HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ինտերպոլով հետախուզվողն անարգել կենդանիներ է ներմուծում Հայաստան

Միջազգային Կարմիր գրքում գրանցված կենդանիների առևտրով զբաղվող ՀՀ քաղաքացի Արթուր Խաչատրյանը հետախուզվում է Ինտերպոլի կողմից: Սակայն վերջինս անարգել շարունակում է կենդանիներ ներմուծել Հայաստանի Հանրապետություն:

Հիշեցնենք՝ Արթուր Խաչատրյանը «Զու ֆաունա արտ» ընկերության սեփականատերն է, ում միջոցով աֆրիկյան երկրներից բազմաթիվ կենդանիներ և թռչուններ են ներմուծվում  Հայաստան, այնուհետև արտահանվում առավելապես Ռուսաստանի Դաշնություն: Նրա ներմուծած բոնոբոների ճակատագիրը, որոնցից մեկը ցուցադրված էր Ձորաղբյուրի «Ջամբո» այգում, այդպես էլ անհայտ մնաց մեզ և ընթերցողներին: Մաքսանենգ ճանապարհով բոնոբոների ներմուծման փաստով հարուցված քրեական գործի վարույթն իրականացնող մարմինը՝ ֆինանսների նախարարության քննչական վարչությունը ուղիղ երկու տարի է՝ քննում է գործը, սակայն այդպես էլ ավարտին չի հասցնում

Մինչդեռ Կոնգոյում Ինտերպոլի ԱԿԲ-ի հայցադիմումի հիման վրա դեռևս 2014թ. սեպտեմբերի 12-ին Ինտերպոլի Գլխավոր քարտուղարության կողմից  «Կարմիր անկյունով» քարտի  տեսքով միջազգային հետախուզում է հայտարարվել Արթուր Խաչատրյանի (ծնված 01.09.1968թ.) նկատմամբ, Կոնգոյի Դեմոկրատական Հանրապետության բնության պահպանության մասին  թիվ 14/003 օրենքի 79 հոդվածի հատկանիշներով նախատեսված հանցագործություն կատարելու համար, այն է՝ ամբողջությամբ պահպանության տակ գտնվող նմուշների միջազգային առևտուր (անօրինական ճանապարհով ՀՀ բոնոբո տեսակի կապիկներ ներմուծելու կապակցությամբ)։

Ինտերպոլի ԱԿԲ-ն, «Հետքի» գրությանն ի պատասխան, տեղեկացրել է, որ Արթուր Խաչատրյանը 2015թ. փետրվարի 6-ին ձերբակալվել է Հայաստանում: Այդ կապակցությամբ փետրվարի 10-ին ՀՀ գլխավոր դատախազությունից հայտնել են, որ վերջինիս նկատմամբ կալանավորում կիրառելու միջնորդություն չի ներկայացվել դատարան, և փետրվարի 9-ին Ա. Խաչատրյանը ազատվել է արգելանքից՝ ձերբակալման 72 ժամը լրանալու կապակցությամբ։ Ինտերպոլի ԱԿԲ-ն տեղեկցրել է, որ 23.12.2015 թ. դրությամբ Արթուր Խաչատրյանի նկատմամբ միջազգային հետախուզումը շարունակվում է։ Իսկ թե ինչու վարույթն իրականացնող ֆինանսների նախարարության քննչական վարչությունը արգելանք չի կիրառել, հայտնի չէ: Մեր հարցմանն ի պատասխան ֆինանսների նախարարությունը Ինտերպոլ ԱԿԲ-ից տարբերվող պատասխան է տվել. «Տեղեկություններ չեն ստացվել նաև, թե ներկայումս Ա. Խաչատրյանի նկատմամբ Կոնգոյի նախաձեռնությամբ հետախուզումը շարունակվում է, թե ոչ: ՀՀ ՖՆ քննչական վարչությունում քննվող քրեական գործով Ա. Խաչատրյանին մեղադրանք չի առաջադրվել, քրեական գործի նախաքննությունը շարունակվում է»:

Հակառակն է պնդում Ինտերպոլը. «Կենդանիների ապօրինի առևտրի գործը բացահայտելու ուղղությամբ Հայաստանի Ինտերպոլի ԱԿԲ-ն համագործակցում է ՀՀ Ֆինանսների նախարարության Քննչական վարչության հետ, քանի որ գործի քննությունն իրականացվում է նշված վարչության կողմից, ինչպես և Ինտերպոլի Գլխավոր քարտուղարության համապատասխան ծառայության, Կոնգոյում, Գվինեայում, Շվեցարիայում Ինտերպոլի ԱԿԲ-ների և այլ իրավասու մարմինների հետ»:

