Թաիլանդի Պատայա քաղաքում ընթացող ծանրամարտի աշխարհի առաջնության մրցումային նախավերջին օրը մրցահարթակ դուրս եկան 109 կգ քաշային կարգում հանդես եկող տղամարդիկ: Ինչպես և 2018 թվականին, այս տարի ևս 109 կգ քաշային կարգում իրեն հավասարը չունեցավ Սիմոն Մարտիրոսյանը՝ դառնալով աշխարհի կրկնակի չեմպիոն: 22-ամյա հայ ծանրորդը երկամարտում գրանցեց 429 կգ արդյունք:

Պոկում վարժությունում Սիմոն Մարտիրոսյանը նախ բարձրացրեց 190 կիլոգրամանոց ծանրաձողը, այնուհետև հաջողությամբ կատարեց նաև 195-ը: Մրցաձևի վերջանամասը շատ դիտարժան ստացվեց: Չինացի Յան Ժին իր երրորդ մոտեցմամբ բարձրացրեց 197 կգ՝ սահմանելով պոկում վարժությունում աշխարհի ռեկորդ: Այնուհետև ծանրաձողին մոտեցավ բելառուս Անդրեյ Արյամնովը, որը հաջողությամբ բարձրացրեց 198 կգ և նոր ռեկորդ սահմանեց, սակայն վերջին խոսքը հայ մարզիկինն էր: Երրորդ մոտեցմամբ Սիմոն Մարտիրոսյանը իր գլխավերևում պահեց 199 կլիոգրամանոց ծանրաձողը՝ իր անունով գրանցելով պոկում վարժության աշխարհի ռեկորդը: Հիշեցնենք, որ 2018թ. աշխարհի առաջնության ժամանակ էլ Սիմոն Մարտիրոսյանը սահմանել էր 109 կգ քաշային կարգում հրում վարժության և երկամարտի աշխարհի ռեկորդ: Այսինքն՝ այս քաշային կարգում աշխարհի բոլոր ռեկորդները այժմ պատկանում են 22-ամյա Սիմոն Մարտիրոսյանին:

Հրում վարժությունը հայ ծանրորդը սկսեց 230 կլիոգրամից, ընդ որում այն ժամանակ, երբ բոլորն արդեն ավարտել էին պայքարը: Այդ քաշը նա հաջողությամբ բարձրացրեց՝ ապահովելով չեմպիոնի տիտղոսը: Դրանից հետո նա գնաց հրում վարժության և երկամարտի նոր ռեկորդի հետևից՝ պատվիրելով 241 կիլոգրամ, սակայն երկրորդ մոտեցմամբ չկարողացավ բարձրացնել և երրորդ մոտեցումից հրաժարվեց: Հրում վարժությունում երկրորդը ուզբեկ  Ակբար Ջուրաևն էր (229 կգ), իսկ երրոդը՝ բելառուս Անդրեյ Արյամնովը (228 կգ):

Այսպիսով երկամարտի 429 կգ արդյունքով Սիմոն Մարտիրոսյանը հռչակվեց աշխարհի չեմպիոն, Անդրեյ Արյամնովը 426 կգ արդյունքով երկրորդն էր, իսկ Յան Ժեն 420 կգ արդյունքով՝ երրորդը:

Սիմոն Մարտիրոսյանից առաջ աշխարհի չեմպիոն էր դարձել նաև 89 կգ քաշային Հակոբ Մկրտչյանը, 81 կգ քաշային Անդրանիկ Կարապետյանը և 102 կգ քաշային Սամվել Գասպարյանը բրոնզե մեդալներ էին նվաճել պոկում վարժությունում:

Հիշեցնենք, որ Սիմոն Մարտիրոսյանը նաև Եվրոպայի կրկնակի (2017, 2019) չեմպիոն է, 2016թ. Օլիմպիական խաղերի փոխչեմպիոն: Հայ ծանրորդը բազմաթիվ մեդալներ է նվաճել նաև երիտասարդական ու պատանեկան առաջնություններում:

Սեպտեմբերի 27-ին՝ աշխարհի 2019թ. առաջնության վերջին օրը, մրցահարթակը կտրամադրվի գերծանրքաշայիններին, այստեղ Հայաստանը կներկայացնեն Գոռ Մինասյանն ու Ռուբեն Ալեքսանյանը: