HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Ապրիլյան պատերազմի դեպքերը քննող ԱԺ հանձնաժողովում կներգրավվեն պաշտոնաթող բարձրաստիճան զինվորականներ

2016 թվականի ապրիլյան պատերազմի դեպքերն ուսումնասիրող ԱԺ քննիչ հանձնաժողովն այսօր աշխատանքային հերթական նիստն է հրավիրել:

Այս մասին «Հետք»-ի հետ զրույցում ասաց հանձնաժողովի նախագահ Անդրանիկ Քոչարյանը: Հանձնաժողովի անդամներն այսօրվա նիստում ուսումնասիրել են ապրիլյան պատերազմին առնչվող փաստաթղթերը, որոնք ձեռք են բերել Պաշտպանության նախարարությունից:

«Մեր ձեռքի տակ եղած փաստաթղթերը մանրամասն քննում ենք, իսկ դա շատ կարևոր է, դրա արդյունքից է կախված՝ մենք հետագայում հանձնաժողով հրավիրվող անձանց հետ լավ կաշխատենք, թե չէ: Որպեսզի ճիշտ հարցադրումներով հանդես գանք, պետք է առաջնահերթ քննենք այն տեղեկատվությունը, որն այս պահին հասանելի է»,- ասաց Անդրանիկ Քոչարյանը:

Հանձնաժողովի նախագահը չբացառեց, որ փաստաթղթեր ձեռք կբերեն նաև Ազգային անվտանգության ծառայությունից:

Քոչարյանը վստահեցրեց՝ հանձնաժողովը մասնագիտական առումով խոչընդոտներ չունի, սակայն կներգրավեն նաև այլ մասնագետների:

«Հանձնաժողովի անդամները համակարծիք են ինձ հետ, որ ինչ-որ պահից հրավիրենք բարձրաստիճան, բայց արդեն թոշակի անցած զինվորականների»,- ասաց Անդրանիկ Քոչարյանը՝ հավելելով, որ այդ զինվորականներից մեկի հետ արդեն նախնական համաձայնություն է ձեռք բերվել:

«Կան զինվորականներ, որոնք գուցե ինչ-որ անհանգստություններ ունեն հանձնաժողովի աշխատանքի հետ կապված, բայց անձամբ նախարարի մոտ տեսնում եմ, որ կա նման անհրաժեշտություն: Հանձնաժողովը և պաշտպանության նախարարը միասին պետք է ճանապարհ անցնենք, ինչքան էլ չուզողներ լինեն, նախկին իշանություններից անհանգստացողներ լինեն, այդ ճանապարհը միասին անցնելու ենք»,- ասաց նա:

Մեր դիտարկմանը, թե, օրինակ, պաշտպանության նախկին նախարար Սեյրան Օհանյանը որոշակի թերահավատություն ուներ հանձնաժողովի աշխատանքի և անդամների մասնագիտական որակների վերաբերյալ, անգամ շեշտում էր հանձնաժողովում չծառայած անդամների լինելը, Անդրանիկ Քոչարյանն ասաց.

«Ես ուզում եմ հասկանալ, իսկ պրոֆեսիոնալ ծառայածների կառավարման ժամանակ այսքան թերացումներն ինչի՞ արդյունքում են: Մեր աշխատանքի արդյունքը ինքն էլ կկարդա: Միանգամից գնահատական տալը թուլության նշան է, թող իմ նախկին գործընկերը, մենք բանակի կայացման գործում միասին մեծ ճանապարհ ենք անցել, ուզում եմ ինքը մնա այդ բարձունքի վրա: Թող չկասկածի էն, ինչը դեռ կասկածի տեղիք չի տվել: Ես էլ միշտ կասկածել եմ, որ ինչպես կարող էր մարտի մեկին նախկին նախարարը, որը շտաբի պետն էր, հնարավորություն տար, որ բանակը հանեն ժողովրդի դեմ, որի համար իրեն մեղադրանք է առաջադրվել հիմա: Այնպես որ նորից կրկնեմ մեր դասականի խոսքերը՝ հանգիստ նստեք տեղներդ»:

2016-ի ապրիլին ծավալված ռազմական գործողությունների հանգամանքներն ուսումնասիրող ԱԺ քննիչ հանձնաժողովը ստեղծվել է այս տարվա մայիսին՝ 47 պատգամավորի դիմում-պահանջով: Հանձնաժողովը ստեղծվել է վարչապետ Փաշինյանի անուղղակի հանձնարարականով, երբ Փաշինյանը, խոսելով դատաիրավական համակարգի խնդիրների մասին, ասաց, որ իր կարծիքով՝ ժամանակն է, որ խորհրդարանը ստեղծի ժամանակավոր հանձնաժողով, որը կուսումնասիրի ապրիլյան պատերազմի հանգամանքները:

Քննիչ հանձնաժողովի լիազորություններն իրականացնում է ԱԺ պաշտպանության և անվտանգության հարցերի մշտական հանձնաժողովը:

Հիշեցնենք, որ հանձնաժողովը որոշում էր կայացրել հրավիրել նաև ապրիլյան պատերազմի զոհերի հարազատներին ու ծառայակից ընկերներին, քանի որ «զոհված զինվորները վերջիններիս հետ հեռախոսով խոսել են, և գուցե օգտակար տեղեկություններ փոխանցեն»:

Հանձնաժողովի նիստերը դռնփակ են անցկացվում:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։