Հարցազրույց Երևանի ավագանու «Լույս» դաշինքի անդամ Անի Սամսոնյանի հետ

-Ինչո՞ւ այդքան քիչ մանդատ ստացաք ավագանու ընտրություններին:

-Մեր փոքրաթիվ ձայները անակնկալ էին և՛ մեզ, և՛ բոլորի համար, բայց պետք է հաշվի առնել այն, որ Երևանի ավագանու նախընտրական քարոզարշավի բնույթը կեսից փոխվեց: Սկզբում բոլոր քաղաքական ուժերը, որոնք ներկայացվածություն ունեին ընտրություններում, ծրագրային էին պայքարում, ներկայացնում էին ծրագրերը վարչական շրջաններում, Երևանի զարգացման իրենց տեսլականը: Քարոզարշավի կեսից ՀՀ վարչապետը սկսեց ելույթներ ունենալ, քարոզարշավի բովանդակությունը քաղաքականացվեց, սկսվեց մեծ սև PR մեր քաղաքական ուժի դեմ: Քաղաքական ուժերը բաժանեցին սևի և սպիտակի, և այստեղ պատկերը բոլորովին փոխվեց:

Դրան զուգահեռ փոխվեց նաև երևանցիների հետաքրքրությունը քարոզարշավի հանդեպ: Նրանք արդեն դադարեցին լսել մեր ծրագրերը, և ամբողջ ուշադրությունը կենտրոնացվեց այդ ելույթների վրա, որոնք էմոցիոնալ էին և միանգամից կարողացան ուշադրություն կենտրոնացնել իրենց վրա: Կարծում եմ՝ սա հիմնական պատճառն էր, որ մենք չկարողացանք երևանցիներին հասցնել մեր ծրագրերը, մեր նպատակները: Սա ոչ թե Երևանի ավագանու ընտրություն էր, այլ վստահության քվե էր վարչապետ Նիկոլ Փաշինյանին:

-Ասացիք՝ քաղաքականցվեց, բայց ընտրական գործընթացը հենց քաղաքական է, չէ՞:

-Խոսքը ոչ թե ընտրությունների, այլ քարոզարշավի բովանդակության քաղաքականացման մասին է: Սկզբում բոլորս կենտրոնացել էինք քաղաքի զարգացման ծրագրերի վրա, քաղաքացիներին ուղղված մեր ասելիքը ծրագրային էր՝ այն, ինչ մենք արել ենք, և այն, ինչ պատրաստվում ենք անել: Սակայն քարոզարշավի բնույթը փոխվեց, ստացվեց այնպես, որ երևանցին պետք է քվե տար այդ ուժին այն բանի համար, որ հակահեղափոխություն չլիներ: Սա էր խնդիրը:

-Երեք մանդատով ի՞նչ պետք է անեք քաղաքապետարանում:

-Իշխանությանը, որ ստացել է 80 տոկոս և ավելի ձայն Երևանի ավագանիում և ունի բավականին մեծ ներկայացվածություն, իհարկե, 3 մանդատով հավասարակշռելն ու զսպելը շատ դժվար կլինի: Բայց պետք է հաշվի առնենք, որ մենք ոչ միայն պետք է հավասարակշռենք ու զսպենք, այլև համագործակցենք: Այդ պատճառով երեքս էլ մեր բոլոր ջանքերը ներդնելու ենք, որպեսզի գործը հնարավորինս արդյունավետ լինի:

-Առաջնահերթ երեք քայլ, որ անելու եք:

-Առաջնահերթ մեկ քայլ արդեն արել ենք. քաղաքի աղբահանության գլխավոր խնդիրն էր, որի համար դիմել ենք քաղաքապետին և ասել, որ երկրորդ օպերատորի ներգրավումը՝ որպես աղբահավաք ծառայություն իրականացնող պատասխանատուի՝ կա և՛ Ձեր, և՛ մեր ծրագրում: Եվ քանի որ Երևանում աղբային քաոս է, անհրաժեշտ է անմիջապես ձեռնարկել աշխատանքները: Որքան գիտեմ, քննարկումներ են ընթանում քաղաքապետի մոտ, և շուտով նա կտեղեկացնի, թե ինչ հանգուցալուծումներ կլինեն:

-Այսինքն՝ մենաշնորհ դաշտում այլևս չի՞ լինի:

-Այո, մենաշնորհ դաշտում չի լինի: Եթե աղբահավաք ծառայություն մատուցող մի ընկերությունը վատ աշխատի, կհասկանանք՝ դրա պատճառներն օբյեկտի՞վ, թե՞ սուբյեկտիվ են: Այսինքն՝ եթե տվյալ ընկերության աշխատանքը վատ է կատարվում, ամեն պահի կարող է խզվել պայմանագիրը դրա հետ: Հիմա խնդիրն այն է, որ «Սանիթեքը» մեկն է, և մեզ ասում են՝ եթե պայմանագիրը լուծարեք, ի՞նչ է լինելու քաղաքի վիճակը: Երկու օպերատորի դեպքում չի լինի այդ խնդիրը:

Մենք նաև բարձրացրել ենք «Սանիթեքի»՝ երկրորդ պայմանագրի լուծարման հարցը: Ընկերության հետ կնքվել է երկու պայմանագիր՝ քաղաքի արևելյան և արևմտյան հատվածների համար: Այս ընկերությունը գրանցված է Բեյրութում, իսկ «Սանիթեք Ինթերնեյշնլը»՝ Հայաստանում: Վերջինիս գրանցումից 10 օր հետո առանց որևէ մրցույթի անմիջապես պայմանագիր է կնքվել նրա հետ: Մենք պահանջում ենք լուծարել «Սանիթեք Ինթերնեյշնլի» հետ Երևանի արևմտյան հատվածի համար կնքված պայմանագիրը:

Հաջորդը հանրային տրանսպորտի խնդիրն է: Հասկանալի է, որ ներկայիս երթուղայինները պատշաճ կերպով չեն կարողանում սպասարկել քաղաքացիներին, որովհետև կա մաշվածության, ծախսածածկման խնդիր: Նաև գիտեք, որ գոյություն ունի խորհրդատվական ընկերության մի փաթեթ, որին քաղաքապետարանը որոշակի գումար էր վճարել, որպեսզի այն ուսումնասիրի և կազմի հանրային տրանսպորտի ներդրման փաթեթը: Հանրային տրանսպորտի վիճակն անտանելի է: Քաղաքացիներից բողոքներն օրեցօր շատանում են, որոշ երթուղային գծեր շուտով դուրս կգան շահագործումից, և մարդիկ կարող են երկար ժամանակ մնալ կանգառներում: Սա խնդիր է, և կարծում եմ՝ այս պահին քաղաքապետն այս հարցով ևս զբաղվում է, որպեսզի կարողանան շատ արագ ավարտել քննարկումները և ձեռնարկել նոր հանրային տրանսպորտի ներդրման հարցը:

-Հանրային տրանսպորտով քաղաքակիրթ երթևեկելու հնարավորություն քա՞նի տարի հետո կարող ենք ունենալ:

-Մենք նախատեսում ենք մեկ-երկու տարում լուծել խնդիրը: Պետք է հասցնենք, քանի որ երկար սպասել հնարավոր չէ: Մասնավոր գծատերերն այլևս հրաժարվում են սպասարկել երթուղիները, նշում են, որ շահույթը քիչ է, ծախսերը՝ շատ:

Երրորդ խնդիրն ապօրինի կառուցապատումներն են: Շատ ուրախ ենք, որ այս խնդիրը գտնվում է քաղաքապետի ուշադրության կենտրոնում: Ինչպես գիտեք, ավագանու ընտրությունների ժամանակ շատերը, փորձելով օգտվելով իրավիճակից, որ քաղաքապետարանում աշխատանքը քաոսային է, ժամանակավոր պաշտոնակատար պարոն Արեյանը չէր հասցնում համակարգել, փորձեցին իրականացնել ապօրինի կառուցապատումներ: Այս միտումը շարունակվում է: Շատ դեպքեր կան, որ կասեցրել են, շատ դեպքեր կան, որ դեռ չեն կարողանում կասեցնել, որովհետև մարդիկ արդեն սովորել են, դատարան են դիմում, որպեսզի չկարողանան ստիպել քանդել ապօրինի կառույցը՝ շարունակելով իրականացնել կառուցապատում: Կարծում եմ՝ նաև անհրաժեշտ է իրականացնել օրենսդրական բարեփոխումներ: Այսօր փաստ է, որ այլևս վարչական իրավախախտումների վերաբերյալ արձանագրությունները և վարչական տույժերը որևէ օգուտ չեն տալիս, մարդիկ դրանք վճարում են և շարունակում կառուցապատել:

