HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սողոմոն Քոչարյանին դարձյալ տեղափոխել են քաղաքացիական հիվանդանոց

Երեկ երեկոյան «Դատապարտյալների հիվանդանոցից» զանգահարել են ցմահ բանտարկյալ Սողոմոն Քոչարյանի մորն ու հայտնել, որ տղային տեղափոխել են քաղաքացիական հիվանդանոց՝ «Գրիգոր Լուսավորիչ» բժշկական կենտրոն: «Շատ ուրախացա, որ Սողոմոնիս տեղափոխել են քաղաքացիական հիվանդանոց, ապրեն վարչության ու «Դատապարտյալների հիվանդանոցի» ղեկավարները, որ հասան Սողոմոնիս»,- ասաց տիկին Զինան, ում այսօր հանդիպեցինք «Գրիգոր Լուսավորիչ» բժշկական կենտրոնում` վերակենդանացման բաժանմունքի դիմաց:

Քրեակատարողական վարչության արձագանքը

Քրեակատարողական վարչությունից «Հետքին» տեղեկացրեցին, որ Սողոմոն Քոչարյանին տեղափոխել են քաղաքացիական հիվանդանոց հետագա բուժման ու հավելյալ հետազոտություններ անելու նպատակով:

Սողոմոն Քոչարյանի փաստաբան Գրիշա Բալասանյանը նշեց, որ իր ու պաշտպանյալի մոր անունից երեկ գրավոր դիմել են ՔԿՎ պետ Արթուր Օսիկյանին՝ բարձրացնելով երկու հարց՝ Քոչարյանին տեղափոխել քաղաքացիական հիվանդանոց և հնարավորիս արագացնել պատժի հետագա կրումից ազատելու գործընթացը:

«Ուրախությամբ եմ նշում, որ ՔԿ վարչությունն արագ արձագանքեց և մի քանի ժամ անց Սողոմոնը տեղափոխվեց քաղաքացիական հիվանդանոց: Սրտի իշեմիկ հիվանդություն, անբավարարություն ունեցող Սողոմոն Քոչարյանի համար «Դատապարտյալների հիվանդանոցում» պայմանները բավարար չէին: Հաշվի առնելով այն, որ Սողոմոն Քոչարյանը ցմահ դատապարտյալ է, և ըստ գործող կարգի` նրան պահում էին փակ ռեժիմում, այդ պայմաններում հնարավոր չէր կազմակերպել նրա բուժումը: Գրության մեջ նույնպես նշեցինք, որ նրա հիվանդությունն ու պայմանները, որտեղ գտնվում էր, անհամատեղելի էին, և նրա կյանքին վտանգ էր սպառնում»,- ասաց փաստաբանը:

Մարդու իրավունքների պաշտպանի գրասենյակի արձագանքը

Գրիշա Բալասանյանն ու Զինա Քոչարյանը երեկ գրավոր դիմել էին նաև Մարդու իրավունքների (ՄԻ) պաշտպան Կարեն Անդրեասյանին: ՄԻ գրասենյակի ներկայացուցիչը երեկ առավոտյան «Դատապարտյալների հիվանդանոցում» տեսակցել էր Սողոմոն Քոչարյանին: Այս մասին «Հետքին» տեղեկացրեց օմբուդսմենի խոսնակ Շուշան Դանիելյանը` նշելով, որ հրատապ գրություն են արդեն ուղարկել ԱՆ: «Ցմահ դատապարտյալի մայրն ու փաստաբանը բարձրացրել էին երկու խնդիր, սակայն այսօր փաստաբանից տեղեկացանք, որ քաղաքացիական հիվանդանոց տեղափոխելու հարցը լուծվել է: Ուստի խնդրել ենք հայտնել` արդյոք ցմահ դատապարտյալի մոտ ախտորոշված հիվանդությամբ պատժի կրելուն խոչընդոտող ծանր հիվանդությունների ցանկին համապատասխանելիության հարցը ներկայացվել է միջգերատեսչական հանձնաժողովին, եթե այո, ապա խնդրել ենք տրամադրել համապատասխան եզրակացությունները, եթե ոչ, ապա հանձնարարել ապահովել գործընթացի պատշաճ կատարումը»,- նշեց Շուշան Դանիելյանը՝ տեղեկացնելով, որ հնգօրյա ժամկետում կստացվի պատասխան արդարադատության նախարարությունից:

Քրեակատարողական հիմնարկներում դիտորդական խմբի արձագանքը

Նման հրատապ գրություն ԱՆ-ին ուղարկել է նաև ՔԿՀ-ներում հասարակական դիտորդական խումբը: Խմբի ղեկավար Ռուբեն Սարգսյանն այսօր մեզ հետ զրույցում նշեց, որ երեկ այցելել են Սողոմոն Քոչարյանին «Դատապարտյալների հիվանդանոցում», խոսել նաև բժշկական անձնակազմի ու ադիմինիստրացիայի հետ:

«Գրությամբ նշել ենք, որ Սողոմոն Քոչարյանի ախտորոշումները համապատասխանում են Կառավարության 825-Ն որոշմամբ հաստատված պատժի կրելուն խոչընդոտող ծանր հիվանդությունների ցանկին մի քանի կետերով: Առաջարկել ենք պատժի հետագա կրումից ազատելու գործընթաց սկսել և տեղափոխել քաղաքացիական հիվանդանոց: Բարեբախտաբար, նրան ավելի շուտ են տեղափոխել հիվանդանոց»,- նշեց Ռուբեն Սարգսյանը:

Օրվա երկրորդ կեսին Սողոմոն Քոչարյանին «Գրիգոր Լուսավորիչ» ԲԿ վերակենդանացման բաժանմունքից տեղափոխեցին սրտաբանական բաժանմունք, որտեղ նա անցավ անհրաժեշտ բոլոր ստուգումներն ու հետազոտությունները: Նրա վիճակը շարունակում է մնալ կայուն ծանր:

«Հուսով եմ, որ Սողոմոնը լիարժեք բուժում կստանա բազմապրոֆիլ քաղաքացիական հիվանդանոցում, այլ պայմաններում անհնար է այն իրականացնել»,- ընդգծեց Սողոմոնի փաստաբանը:

Զինա Քոչարյանը հատուկ շեշտեց, որ թե՛ տղան, թե՛ ինքը գոհ են բուժանձնակազմի ու ՔԿՎ աշխատակիցների վերաբերմունքի: «Սողոմոնս հատուկ ինձ ասել ա, որ քրեակատարողականի տղերքը, որ նստած են կողքին գիշեր-ցերեկ, լավ են նայում, գիտեն, որ պատերազմով ա անցել, դարձել պատերազմի հաշմանդամ, գիտեն, որ հետախույզ տղա ա, ափսոս տղա ա: Աստված իրանց առողջություն տա»,- ասաց Զինա Քոչարյանը:

Վերջին 9 օրերին ցմահ բանտարկյալ Սողոմոն Քոչարյանը 3 տարբեր հիվանդանոցներում է բուժում ստացել՝ «Էրեբունի» ԲԿ-ում, «Դատապարտյալների հիվանդանոցում» և այժմ «Գրիգոր Լուսավորիչ» ԲԿ-ում:  

Մեկնաբանություններ (2)

Հայ
Սողոմոնի այս վիճակը բոլորիս խղճին է մնալու... Չեմ ուզում «գնա մեռի արի սիրեմ» վիճակը լինի, բայց...
Laura
Աստված քեզ պահապան լինի Սողոմոն ջան քեզ արողջություն եվ երկար տարիների կյանք։Ես քեզ հեթք Թերթից գիտեմ' սիրտս շատա ցավում քո համար։ Ել երբեք Չնկնես սրիկաների ցանցը։աղոթում եմ վոր Շուտ ապաքինվես։։։։։։։ԱՄԵՆ

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter