Վերաքննիչ քրեական դատարանը քիչ առաջ հետաձգեց Մանվել Գրիգորյանին գրավի դիմաց ազատ արձակելու որոշման դեմ Դատախազության ներկայացրած բողոքի քննությունը: Դատարանի դիմաց գտնվող լրագրողների հետ զրույցում Գրիգորյանի պաշտպան Արսեն Մկրտչյանը նշեց, որ որոշ փաստաթղթեր տրամադրելու և դրանց ծանոթանալու անհրաժեշտություն կար, որի պատճառով է նիստը հետաձգվել:

Երբ Մկրտչյանը դուրս եկավ դատարանից, շենքի դիմաց հավաքված քաղաքացիները, նրան ընդառաջ գալով, հայտարարեցին, թե Մկրտչյանին դատարանում կհանդիպեն, և որ վերջինս իրենց թափթփուկ է անվանել: Ըստ ցուցարարների՝ իրենք ուղիղ եթերով հետևելիս են եղել լրագրողների հետ Մկրտչյանի զրույցին: Նշենք, որ լրագրողներից որևէ մեկը Մկրտչյանի կողմից այսօր ասված նման արտահայտություն չէր լսել: Արսեն Մկրտչյանն ի պատասխան ցուցարարներին` հորդորեց ևս մեկ անգամ լսել տեսագրությունները, սակայն վրդովված ցուցարարները քայլում էին նրա ետևից ու վանկարկում՝ «տուշոնկայի փաստաբան»:

Նրանք հորդորում էին քաղաքացիներին դուրս գալ փողոց ու մասշտաբային բողոքի ակցիաներ անել:

Դատարանի դիմաց մեծ թվով ոստիկաններ էին կենտրոնացված: Վերջիններս հսկողությամբ Արսեն Մկրտչյանը մոտեցավ իր մեքենային: Ցուցարարները մի պահ որոշեցին փակել նրա ճանապարհն ու թույլ չտալ, որ գնա, ապա նրանցից մեկը հորդորեց նման բան չանել և ավելորդ շահարկումների առիթ չտալ:

Հիշեցնենք, որ Վերաքննիչ քրեական դատարանը` նախագահությամբ դատավոր Արսեն Նիկողոսյանի, քննում էր գեներալ Մանվել Գրիգորյանին 25 մլն դրամ գրավի դիմաց ազատ արձակելու որոշման դեմ Դատախազության ներկայացրած բողոքը:

Դատարանի դիմաց հավաքվել էին մեծ թվով քաղաքացիներ, որոնք պահանջում են Գրիգորյանին նորից կալանավորել:

Մանվել Գրիգորյանը բողոքի քննությանը չէր ներկայացել: Գործը մակագրվել է դատավոր Արսեն Նիկողոսյանին:

Հիշեցնենք նաև, որ Մանվել Գրիգորյանին մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար: