյակը եզրափակում է  Անդրանիկ Գինոսյանը։ Նա Երևանի ավագանու «Ազգային առաջընթաց» խմբակցության գործավարն է։

Գինոսյանն անշարժ գույք չի հայտարարագրել, փոխարենը հայտարարագրել է երկու ավտոմեքենա՝ 2018-ի արտադրության «Mercedes-Benz» և 2020 թվականի արտադրության «Hyundai Elantra»։

Երևանի քաղաքապետարանից Գինոսյանը ստացել է 2.5 մլն դրամ աշխատավարձ, իսկ դրամական միջոցները կազմել են 5.2 մլն դրամ։

Հարուստներ, թոշակառուներ, գործազուրկներ

«Նոր ուժ» ռեֆորմիստական կուսակցության պատգամավորի թեկնածուներից ամենամեծ եկամուտն ունեցել է ցուցակի առաջին համար Հայկ Մարությանը։ Վերջին 12 ամիսներին Մարությանի եկամուտները կազմել են՝ 9 մլն 200 հազար չեխական կրոն, 82 մլն դրամ և 120.987 եվրո։

Երկրորդ ամենաշատ եկամուտ ունեցողը ցուցակի 6-րդ համար Հովհաննես Մովսիսյանն է։ Նա հաշվետու ժամանակահատվածում ունեցել է 17 մլն դրամ եկամուտ։

12.8 մլն դրամ տարեկան եկամտով երրորդ տեղում Քրիստ Հովսեփյանն է։ Նա ցուցակում 23-րդն է։ Չորրորդ տեղում Իոսիֆ Կուբաթյանն է՝ 12.5 մլն դրամ եկամտով։ Հինգերորդ տեղում ցուցակի 73-րդ համար, Հայ-ռուսական Սլավոնական համալսարանի լաբորանտ Վիկտոր Ղամարյանն է։ Նա նախորդ մեկ տարում 750.000 դրամ  աշխատավարձ է ստացել համալսարանից, 21.834 եվրո ձեռնարկատիրական գործունեությունից, 390.000 ռուբլի՝ Սարատովի պետական բժշկական համալսարանից։ 

Ղամարյանին եկամտի չափով հաջորդում է Սարգիս Խուրշուդյանը։ Նա գույքի վարձավճարից ստացել է 11.5 մլն դրամ։ «Նոր ուժ»-ի ցուցակում յոթերորդ ամենաշատ եկամուտ ունեցողը ցուցակի 30-րդ համար Արուսյակ Մանուկյանն է։ Նա ձեռնարկատիրական գործունեությունից ստացել է 10 մլն դրամ։

Ցուցակում ընգրկված պատգամավորի մյուս թեկնածուների նախորդ 12 ամիսների եկամուտը ցածր է եղել 10 մլն դրամից, իսկ նրանցից 20-ը առհասարակ որևէ եկամուտ չի ունեցել։

«Նոր ուժ»-ի ցուցակում ամենաշատ դրամական միջոցներ ունեցողը կրկին Հայկ Մարությանն է։ Նա հայտարարագրել է 76.1 մլն դրամ, 2.6 մլն չեխական կրոն, 122.733 եվրո և 154.673 դոլար։ Երկրորդ ամենաշատ դրամական միջոցներ հայտարարագրածը ցուցակի 13-րդ համար Մարատ Օգանեզովն է։ Նա «Դարմ» ՍՊԸ-ի տնօրենն է։ Օգանեզովը հայտարարագրել է 5.2 մլն դրամ, 148.700 դոլար, 45.000 եվրո և 0,39 բիթքոյն։ Օգանեզովին հաջորդում է ցուցակի 40-րդ համար Տիգրան Զատիկյանը։ Նա անհատ ձեռնարկատեր է։ Զատիկյանի դրամական միջոցները կազմել են 80 մլն դրամ։

Չորրորդ ամենաշատ դրամական միջոցներ հայտարարագրածը Հովհաննես Մովսիսյանն է։ Մովսիսյանը հայտարարագրել է 25.5 մլն դրամ և 80.000 դոլար։

Ամենաշատ դրամական միջոցներ ունեցողների հնգյակում է նաև Գագիկ Արզաքանցյանը։ «Նոր ուժի» ցուցակի 78-րդ համարը հայտարարագրել է 25 մլն դրամ և 3000 դոլար։

«Նոր ուժի» պատգամավորի թեկնածուներից 18-ը, ըստ հայտարարագրի, դրամական միջոցներ չունեն։

«Նոր ուժ» ռեֆորմիստական կուսակցության նախընտրական ցուցակում ընդգրկված թեկնածուների 60%-ը տղամարդիկ են, 40%-ը՝ կանայք։ Ցուցակում ընդգրկված 85 հոգուց 22-ը կամ 25.8%-ը անկուսակցական են։

Կուսակցության ցուցակում ընդգրկված թեկնածուների միջին տարիքը 45 է։ Պատգամավորի ամենաերիտասարդ թեկնածուները 25-ամյա Էրիկ Երվանդյանն ու Դավիթ Սարգսյանն են։ Էրիկ Երվանդյանը ցուցակում 52-րդն է, Դավիթ Սարգսյանը՝ 43-րդը։ Իսկ տարիքով ամենաավագները 73-ամյա Աշոտ Բաբայանն ու Գայանե Ղազարյանն են։ Նրանք ցուցակում զբաղեցնում են համապատասխանաբար 55-րդ և 63-րդ հորիզոնականները։

«Նոր ուժի» պատգամավորի թեկնածուներից աշխատանք ունեն 51-ը, 27 հոգի չի աշխատում, իսկ 7-ը թոշակառու է։

«Հետքը» առաջիկայում կներկայացնի մյուս ուժերի նախընտրական ցուցակներում ընդգրկված թեկնածուների հայտարարագրերի հետաքրքիր մանրամասները։