Այս պահին իմ ուշադրության կենտրոնում է Աբովյան 5 հասցեում «Մուլտի Գրուպ» կոնցեռնի կողմից իրականացվող ապօրինի կառուցապատումը, որ կասեցրեցինք դեռևս հունիսին, բայց վերջերս այն շարունակելու փորձեր արվեցին, սակայն կառուցապատումը նորից կասեցվեց:

-Քաղաքապետարանի գնումների ծախսային մասը կրճատվե՞լ է: Օրինակ, տարիներ առաջ 29 միլիոն դրամի կոնյակ էր գնվել, կես միլիոն դրամ արժեքով բաժակներ:

-Պետական գնումներում, այո, խնդիր կար, շատ ավելորդ գնումներ էին իրականացվում, որտեղ կոռուպցիոն ռիսկեր կային: Գնումներ էին կատարվում ընկերություններից, որոնք կապ ունեին քաղաքային իշխանությունների հետ, այսինքն՝ այստեղ կար շահերի բախում: Որքան հիշում եմ, քաղաքապետը հայտարարել էր, որ պատրաստվում է ծախսային կրճատումներ անել, բայց դեռ շոշափելի կրճատումներ չեն եղել: Տարին արդեն ավարտվում է, և նոր գնումներ չեն իրականացվի:

Շուտով կլինի 2019 թ.-ի բյուջեն, կուսումնասիրենք, կհասկանանք, որ գնումներն են ավելորդ, որ գնումներն է անհրաժեշտ ավելացնել: Շատ կարևոր է, որ լինի թափանցիկություն, մրցույթները լինեն բաց, արդար, որպեսզի չունենանք այն պատկերը, ինչ ունեցել ենք նախորդ իշխանությունների ժամանակ:

-Ի վերջո, «Լույսը» ընդդիմությո՞ւն է ավագանու կազմում:

-Իհարկե, շատ հաճախ մեզ համեմատում են կառավարության հետ և ասում են՝ դուք ո՞նց կարող եք ընդդիմություն լինել, երբ դուք նախարար ունեք: Իրենց պատասխանում ենք հետևյալը. ներկա կառավարությունը հետհեղափոխական կառավարություն է, և գիտենք, որ հետհեղափոխական իրավիճակներում չկա ընդդիմություն և իշխանություն: Իսկ Երևանի այս ավագանին ընտրություններով է ձևավորվել, քաղաքացիները հնարավորություն են ունեցել իրենց քվեով որոշել, թե ով պետք է լինի մեծամասնություն, ով պետք է լինի փոքրամասնություն, ում պետք է տալ իշխանության լծակներ, ում չպետք է տալ: «Լույսը» չունի իշխանական լծակներ, և, բնականաբար, այն ընդդիմադիր է: Մենք միշտ պատրաստ ենք քննադատել և միշտ պատրաստ ենք աշխատել ու համագործակցել: Երբ ասում ենք ՝ ընդդիմություն ենք, չի նշանակում, որ ներկայիս իշխանությանը պետք է վերաբերվենք այնպես, ինչպես նախկին կոռումպացված իշխանություններին: Ընդհանրապես ցանկացած իշխանություն, ում կուսակցությունն ուզում է լինի, անհրաժեշտ է հավասարակշռող և զսպող ուժ: Եթե դա չեղավ, չենք կարող ունենալ ժողովրդավարություն Հայաստանում: Այդ պատճառով քանի որ ժողովուրդը որոշել է, որ մենք պետք է լինենք ընդդիմությունը, սիրով կկատարենք այդ առաքելությունը:

Լուսանկարները՝ Սարո Բաղդասարյանի