«Հայկական ավիաուղիներ» («ՀԱՈւ») ընկերությունը 1,5 տարվա ընդմիջումից հետո Հայաստանում գրանցված ինքնաթիռ ունի: Օգոստոսի 4-ին ՀՀ օդանավերի ռեգիստրում գրանցվել է այս ավիաընկերության առաջին Boeing 737-800 տիպի ինքնաթիռը՝ ստանալով հայկական EK-AAF գրանցումը: Ըստ planespotters.net-ի՝ օդանավը նախատեսված է 186 ուղեւորի համար:  

Ընդ որում՝ այս բորտը մայիսի 22-ից կանգնած է Երեւանի «Զվարթնոց» օդանավակայանում: Օդանավն արտադրվել է 2006 թ., 2006-2024 թթ. շահագործվել է Հնդկաստանում տեղական տարբեր ավիաընկերությունների կողմից: Շահագործումից հանվել է 2024-ի փետրվարին եւ ավելի քան մեկ տարի՝ մինչեւ 2025-ի հունիս, կանգնած էր Դելիի օդանավակայանում: 2025-ի հունիսից մինչեւ 2026-ի հունվար օդանավը կայանված էր հնդկական Հայդաբարադի օդանավակայանում, իսկ փետրվարին տեղափոխվել է Ստամբուլ, որտեղ գտնվում էր մինչեւ մայիսի 22-ը: Այնտեղից էլ տեղափոխվել է Երեւան:

Planespotters.net-ի տվյալներով՝ 2024-ի սեպտեմբերից մինչեւ այս տարվա օգոստոս Boeing 737-800-ը գրանցված էր բրիտանական գահին պատկանող օֆշորային Գերնսի կղզու օդանավերի ռեգիստրում որպես 2-TWCA: Գերնսիի ռեգիստրի համաձայն՝ բորտի սեփականատերը իռլանդական TWC Aviation Capital-ն է:

Հիշեցնենք, որ 2021-ի փետրվարին հիմնադրված «ՀԱՈւ»-ն, որը ոչ մի կապ չունի Հայաստանի նախկին ազգային ավիափոխադրող «Հայկական ավիաուղիների» հետ (լուծարվել է 2020-ին), չնայած օգտագործում է վերջինիս անունն ու տարբերանշանը, 2022-ի դեկտեմբերին ստացել է օդանավ շահագործողի վկայական (ՕՇՎ), իսկ թռիչքները մեկնարկել է 2023-ի մարտին: 

Ավիաընկերությունը 2023-2025 թթ. շահագործում էր Airbus A321 տիպի օդանավեր: Նախորդ տարվա մարտի 17-ին օպերատորը հայտարարեց, որ ինքնաթիռային պարկի թարմացմամբ եւ նոր օդանավերի ձեռքբերմամբ պայմանավորված՝ ապրիլի 7-ից ժամանակավորապես դադարեցնելու է թռիչքները։ Այդպես էլ եղավ: 2025-ի գարնանը «ՀԱՈւ»-ի 2 օդանավերը Երեւանից թռան Թուրքիա, որտեղ գրանցվեցին տեղական Southwind Airlines-ի շարժակազմում: 

Դրանից հետո տեւական ժամանակ ավիափոխադրողը չուներ ինքնաթիռ, ինչի պատճառով Քաղավիացիայի կոմիտեն (ՔԱԿ) 6 ամսով կասեցրեց նրա ՕՇՎ-ի գործողությունը: Ավելի ուշ հայտնի դարձավ, որ «ՀԱՈւ»-ն Airbus A321-երի փոխարեն շահագործելու է Boeing 737-800-ներ: 2025-ի օգոստոսին «Հայկական ավիաուղիները» հայտարարություն տարածեց Boeing 737 տիպի որակավորում ունեցող օդաչուների՝ հրամանատարների եւ երկրորդ օդաչուների աշխատանքի հրավիրելու մասին: 

Կառավարության կողմից ընդունված ՕՇՎ տալու կարգը սահմանում է, որ վկայական ստանալու կամ այն վավեր պահելու համար տվյալ փոխադրողը պետք է լինի թռիչքների համար պիտանի առնվազն մեկ օդանավի սեփականատեր կամ վարձակալ (ենթավարձակալ) կամ էլ կնքած լինի առնվազն մեկ պիտանի օդանավի ձեռքբերման, վարձակալության կամ ենթավարձակալության մասին մտադրությունների հուշագիր: 

2025-ի աշնանը, այն բանից հետո, երբ «Հայկական ավիաուղիները» կրկին բավարարում էր այս պայմանը, ՔԱԿ-ը վերականգնեց նրա ՕՇՎ-ի գործողությունը:

Ըստ planespotters.net-ի՝ EK-AAF-ը «Հայկական ավիաուղիների» միակ օդանավը չի լինի: Աղբյուրի տվյալներով՝ եւս 2 հատ Boeing 737-800, որոնք 2025-ի գարնանից կանգնած են Ստամբուլի օդանավակայանում եւ սեփականության իրավունքով պատկանում են ամերիկյան GA Telesis-ին, պետք է փոխանցվեն «ՀԱՈւ»-ին:

Առաջին լուսանկարում՝ Հայաստանում EK-AAF գրանցումը ստացած Boeing 737-800-ը՝ Ստամբուլի օդանավակայանում, դեռեւս հին (2-TWCA) գրանցումով, 08.03.2026 թ., հեղ.՝ Ույգար Զորլու, planespotters.net