Անհետացող տեսակները Ձերբակալություններ՝ կենդանիների ապօրինի առևտրի մեղադրանքով

Արտասահմանյան մեր գործընկերների և իրավապահ մարմիններում մեր աղբյուրի միջոցով պարզեցինք, որ Արթուր Խաչատրյանը նաև ձերբակալվել է Դուբայում 2014թ. հոկտեմբերին: Սակայն 4 ամիս անց ազատ է արձակվել, քանզի Կոնգոյից նրա արտահանձնման վերաբերյալ փաստաթղթերն ուշացել են, և Խաչատրյանը վերադարձել է Հայաստան: Դրանից հետո Կոնգոյի իրավապահ մարմինները Ինտերպոլի միջոցով դիմել են ՀՀ իրավապահ մարմիններին, որպեսզի Արթուր Խաչատրյանին ձերբակալեն Հայաստանում:  Վերջիններս էլ, ինչպես երևում է, ձերբակալել և նորից ազատ են արձակել՝ «կանաչ լույս վառելով» նրա գործունեությանը:

Արթուր Խաչատրյանը ձերբակալությունից հետո բուռն գործունեություն է սկսել: 2015թ. ամռանը նա կապիկների մեծ խմբաքանակ է ներմուծել Հայաստան:  Տանզանիայից Հայաստան է փոխադրել 60 թզուկ կանաչ կապիկ, այլ կերպ դրանց վերվետ կապիկներ են անվանում (լատիներեն անվանումը՝ Chlorocebus pygerythrus): Կապիկների այս տեսակը Միջազգային կարմիր գրքում է ընդգրկված, դասվում է «նվազ վտանգվածների» ցանկում: Սակայն, այս անգամ ճանապարհը ոչ թե Միացյալ Արաբական Էմիրություններն է եղել, այլ Տանզանիա-Բեյրութ-Երևան ուղին: Դրանից բացի ևս 30 կապիկ էլ է նա ներմուծել օգոստոսին և այնուհետև բոլոր պրիմատներն արտահանել է Ռուսաստան: Ռուսաստան արտահանել է իր գործընկերոջ Էդուարդ Խաչատուրյանի միջոցով:

Բնապահպանության նախարար Արամայիս Գրիգորյանը մտահոգված չէ այն փաստով, որ Արթուր Խաչատրյանը հետախուզվում կամ ձերբակալվել է կենդանիների անօրինական առևտրի մեջ կասկածվելու փաստով: Ըստ նրա, քանի դեռ իրենց ներկայացնում են օրինական փաստաթղթեր, իրենք չեն կարող այդ անձին CITES թույլտվություններ չտրամադրել: Ավելին, իրավապահ մարմինների կողմից որևէ սահմանափակման մասին գրություն ԲՆ-ն չի ստացել: «CITES-ի հետ կապված այն փաստաթղթերը, որոնք ներկայացվում են մեզ և արտահանում կամ ներմուծում են իրականացնում, դրանք օրենքի սահմաններում են: Թե ինչի համար է նա փնտրվում և ինչ հանցանքներ է կատարել դրսում, ես դրա մասին տեղեկություններ չունեմ»,-«Հետքի» հետ հարցազրույցում ասաց Արամայիս Գրիգորյանը:

«Հետքը» արդեն գրել է, որ Արթուր Խաչատրյանի ներկայացրած փաստաթղթերի մի մասը կեղծ են եղել։

Ինչպես երևում է, Ֆինանսների նախարարությունը բացառիկ շահագրգռվածություն ունի այս գործը չբացահայտելու հարցում: Ավելին՝ Ֆինանսների նախարարությունը կենդանիների առեւտրի իրականացման կարեւոր օղակներից մեկն է։ Հենց նախարարության կառույցների միջոցով են ներկրվում եւ արտահանվում այդ կենդանիները, այսինքն` այդ կենդանիների վաճառքից ստացված փողերի մի մասը այդ կառույցներին է մնում։ Եւ, բնականաբար, Գագիկ Խաչատրյանը չի թողնի իր ղեկավարած կառույցի դեմ քրեական պատմություն սարքվի եւ չի զրկվի հավելյալ գումարներից։ 

Գագիկ Խաչատրյանի լուսանկարը՝ Ֆոտոլուրի

Մեկնաբանություններ (3)

Ռազմիկ
Բոլորը գող-աւազակ....վանդակներուն մէջ պէտք է դրուին: Անոնք արժանի են անանկ ճակատագրին:
Գեւորգ
էտ մարդուն հայ պաշտոնավորները ինչու պիտի բռնեն, եթե օգուտից բացի վնաս չի տալիս իրենց: Հայերս ենք կարմիր գրքի փայ դարձել, այդ կենդանիների համար վրդովվենք? Ավելի ճիշտ կլինի տանզիաները իրենց կապիկ ծախողներին բռնեն, ոնց են այնտեղ ինքնաթիռի մեջ մտնում?
nene
Էլի ընթացք տվեցի՞ք։Հայ մարդիկ են ,թող աշխատեն։Անպայման պիտի դրսի հրահանգներով առաջնորդվե՞ք։լավ չէ՞ր լինի մի մեծ այգի ստեղծվեր Հայաստանում։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter